ഉപയോഗക്ഷമതയിൽ നീ അഹങ്കരിക്കേണ്ട.

ഉപയോഗശൂന്യതയാണ് സ്വാതന്ത്ര്യം. 

ഉപയോഗശൂന്യതയിലാണ് സ്വാതന്ത്ര്യം. 

നിനക്കാവും പോലെ നീ ആവുന്നത് ഉപയോഗശൂന്യത, സ്വാതന്ത്ര്യം.

നിനക്ക് വേണ്ടി നീ ജീവിക്കുന്നത് ഉപയോഗശൂന്യത, സ്വാതന്ത്ര്യം. 

ജീവിക്കാൻ വേണ്ടി മാത്രം, ജീവിക്കാനുള്ളതിന് വേണ്ടി മാത്രം ജീവിക്കുന്നത് ഉപയോഗശൂന്യത, സ്വാതന്ത്ര്യം.

നിന്നേക്കൊണ്ട് ഉണ്ടാവേണ്ട ധർമ്മവും ഉപയോഗവും തനിയേ വരും, വരുത്തിക്കൊള്ളും. നീ പോലും അറിയാതെ. മാവിലെ മാങ്ങയും പൂവിലെ മണവും തേനീച്ചയുടെ തേനും പോലെ.

****

ഉപയോഗ ശൂന്യതയിൽ നീ നിന്നെ അറിയുന്നു. ഉപയോഗപരതയിൽ നിന്നെ മറ്റുള്ളവർ അറിയുന്നു. യഥാർഥത്തിൽ നിന്നിൽ ഇല്ലാത്തതും നീ സ്വയം അനുഭവിക്കാത്തതും വെച്ച്.

****

ഉപയോഗക്ഷമതയിൽ അഹങ്കരിക്കേണ്ട.

മറ്റാരുടെയൊക്കെയോ അടിമയും ഉപകരണവും ആവുന്നതാണ്  ഉപയോഗക്ഷമത. 

ആരോ നിർവചിച്ചത് പോലെ, ആരുടെയൊക്കെയോ കല്പന പോലെ ആവുന്നത്  ഉപയോഗക്ഷമത. 

ആ അടിമത്തം നൽകുന്ന ഉപയോഗക്ഷമതക്കുള്ളതാണ്  ശമ്പളവും സ്ഥാനക്കയറ്റവും ആഡംബരവും ഒക്കെ. കുതിരക്കും കഴുതക്കും നീയും കൊടുക്കുന്നു അങ്ങനെ പലതും.

*****