അറിവില്ല, അറിയില്ല എന്ന അറിവ് മാത്രം മുറുകെപ്പിടിച്ച് നടുക്കുക.

രോഗം വന്നാല്‍ മനസിലാവും. നമ്മൾ നമ്മൾക്ക് വേണ്ടി നമ്മളെ കുറിച്ച് പറഞ്ഞുണ്ടാക്കിയതല്ലാതെ ഒരു കുന്തവുമില്ലെന്ന്. 

ശരീരമുണ്ടാക്കുന്ന ബോധത്തിനപ്പുറം ഒരു ബോധം പോലുമില്ല.

******

അറിവില്ല, അറിയില്ല എന്ന അറിവ് മാത്രം മുറുകെപ്പിടിച്ച് നടുക്കുക. 

അതിനാല്‍ ഒന്നിലും മുറുകെപ്പിടിക്കാതെ, എന്നാല്‍ എല്ലാറ്റിലും ചിലത് കണ്ടും കാണിച്ചും.

*******

പ്രണയ വേളയിൽ സ്ത്രീയെ കുറിച്ച് പുരുഷനും പുരുഷനെ കുറിച്ച് സ്ത്രീയും ധരിക്കുന്നതും സങ്കൽപ്പിക്കുന്നതും എത്രമാത്രം ഇല്ലാത്തത്, ഉള്ളുപൊള്ളയായത്!! 

അനാവരണം ചെയ്തുനോക്കൂ. ഉള്ളി പൊളിച്ചത് പോലെയാവും. 

ഉള്ളിലൊന്നും ഇല്ലാതെ. 

ഈ 'ഞാൻ ' തന്നെ എത്രമാത്രം ഇല്ലാത്തത്, ഉള്ളുപൊള്ളയായത്!!

*****

'ഞാൻ ' ഇതാണ്, അതാണ് എന്ന് വരുത്താനുള്ള ശ്രമം ജീവിതം. 

വ്യക്തിത്വം തേടുന്ന വഴിയിൽ ഉണ്ടാവുന്ന വ്യക്തിത്വം. 

അർത്ഥം തേടുന്ന വഴിയിൽ ഉണ്ടാവുന്ന അർത്ഥം, അർത്ഥരാഹിത്യം. 

ഐഡൻ്റിറ്റി അന്വേഷിക്കുന്ന വഴിയിൽ ഉണ്ടാവുന്ന ഐഡൻ്റിറ്റി. 

ഞാൻ എന്താണെന്ന് അന്വേഷിക്കുന്ന വഴിയിൽ ഉണ്ടായി ഇല്ലാതാവുന്ന ഞാൻ. 

ഞാൻ തന്നെ ഇല്ലെന്ന് വരുന്ന, വരുത്തുന്ന ജീവിതം.

*****

കസേരയുടെയും അധികാരത്തിൻ്റെയും വലുപ്പമാണോ എൻ്റെ വലുപ്പം???

എങ്കിൽ കസേരയും അധികാരവും ഇല്ലെങ്കിൽ ഞാൻ???

എൻ്റെ വലുപ്പമാണോ കസേരയുടെയും അധികാരത്തിൻ്റെയും വലുപ്പം???

എങ്കിൽ ഞാൻ ഇല്ലാത്ത കസേരയും അധികാരവും???