ലോകം മുഴുവന്‍ കാണേണമോ? നിന്റെ ഗ്രാമം കാണുക.

അന്ധവിശ്വാസം എന്ന് വിളിക്കുന്നത് എന്തിനാണ്?

എല്ലാ വിശ്വാസങ്ങളും അന്ധം. 

അന്ധമാവുമ്പോഴേ 

വിശ്വാസത്തിന്റെ ആവശ്യം തന്നെ വരുന്നുള്ളൂ.

*********

'ഗുരോ, പുനര്‍ജ്ജന്മമുണ്ടോ?' 

'ഉണ്ട്‌' 

'ഗുരോ, എങ്ങിനെ?' 

'നീയില്ലാതായും നീയല്ലാതായുമുള്ള 

ജീവികളുടെയും ജീവിതത്തിന്റെയും 

ജന്മങ്ങൾ.’

*********

ലോകം മുഴുവന്‍ കാണേണമോ? 

നിന്റെ ഗ്രാമം കാണുക. 

ഗ്രാമത്തിലില്ലാത്തതൊന്നും ലോകത്തിലില്ല. 

DNAയില്‍ ഇല്ലാത്തത് നിന്നിലാകെയുമില്ല.

********

ആദ്യമാദ്യം ആ പൂച്ച 

പുറംലോകവുമായി ഒറ്റക്ക് മല്ലിടുന്നത്ര 

ധീരനായിരുന്നു. 

ഇപ്പോൾ വളര്‍ത്തി വളർത്തി 

ഞാന്‍ അതിനെ ഭീരുവാക്കി.

********

വെറും കൊതുകിനെ കൊല്ലാന്‍ നീയെടുക്കുന്ന 

സൂത്രവും ശുഷ്കാന്തിയും ലഘുബോധവും തന്നെ 

പ്രകൃതി പലവിധേന നിന്റെ മേലും എടുക്കും.

*******

നിറഞ്ഞ് നില്‍ക്കുക മാത്രം. 

ഒന്നും പറയാനില്ല. 

ജീവിതം പറയിപ്പിക്കുന്നതല്ലാതെ. 

പരിസരങ്ങളോട് പ്രതികരിക്കുന്നതല്ലാതെ. 

ദൈവത്തിനെന്താവശ്യം?

ബന്ധങ്ങൾക്കൊരു ശരീരം. ആ ശരീരത്തിനും ജീവന്‍.

തിരസ്കൃതനിൽ ഒരപരിചിതനുണ്ട്.  

എവിടവും എപ്പോഴും പുതിയത് കാണുന്ന അപരിചിതന്‍. 

അവന് പുതിയത് സത്യം. 

സത്യം പുതിയത്. 

അതവന്‍ വിളിച്ചു പറയും

******

ഒറ്റക്ക് യാത്ര ചെയ്യുമ്പോൾ സംഭവിക്കുന്നതാണ് 

ആ ഒറ്റയും ഇല്ലാതാവുകയെന്നത്‌. 

ഒറ്റയില്‍  'നീ'യില്ല. 

'നീ'യില്ലേല്‍ 'ഞാന്‍' എന്ന ഒറ്റയുമില്ല.

*******

യാത്ര ഒറ്റക്കാവണം. 

എങ്കിലേ വഴി മനസ്സിലാവൂ. 

വെറുതെ പിന്‍തുടരുന്നവന്‍ വഴിയറിയില്ല. 

ആരുടെയെങ്കിലും രുചിയനുഭവം 

മറ്റൊരാളുടേതാവില്ല.

*******

കൊറോണ: മനുഷ്യന്‍ ഭൂമി തുരന്ന് 

കോളനികള്‍ ഉണ്ടാക്കുന്നു. 

വൈറസ് മനുഷ്യനെയും മറ്റ് ജീവികളെയും തുരന്ന് 

കോളനികള്‍ ഉണ്ടാക്കുന്നു.

******

യാഥാര്‍ത്ഥ കുറ്റവാളി ആദ്യം ചെയ്യുക 

ഒരു നിരപരാധിയെ ബലിയാടാക്കുക. 

പിന്നെ ആ നിരപരാധിയാണ് 

കുറ്റം ചെയ്തതെന്ന് വരുത്തി 

മാപ്പും പറയിപ്പിക്കുക.

*******

ഇവിടെ ഈ കോണ്‍ക്രീറ്റിലും 

തന്റെ വിത്തും പേറി അപ്പൂപ്പന്‍താടി 

പാറിവന്ന് വീണു. 

