ഗുരോ, ജീവിതം വെറും വെറുതെയാണ് എന്ന് മനസ്സിലാക്കുന്നത് എങ്ങിനെ?

ഗുരോ, ജീവിതം വെറും വെറുതെയാണ് 

എന്ന് മനസ്സിലാക്കുന്നത് എങ്ങിനെ?

പൂച്ച വെറും വെറുതെ ഇരിക്കുന്നത് കാണുമ്പോൾ.

*******

ഗുരോ, ഏറ്റവും എളുപ്പമുള്ള ധ്യാനരീതി?

പൂച്ചയെ മുഖം നോക്കിയിരിക്കുക. ഒന്നുമില്ലെന്നറിയുക. 

ഏറെയൊന്നും ഇരിക്കാതെ നിറവ് അനുഭവമാക്കാം.

********

വാളയാര്‍: അല്ലേലും ദരിദ്രനും സാമാന്യയുക്തിക്കും 

എത്തിപ്പിടിക്കാനാവുന്ന 

ഏത് ഹൈകോടതിയും സുപ്രീംകോടതിയും ഭരണകൂടവുമാണ് 

ഇവിടെയുള്ളത്?

********

പുറത്ത്‌ മഴ കോരിച്ചൊരിയുന്നു. 

എന്ന് വെച്ച് വീട്ടിനുള്ളിലെ ടോയ്‌ലെറ്റ് വൃത്തിയാവില്ല. 

ടോയ്‌ലെറ്റ് വേറെതന്നെ വൃത്തിയാക്കണം. 

മനസും.

******

ഭക്ഷണം അളവല്ല; രുചിയാണ്. 

രുചി -കഴിപ്പിക്കുന്ന പുണ്യം. 

ഭക്ഷണം പുല്ലും വെള്ളവുമല്ല. 

രുചിയുണ്ടേല്‍ അളവ് പോരാതെ. 

രുചി ഇല്ലേല്‍ അളവ് വെറുതെ.

********

ഈ ലോകം മനുഷ്യന്റെതെന്ന് മനുഷ്യന്‍. 

ഉറുമ്പിന്റെതെന്ന് ഉറുമ്പ്. 

പുഴുവിന്റെതെന്ന് പുഴു. 

അണുവിന്റെതെന്ന് അണു. 

ആരുടെതുമല്ലെന്ന് ഇവന്‍.

********

എങ്ങിനെയും, എവിടെയും, എവിടെ നിന്നും 

സങ്കല്പിക്കാനും പ്രാപിക്കാനും ആവുന്ന 

ദൈവത്തിന് പ്രത്യേക ഇടം വേണ്ടതില്ല.

അത്രയേ ഉള്ളൂ…