നിങ്ങളെ അറിയാത്തവർ,
നിങ്ങളെ വേണ്ടാത്തവർ
നിങ്ങളെ അവഗണിക്കും.
അവർ നിങ്ങളെ
അര്‍ഹിക്കുന്നില്ല
എന്ന് മാത്രം മനസിലാക്കുക.
ക്ലോസെറ്റില്‍
എന്ത്‌ പൊന്ന്,
എന്തിന്‌ പൊന്ന്?
നിങ്ങളെ ആവശ്യമില്ലാത്തിടത്ത്
നിങ്ങൾ അവഗണിക്കപ്പെടും.
അവഗണിക്കപ്പെടണം.
അത്‌, യഥാര്‍ത്ഥത്തില്‍
അവഗണനയല്ല.
ശരിയായ പരിഗണനയാണ്.
നിങ്ങളെ അവര്‍ക്ക്
ഉപയോഗപ്പെടില്ലെങ്കില്‍
നിങ്ങൾ അവഗണിക്കപ്പെടും.
നിങ്ങളില്‍ നിന്ന് കിട്ടുന്ന
ഉപയോഗത്തിനനുസരിച്ചാണ്
പരിഗണന, ബഹുമാനം.
ഉപയോഗപ്പെടുന്നത്ര
നിങ്ങൾ അവര്‍ക്കുള്ള
ഉപകരണമാവണം,
വസ്തു ആവണം,
അടിമയാവണം,
പരിഗണന കിട്ടാന്‍.
അടുപ്പില്‍ തീ കത്താന്‍
വെള്ളം വേണ്ട.
കിണറില്‍ വെള്ളമുണ്ടാവാന്‍
തീയും വേണ്ട.
അവിടം അവ
ഉപയോഗപ്പെടില്ല.
അതിനാല്‍
അവഗണിക്കപ്പെടും.
ആ അവഗണനയാണ്
യാഥാര്‍ത്ഥ പരിഗണന,
ബഹുമാനം.
അത്തരം അവഗണനയില്‍
സന്തോഷിക്കുകയും
ആനന്ദിക്കുകയും ചെയ്യുക.
അത്തരം അവഗണനയാണ്
നിങ്ങളുടെ യാഥാര്‍ത്ഥ വില,
നിങ്ങളോടുള്ള ബഹുമാനം.
യാഥാര്‍ത്ഥ വിലയും
ഗുണവും ഉപയോഗവും
അറിയുന്നവനല്ലേ
അതിനെ വിലമതിക്കൂ.
******
സ്വീകാര്യതയും സ്വീകരിക്കലും
രണ്ടും രണ്ടാണ്.
സ്വീകരിക്കുക എന്നത്
ഓരോന്നും ഓരോരുത്തനും
ചെയ്യുന്ന കാര്യം.
സ്വീകാര്യത എന്നത്
ഓരോന്നിനും ഓരോരുത്തര്‍ക്കും
പല കാരണങ്ങൾ കൊണ്ടും
കിട്ടുന്നത്.
നിങ്ങള്‍ക്ക് കിട്ടുന്ന സ്വീകാര്യതയെ
നിങ്ങളുടെ സ്വീകരിക്കലാക്കരുത്.
ജനങ്ങളില്‍ നിന്നും
ചുറ്റുപാടില്‍ നിന്നും കിട്ടുന്ന
സ്വീകാര്യതയും ബഹുമാനവും
അവര്‍ക്ക് ഇഷ്ടമാകാത്ത,
എന്നാല്‍ ശരിക്കും സത്യമെന്ന്
നിങ്ങള്‍ക്ക് ബോധ്യമുള്ള
കാര്യങ്ങൾ പറയുന്നതിൽ നിന്നും
നിങ്ങളെ തടയും.
ബഹുമാനിക്കപ്പെടുന്നവന്‍
എപ്പോഴും.
ബഹുമാനിക്കുന്നവന്റെ
അടിമയാണ്‌.
ബഹുമാനിക്കപ്പെടുന്നവന്‍
പൂജിക്കുന്നത്
തന്റെ തന്നെ പ്രതിഷ്ഠയെ.
തന്റെ ആ പ്രതിഷ്ഠ
അവന്‍ വെച്ചിരിക്കുന്നത്
തന്നെ ബഹുമാനിക്കുന്നവനെന്ന
കോവിലില്‍ ആണ്‌.
അതിനാല്‍,
ബഹുമാനിക്കപ്പെടുന്ന നേതാക്കള്‍
എപ്പോഴും
അവരെ ബഹുമാനിക്കുന്ന
ജനങ്ങൾക്ക് മുന്നില്‍
അഭിനയിച്ചു മാത്രം
ജീവിക്കുന്നു.
.jpg)
No comments:
Post a Comment