ചില മാതാക്കളോടും പിതാക്കളോടും പറയാനുള്ളത്.

 അതേ....

അത്രയേ ഉള്ളൂ...

അത്രയേ സാധിക്കൂ...

അതാണ് ചില മാതാക്കളോടും

പിതാക്കളോടും പറയാനുള്ളത്.

സാധിക്കുന്ന പരിഹാരം 

ഇങ്ങനെയൊക്കെയേ ഉള്ളൂ...

എന്താ ചെയ്യുക...???

ആരുടെ കയ്യിലും 

മാന്ത്രികവടി ഇല്ലല്ലോ?

അപ്പുറത്താണെങ്കിൽ 

എങ്ങിനെ ശ്രദ്ധിച്ചാലും 

പൊളിയുന്ന പാത്രങ്ങളും...

പൊളിയാൻ മാത്രം 

ഒരുങ്ങിയിരിക്കുന്നു 

ചില പാത്രങ്ങൾ.

അവകാശങ്ങൾ മാത്രമുള്ള 

പളുങ്ക്പാത്രങ്ങൾ.

ഉത്തരവാദിത്തം 

ബോധത്തിലും ബോധ്യതയിലും 

ഇല്ലാത്ത പാത്രങ്ങൾ.

നിങൾ ഒരു തെറ്റും ചെയ്യുന്നില്ലെങ്കിലും 

എല്ലാ തെറ്റും ചെയ്യുന്നവരായി മാറും.

 

അങ്ങനെ ചില പാത്രങ്ങൾ 

നിങ്ങളെ ചിത്രീകരിക്കും..

അതാണ് അപ്പുറത്തെ 

പാത്രങ്ങളുടെ പ്രകൃതം.

അതൊട്ടാർക്കും 

അപ്പുറത്ത് ചെന്ന് 

പാത്രങ്ങളെ 

തിരുത്താനും സാധിക്കില്ല.

പാത്രങ്ങൾ നിങ്ങളെ

മുൾമുനയിൽ നിർത്തും. 

അതിനാൽ 

അനുഭവിച്ച് മാത്രം തീർക്കുക.

അതേ പറയാനുള്ളൂ.

അതേയുളളൂ രക്ഷ.

അങ്ങനെയേയുളളൂ രക്ഷ.

അനുഭവിച്ച് മാത്രം തീർക്കുക.

മക്കൾക്ക് വേണ്ടിയെങ്കിലും....

അനുഭവിച്ച് തീർക്കുക.

തളിരിലകൾക്ക് വേണ്ടി

ഉണങ്ങിയ ഇലകൾ

കൊഴിഞ്ഞുവീണ്

വഴികൾ 

ഉണ്ടാക്കിക്കൊടുക്കുന്നത് പോലെ 

അനുഭവിച്ച് തീർക്കുക.

സ്വയം കീറിമുറിഞ്ഞ് 

മക്കൾക്ക് വേണ്ട

വഴിയാവാൻ.

സ്വയം കത്തിയെരിഞ്ഞ് 

മക്കൾക്ക് വേണ്ട

ചൂടും വെളിച്ചവും ആവാൻ.

ഭൂതവും വർത്തമാനവും 

ഭാവിയെ 

ഒരുക്കിക്കൊണ്ടുവരാൻ മാത്രം 

ഉരുകിയും ഉണങ്ങിയും 

വെറും നിഴലുകളായും

വഴിമാറും പോലെ.

മക്കൾക്ക് ഒടിനടക്കാനും 

കളിച്ചുനടക്കാനും

കുളിച്ച് വളരാനും വേണ്ട

പാലങ്ങളും പാളങ്ങളും, പിന്നെ 

സ്വയം കുഴിഞ്ഞ

കുളങ്ങളുമാവാൻ.

അതിന് വേണ്ടിയെങ്കിലും

നിങൾ മാതാവും പിതാവും 

ഒരുമിച്ചല്ലെങ്കിലും

കുറച്ചകന്ന് നിന്നെങ്കിലും, 

പക്ഷേ, സമാന്തരരായെങ്കിലും

ഒരുമിച്ച് നടക്കുക.

അങ്ങനെയുള്ള ഒരു 

പാലവും പാളവും ആവുക.

കുട്ടികൾക്ക് പാറിനടക്കാനുള്ള 

ആകാശമാവാൻ. 

വിശ്വാസപ്രകാരമുള്ള 

ദൈവപ്രീതിക്ക് വേണ്ടിയും 

നിങ്ങളങ്ങനെ

അനുഭവിച്ച് തീർക്കുക...

എല്ലാം ശരിയായി ചെയ്തിട്ടും 

തെറ്റുകാരനാവും വിധം

അനുഭവിച്ച് തീർക്കുക...

എന്നാലും നിങൾ 

തുടർന്ന് ചെയ്യുക.

അപ്പൂപ്പൻ താടി വിത്തുംപേറി

ഒരുറപ്പുമില്ലാതെ

പാറിനടക്കുന്നത് പോലെ.

ഒറ്റക്ക്.

പൊരിവെയിലിൽ.

എന്തിനെന്നോ എവിടേക്കെന്നോ

ഇല്ലാതെ, അറിയാതെ ചെയ്യുക.

എന്നിട്ടും ചെയ്യുന്നത് 

ചെയ്ത്കൊണ്ടിരിക്കുക.

തെറ്റുകാരനായി 

മറുപുറം ചിത്രീകരിക്കും എന്നാകിലും

നിങൾ ചെയ്യുക.

എല്ലാം ശരി ചെയ്തിട്ടും

തെറ്റുകാരനാവുന്നതിനേക്കാൾ 

വേദനിപ്പിക്കുന്ന സംഗതി 

ആർക്കെങ്കിലും വേറെ എന്തുണ്ടാവും...?

പക്ഷേ, 

എന്ത് ചെയ്യാം...?

അതിനാലറിയണം:

മാതാവിനെ കുറിച്ച്

മക്കൾ നല്ലത് ചിന്തിച്ചുപോകുന്നതിൽ  

ആകുലപ്പെടുന്ന പിതാക്കളുണ്ടോ?

അറിയില്ല.

പിതാവിനെ കുറിച്ച്

മക്കൾ നല്ലത് ചിന്തിച്ചുപോകുന്നതിൽ  

ആകുലപ്പെടുന്ന മാതാക്കളുണ്ടോ?

അറിയില്ല.

നശീകരണത്തിന് വേണ്ടി മാത്രം 

ജീവിക്കുന്ന, വളരുന്ന 

ചില മനസ്സുകൾ.

അത്രക്ക് ദുഷിച്ചു പോയിരിക്കുന്നു

ചില മനസ്സുകൾ.