നമ്മുടെ തെറ്റ് തെറ്റാണെന്ന് നമുക്ക് മനസ്സിലാവുന്നില്ല.

നമ്മുടെ തെറ്റ് നമുക്ക് തിരുത്താനാവുന്നില്ല.

തിരുത്തുന്നത് പോകട്ടെ, 

നമ്മുടെ തെറ്റ് തെറ്റാണെന്ന് പോലും നമുക്ക് മനസ്സിലാവുന്നില്ല. 

തെറ്റ് തെറ്റാണെന്ന് മനസ്സിലായിട്ട് വേണ്ടേ തിരുത്താനും തിരുത്താനുള്ള ശ്രമങ്ങൾ നടത്താനും.

അതാണ് യഥാർത്ഥ പ്രശ്നം. അല്ലാതെ അബദ്ധത്തിലും മറ്റും തെറ്റ് ചെയ്തു പോകുന്നതല്ല പ്രശ്നം. 

പകരം തെറ്റ് തെറ്റാണെന്ന് മനസ്സിലാവുന്നില്ല.

*****

എഴുതിയ ഉത്തരം തെറ്റാണെന്ന് മനസ്സിലാക്കിയവന് അത് കുത്തുകയും ആ ഉത്തരം വേണ്ടെന്ന് വെക്കാനും സാധിക്കും.

സാധിക്കുമെങ്കിൽ, സമയം അനുവദിക്കുമെങ്കിൽ തിരുത്തുകയും പകരം ശരി എഴുതാൻ സാധിക്കുകയും ചെയ്യും.

തെറ്റ് തെറ്റാണെന്ന് മനസ്സിലാക്കാൻ സാധിക്കാത്ത താണ് നമ്മുടെ പ്രശ്നം. 

*****

അതുകൊണ്ട് നമ്മൾ പകരമായി എന്ത് ചെയ്യുന്നു? 

മറ്റുള്ളവർ മുഴുവൻ തെറ്റുകാരാണെന്ന് വരുത്തുന്നു. 

അല്ലെങ്കിൽ ആ തെറ്റ് മറ്റുള്ളവരിൽ ആരോപിച്ച് രക്ഷപ്പെടാൻ ശ്രമിക്കുന്നു.

നമ്മളെ തിരുത്താൻ ശ്രമിക്കുന്നവരെ തെറ്റുകാരാണെന്ന് വരുത്തുന്നു.

*****

എന്തിന്? 

നമ്മുടെ തെറ്റിനെ ന്യായീകരിക്കാൻ. 

നമ്മൾ ശരിയാണെന്ന് വരുത്താൻ.

അശക്തൻ ചെയ്യുന്ന പണി എന്താണെന്നറിയാമോ?

താനാണ് ഏറ്റവും ശക്തനെന്ന് കരുതും, പറഞ്ഞുനടക്കും,, വരുത്തും.

മുഴുവൻ തെറ്റായവൻ താൻ ഏറ്റവും ശരിയെന്ന് കരുതും, പറഞ്ഞുനടക്കും,, വരുത്തും..

ശരിക്കും രോഗിയായ താനാണ് ആരോഗ്യവാനെന്ന് കരുതും, പറഞ്ഞുനടക്കും,, വരുത്തും.

******

ഫലത്തിൽ തെറ്റും രോഗവും വേരാഴ്ത്തി ഉയരത്തിൽ വളരും. 

നന്മയെന്നും ആരോഗ്യമെന്നും അവരവർക്ക് തോന്നിക്കൊണ്ട്.

*****

രോഗി രോഗിയാവുന്നത് രോഗിയാവുന്നത് കൊണ്ട് മാത്രമല്ല. 

താൻ രോഗിയാണെന്ന് മനസ്സിലാക്കാത്തത് കൊണ്ട് കൂടിയാണ്.

ഒപ്പം ആ രോഗം മറ്റുള്ളവർക്കാണെന്ന് കരുതുന്നിടത്താണ്, വരുത്തുന്നിടത്താണ്. 

മറ്റുള്ളവരിൽ ആ രോഗം ആരോപിച്ച് മറ്റുള്ളവരാണ് രോഗികൾ; താനല്ല, താനാണ് ആരോഗ്യവാൻ എന്ന് വരുത്തുന്നിടത്ത് കൂടിയാണ്.

*****

ഒരു കുറ്റവാളി കുറ്റവാളിയാകുന്നത് കുറ്റം ചെയ്യുന്നത് കൊണ്ട് മാത്രമല്ല.

താൻ ചെയ്യുന്നത് കുറ്റമാണ്, താൻ കുറ്റവാളിയാണ് എന്ന് മനസ്സിലാക്കാത്തത് കൊണ്ട് കൂടിയാണ്.

ഒപ്പം താൻ ചെയ്ത കുറ്റം മറ്റൊരു ബലിയാടിൽ ആരോപിക്കുന്നിടത്താണ്. എന്നിട്ടോ താൻ പുണ്യാളൻ ആണെന്ന് പറയുന്നിടത്ത്, കരുതുന്നിടത്ത്, വരുത്തുന്നിടത്ത്.

ആ മറ്റൊരുത്തനാണ് കുറ്റവാളിയെന്ന് വരുത്തി രക്ഷപ്പെടുന്നത് കൊണ്ട് കൂടിയാണ്.

*****

താൻ രോഗിയാണെന്ന് മനസ്സിലാക്കാത്ത രോഗി, ചുറ്റുവട്ടം തന്നെ വല്ലാതെ ശ്രദ്ധിക്കുന്നതും പേടിക്കുന്നതും തൻ്റെ വിജയവും മഹത്വവുമെന്ന് കരുതും, അഹങ്കരിക്കും. 

അങ്ങനെ കരുതുന്നതും അഹങ്കരിക്കുന്നതും കൂടി അവൻ്റെ രോഗം.