ഉദ്ദേശം നിറഞ്ഞ ഉദ്ദേശരാഹിത്യത്തോടെ.  

പുരുഷലൈംഗീകത പോലെ.

******

തിരസ്കൃതനേ സത്യം പറയൂ. 

അഥവാ സത്യം പറഞ്ഞാല്‍ തിരസ്കൃതനാവും. 

സ്വീകാര്യത സത്യം പറയുന്നതിൽ നിന്നും 

ആരെയും പേടിപ്പിച്ചകറ്റും.

*******

ബന്ധങ്ങൾക്കൊരു ശരീരം. 

ആ ശരീരത്തിനും ജീവന്‍. 

ജീവൻ നിലനിര്‍ത്തുന്നത് ശ്വാസനിശ്വാസം. 

ബന്ധങ്ങൾക്കിടയിലെ 

വിനിമയങ്ങളായ ശ്വാസനിശ്വാസം.

*******

കോറോണ: കൊതുകിനെയും ബാക്ടീരിയയെയും കൊല്ലാന്‍ 

നീയെടുക്കുന്ന സൂത്രവും ശുഷ്കാന്തിയും ലഘുബോധവും  

പ്രകൃതി പലവിധേന നിന്റെ മേലും എടുക്കും.

*******

കാമം വേഷംകെട്ടിയാല്‍ പ്രണയമെന്ന് പേര്‌.

ലൈംഗീകത കൊണ്ടുള്ള സ്ത്രീ പുരുഷ പ്രണയം 

ലൈംഗീകത കൊണ്ടവസാനിക്കും. 

ജീവിതം കൊണ്ടുള്ള, ജീവിതത്തോടുള്ള പ്രണയം 

ജീവിതമുള്ളിടത്തോളം തുടരും.

********

ചിലരങ്ങനെ. നുരയും പൊടിയും. 

അലങ്കാരമായ് എപ്പോഴും മേലെ. 

പക്ഷെ ഓടിക്കിതച്ച്, ദാഹം മാറ്റാതെ, 

മോക്ഷം കിട്ടാതെ, കാര്യത്തിന് കൊള്ളാതെ.

*********

ഇന്ത്യ ആര് വേണേലും 

എങ്ങിനെ വേണേലും ഭരിക്കട്ടെ. 

പക്ഷേ അത് മതവെറിയും, 

ഹിന്ദുമുസ്ലിം വിഭജനവും  

അയല്‍വാസിവിരോധവും 

പറഞ്ഞു മാത്രമാകരുത്.

********

എപ്പോഴും കൂടെയുള്ള ചിലര്‍ 

ഒരിക്കലും കൂടെയില്ലെന്നറിയാം. 

അവര്‍ ആരുടെയും കൂടെയില്ല. 

എന്നാലും അവരോടൊക്കെ 

വഴിപോക്കനിരുന്ന് സംസാരിക്കും

********

കാമം വേഷംകെട്ടിയാല്‍ പ്രണയമെന്ന് പേര്‌. 

സഹോദരനെ പോലെ സഹോദരിയെ പോലെ 

എന്ന് പറഞ്ഞാല്‍  

കാമപൂര്‍ത്തീകരണത്തിന് പറ്റിയ 

ഇനമല്ലെന്നര്‍ത്ഥം

*******

തടവറയിൽ പെട്ടവന്റെ 

സ്വാതന്ത്ര്യദാഹം മാത്രമാണ് പ്രേമം.  

തടവറയും നിഷേധവും 

ഇല്ലായിരുന്നെങ്കിൽ ഉണ്ടാവാത്തത്.

*******

തലസ്ഥാനം ഇന്ത്യക്ക് വഴി കാണിക്കട്ടെ. തലസ്ഥാനം ഇന്ത്യയുടെ തലച്ചോറാവട്ടെ.

പാർട്ടികൾക്ക് നിലനില്‍ക്കാനും വളരാനും 

അണികളെ നിലനിര്‍ത്താനും ഒരു ശത്രു വേണം. 

അല്ലെങ്കില്‍ നിരപരാധിയെ പിടിച്ചെങ്കിലും ശത്രുവാക്കണം

*******

EVM: ഭാരതീയര്‍ ഉച്ഛിഷ്ടം തിന്നുകയോ? 

