പ്രത്യക്ഷം കണ്ട് പരോക്ഷം സങ്കല്പമാകുന്ന വേശ്യ ഒന്ന്.

വേശ്യ ഒന്ന്.

പ്രത്യക്ഷം കണ്ട്
പരോക്ഷം
സങ്കല്പമാകുന്ന
വേശ്യ ഒന്ന്.

കാറ്റ്‌ പോലെ വീശിയടിച്ച്
കുളിരും
കൂടെ ഭയപ്പാടും തന്ന്‌
കടന്ന് പോകുന്നവൾ
ഒന്ന്.

ആണിലും പെണ്ണിലും
ഒന്ന്‌.
ദൈവം പോലെ,
പദാര്‍ത്ഥം പോലെ,
ബോധം പോലെ,
ഊര്‍ജം പോലെ.
ഒന്ന്‌. 

ജീവന്റെ ചൂടായ
ഒന്ന്. 

പലർക്കും പലതായ
ഒന്ന്. 

സാംക്രമിക രോഗം പോലെ
ഒന്ന്‌. 

കാണപ്പെട്ട്,
കാണപ്പെടാതെ,
വശീകരിച്ച്,
വെറുപ്പിച്ച്,
ഒന്ന്‌. 

വിലയായും
വിലയില്ലാതെയും
ഒന്ന്‌.

പ്രാപിച്ചവനും
പ്രാപിക്കാത്തവനും
വേവലാതി
ഒന്ന്. 

പിറകെ നടന്ന്,
വിലകൊടുത്ത്
പ്രാപിക്കുന്നവര്‍ പുണ്യാളര്‍.
അവർ ത്യാഗം ചെയ്തവർ. 

വില കൊടുക്കാനാവാതെ പ്രാപിക്കാനാവാത്തവര്‍
പുരോഹിതര്‍, പണ്ഡിതര്‍.
അവർ ത്യാഗം നടത്താതെ
സുരക്ഷിതരായവർ. 

വെറുതെ സങ്കല്പിക്കുന്ന
വേവലാതി മാത്രം പൂണ്ട
നൂറായിരങ്ങൾ വേറെ.
വിശ്വാസികള്‍.
വിലയും ത്യാഗവും
എന്തെന്നറിയാതെ
അവള്‍ക്ക് വേണ്ടി പോരടിച്ചവർ.
തലയണ വെച്ച് കിടന്നവർ. 

പുണ്യാളനെയും
പുരോഹിതനെയും
പിന്നെ നൂറായിരങ്ങളെയും
കാണാതെ,
അവർക്ക് പേര്‌ വീഴാതെ,
നാം വെറും വെറുതെ
അവർ സങ്കല്പിച്ചതിനെ
കാണുന്നു,
അവർ പേര്‌ വിളിച്ചതിനെ
പേര്‌ വിളിക്കുന്നു
പൂജിക്കുന്നു.
ഉള്ളറയില്‍. 

ദൈവം,
വേശ്യ.
ഉള്ളറയിലെ പ്രതിഷ്ഠ.
ഒന്ന്‌. 

പേര്‌ കൊണ്ടു വീണ
തടവറ.
കുറ്റപ്പെടുത്തല്‍.
ദൈവം.
ഒന്ന്‌. 

വെറും വെറുതെ
സങ്കല്പിച്ചു
കുറ്റപ്പെടുത്തുന്ന
ആയിരങ്ങള്‍ ....
ഒന്ന്. 

കുറ്റപ്പെടുത്തുന്നവരെ
വിളിക്കാനും
കുറ്റപ്പെടുത്താനും
ഏതുമില്ലാതെ.
പേരില്ലാതെ.
ഒന്നല്ലാതെ.