കൊതുക് ജീവിക്കുന്ന മാനം (dimension)

ഇപ്പോഴും 

മനസ്സിലാവുന്നില്ല,

കൊതുക് ജീവിക്കുന്ന 

മാനം (dimension) 

ഏതാണെന്ന്.

ഒരു സെക്കൻഡിൽ 

അഞ്ഞൂറ് പ്രാവശ്യം 

കൊതുക് ചിറകടിക്കുന്നു. 

കൊതുകിൻ്റെ സമയം 

നമ്മുടേതല്ലെന്നെങ്കിലും 

മനസ്സിലാക്കട്ടെ. 

കൊതുകിൻ്റെ

മാനത്തിൽ

അതിൻ്റെ സമയത്തിന്

നമ്മുടേതിനേക്കാൾ

അഞ്ഞൂറിരട്ടി നീളമുണ്ട്.

നമ്മുടെ ഒരു നിമിഷം

കൊതുകിന് 

അഞ്ഞൂറ് നിമിഷം.

നമ്മുടെ നിമിഷത്തിൻ്റെ 

അഞ്ഞൂറിൽ ഒന്ന് മതി

കൊതുകിന് 

ഒരു നിമിഷമാകാൻ.

**** 

എന്നിരുന്നാലും 

അതേ കൊതുകിനെ 

വളരേ എളുപ്പം

നാം കൊല്ലുന്നു!!!!

അങ്ങനെ കൊല്ലുമ്പോൾ 

ആ കൊതുക് 

ചത്തുപോയെത്തുന്ന 

മാനവും (dimension) 

ഏതെന്ന് 

മനസ്സിലാവുന്നില്ല.

ഈ അറിവില്ലായ്മ

തന്നെയാണറിവ്.

ഈ അറിവില്ലായ്മ

സമ്മതിക്കുന്ന 

മതമാണ് മതം.

മററുള്ളവർക്കും

ഈ അറിവില്ലായ്മ

സമ്മതിച്ചു കൊടുക്കുന്ന

മതം തന്നെ

യഥാർത്ഥ മതം.

അതിനാൽ 

അറിവില്ലായ്മ നൽകുന്ന 

എല്ലാ വിശ്വാസവ്യത്യാസങ്ങളും

ഒരുപോലെ 

തെറ്റും ശരിയുമായി 

കണ്ടുൾകൊള്ളുന്ന

സഹിഷ്ണുത 

പറയുന്ന മതം

യഥാർത്ഥ മതം.

അറിവില്ലായ്മ തന്നെയായ

മതം.

*****

നിൻ്റെ ഒരു നിമിഷത്തെ  

അഞ്ഞൂറ് കഷണങ്ങളാക്കി മുറിക്കാൻ 

ചിറകിട്ടടിക്കുന്ന ശബ്ദമാണ് 

കൊതുകിൻ്റെ  കരച്ചിലായും 

താരാട്ട്പാട്ടായും 

നീ വിളിച്ചത്, 

തെറ്റിവിളിച്ചത്. 

.