വികസിതരാജ്യങ്ങൾ വേണ്ടെന്ന് വെച്ച EVM 

നാം കൊണ്ടുനടക്കുകയോ? 

നാം പഴയത് പേറുന്ന പിന്നാക്ക രാജ്യമോ?

******

ഡെല്‍ഹി ഫലം ഉയർത്തുന്ന ചോദ്യം: 

യഥാര്‍ത്ഥത്തില്‍ ലോക്സഭാ തെരഞ്ഞെടുപ്പില്‍ 

ആം ആദ്മി പാര്‍ട്ടിയെ തോല്പിച്ചത് 

EVM തന്നെയായിരുന്നോ?

******

ഡെല്‍ഹി പറയുന്നത്‌: 

ജനങ്ങൾക്ക് ആശയും ആശയവും നല്‍കാത്ത കോണ്‍ഗ്രസ് 

ഇന്ത്യ മുഴുവന്‍ നേരിടാന്‍ പോകുന്ന വിധി ഒന്ന്. 

തുടച്ചുനീക്കപ്പെടുക.

**********

വെറുപ്പിന്റെയും വിഭജനത്തിന്റെയും രാഷ്ട്രീയത്തെ 

എങ്ങിനെനേരിടണം? 

ഡല്‍ഹി പറയും: സുതാര്യത, സത്യസന്ധത, 

ലാളിത്യം, ജനക്ഷേമം എന്നിവകൊണ്ട്.

********

ഡെല്‍ഹിയില്‍ നിന്ന് പഠിക്കൂ. 

നല്ലഭരണം ജനങ്ങൾ മനസിലാക്കും.  

ഇന്ത്യന്‍ പ്രതിപക്ഷപാര്‍ട്ടികള്‍ മുഴുവന്‍ 

ആം ആദ്മി പാര്‍ട്ടിയായി മാറണം.

********

തലസ്ഥാനം ഇന്ത്യക്ക് വഴി കാണിക്കട്ടെ.

തലസ്ഥാനം ഇന്ത്യയുടെ തലച്ചോറാവട്ടെ. 

എപ്പോഴും മാറ്റം ആവശ്യപ്പെടുന്ന തലച്ചോറ്‌. 

തലസ്ഥാനം.

*******

കല്‍പിക്കുന്നത് കൊണ്ട്‌ പ്രാര്‍ത്ഥിക്കുക ആത്മീയതയോ?

ചില സംഗതികളോടടുക്കുമ്പോഴറിയും: 

അടുത്ത് ദൂരെയെന്നും, ദൂരെ അടുത്തെന്നും. 

പലർക്കും ഒഴിവകഴിവുകള്‍ ഏറെയെന്നും…..

******

വയര്‍ ചീര്‍ക്കാതെ, മുല ചായാതെ 

പ്രസവിച്ച് കുഞ്ഞിനെ നേടിയവളാര്? 

നഷ്ടപ്പെട്ടേ നേടൂ. 

കുഞ്ഞായാലും പിന്നെ, 

ബോധോദയവും വിത്ത് മുളച്ച തൈയും.

******

"ഗുരോ, ആരാണ്‌ ഞാന്‍? ആരാണ് നീ?" 

"ഇല്ലാതിരുന്നത്. ആയിത്തീരുന്നത്. 

ഇല്ലാതായിത്തീരുന്നത്. 

ഞാന്‍, നീ.”

*******

കല്‍പിക്കുന്നത് കൊണ്ട്‌ പ്രാര്‍ത്ഥിക്കുക ആത്മീയതയോ? 

ഒപ്പം തുടുത്ത മുലകളും നീണ്ട നേത്രങ്ങളുമുള്ള 

സുന്ദരികളെയും മദ്യവും കിട്ടാനും?

******

കിട്ടുന്ന ചിലരെ ചങ്ങാത്തം കൂട്ടുമെന്നല്ലാതെ, 

നിര്‍ബന്ധമായും ചങ്ങാത്തം കൂടേണ്ട ചിലരെ 

ആര്‍ക്കും കിട്ടുന്നില്ല.

********

ചിലവും നഷ്ടവും വരുംവിധം കൂടെ നില്‍ക്കുന്നവർ 

ഏറിയാല്‍ ഒന്നോ രണ്ടോ. 

ബുദ്ധനും മുഹമ്മദിനും യേശുവിനും 

ശങ്കരനും കൃഷ്ണനും എല്ലാം അപ്പടി.

*******