തന്നെത്തന്നെ സമർത്ഥിച്ചു വിശ്വസിപ്പിക്കുന്ന പണി

ദൈവമേ! 

നീ ഉണ്ടെന്ന് പറയലും 

മറ്റുള്ളവരെ അത് വിശ്വസിപ്പിക്കലുമാണോ 

നിൻെറ ഏറ്റവും വലിയ പണി? 

അല്ല. 

നിന്നെ സംബന്ധിച്ചേടത്തോളം 

ആരുണ്ട് ആ 

മറ്റുളളവരാവാൻ?

ദൈവമേ!

 നീ ഇല്ലെന്ന് പറയലും 

നിഷേധിക്കലുമാണോ 

എൻ്റെ ഏറ്റവും വലിയ പണി? 

അല്ല.

******

ദൈവം ദൈവമാകയാൽ 

ഒന്നിനെയും ആശ്രയിക്കാത്തവൻ. 

അതിനാൽ ദൈവം ഒന്നും 

ചെയ്തു കൊടുക്കേണ്ടാത്തവൻ. 

ദൈവത്തിന് മുകളിൽ 

അവനെ ചോദ്യം ചെയ്യാനും 

അവന് ബോധ്യപ്പെടുത്താനും 

ആരും ഇല്ലായ്കയാൽ 

യഥാർഥത്തിൽ ആർക്കും ഒന്നും 

ചെയ്തു കൊടുക്കേണ്ട 

പണി ഇല്ലാത്തവൻ... 

അതുകൊണ്ട് 

തന്നെത്തന്നെ സമർത്ഥിച്ചു 

വിശ്വസിപ്പിക്കുന്ന പണി 

ദൈവം ചെയ്തു കൊണ്ടിരിക്കും 

എന്നാണോ?

ദൈവത്തിന് തന്നെ

ദൈവത്തിൽ 

സംശയമെന്നോ?

അപൂർണത തോന്നി

ശ്രമിക്കേണ്ട വരുന്നുവെന്നോ?

പച്ച മനുഷ്യനെ പോലെ.

******

ദൈവവിശ്വാസം 

ദൈവത്തിനും 

വലിയൊരു വിഷയമോ?

ദൈവവിശ്വാസം

ശരീരത്തിലും വേഷത്തിലും ഘോഷ്ടിയിലും 

ചിഹ്നങ്ങൾ ആവേണ്ടതുണ്ടോ? 

അങ്ങനെ 

ചിഹനമാക്കുന്നത് തന്നെയല്ലേ 

ബിംബമാക്കുകയെന്നാലും? 

എങ്കിൽ 

അതും ബിംബാരാധന തന്നെയല്ലേ?