ജീവിതം ഇത്രയേയുള്ളൂ എന്ന് തോന്നിയിട്ടില്ലാത്തവരില്ല. എന്നിട്ടും ആരും മതിയാക്കിയില്ല.

രണ്ട് കാലുകൾ, 

രണ്ട് കൈകൾ, 

ഒരുടൽ. 

പിന്നെ കൂടുതൽ വളർന്ന തലച്ചോറും 

അതുണ്ടാക്കുന്ന ബോധവുമാണോ 

മനുഷ്യന് മാത്രമുണ്ടെന്ന് പറയുന്ന 

ആത്മാവ്?

******

നിങ്ങൾക്കുള്ള ഉറപ്പിനെക്കാൾ 

വലിയ എന്തോ ഒരുറപ്പ് 

ബുദ്ധനും മുഹമ്മദിനും 

യേശുവിനും മറ്റാർക്കും 

ഉണ്ടായിരുന്നുവെന്ന തോന്നൽ 

തെറ്റാണ്, 

ഒഴിവാക്കേണ്ടതാണ്. 

ദൂരേനിന്നുള്ള 

വെറും തോന്നൽ മാത്രമാണത്. 

ജീവിതം എന്ത്, എന്തിന് 

എന്നറിയില്ലെന്ന ഒരുറപ്പ് മാത്രമേ 

ആർക്കുമുണ്ടായിരുന്നുള്ളൂ.

*****

കടന്നുപോയവരാരും ഒരു പാഠവും നൽകിയില്ല. 

ജനിതകത്തിലൂടെയല്ലാതെ. 

ദൂരെയുള്ളതൊക്കെയും അലങ്കാരം, സ്വപ്നം. 

ചന്ദ്രനായാലും നക്ഷത്രങ്ങളായാലും.

*****

ജീവിതം 'ഇത്രയേയുള്ളൂ', 'മതി' എന്ന് ഒരിക്കലെങ്കിലും തോന്നിയിട്ടില്ലാത്തവർ ഉണ്ടാവില്ല. 

എന്നിട്ടും പലരും മതിയാക്കിയില്ല. 

എന്തുകൊണ്ട്? 

പേടിയും അധൈര്യവും കൊണ്ട്. 

പിന്നെ? 

പിന്നെയും കൂടെക്കൂടുന്ന പ്രതീക്ഷ കൊണ്ട്.

******

മരിക്കാൻ പേടിയോ? 

ജീവിക്കാൻ മാത്രം 

എന്താണ് ഇവിടെയുള്ളത്? 

വേറെ വേറെയെന്ന് 

തോന്നിപ്പിക്കും വിധം 

ആവർത്തനമല്ലാതെ. 

ഞാൻ തന്നെയും ഇല്ലെന്നിരിക്കെ.

*****

ജോലി ഉപജീവനത്തിന് നിർബന്ധം. 

പക്ഷെ പച്ചയായ ജീവിതം നൽകുന്ന ശൂന്യതാബോധത്തിൽ നിന്നും മറഞ്ഞ് നിൽക്കാനും ജോലി അത്യാവശ്യമാണ്. 

ബോറടിയെന്ന് താലോലിച്ച് വിളിക്കുന്നതിനെ ഒഴിവാക്കാൻ ജോലിയും മദ്യവും ഭക്തിയും സാമൂഹ്യസേവനവും.

*****

അപ്പപ്പോൾ സാധിക്കുന്ന പോലെ ഉണ്ടാക്കിയ പരിഹാരവും സ്വസ്ഥതയും മാത്രമേ മനുഷ്യനുളളൂ, മനുഷ്യനുണ്ടായിട്ടുള്ളൂ, മനുഷ്യൻ ഉണ്ടാക്കിയിട്ടുള്ളൂ.

അല്ലാതെ, ഒരു കൃഷ്ണനും ബുദ്ധനും യേശുവും മുഹമ്മദും മാർക്സും സ്ഥിരമായ  പരിഹാരവും സ്വസ്ഥതയും മനുഷ്യന് നൽകിയിട്ടില്ല.