ജീവിതം പച്ചയായ ജീവിതം മാത്രം.

'ആയിരിക്കുക' മാത്രം ജീവിതം. 

അല്ലാതെ ജീവിതത്തിന്‌ പ്രത്യേക അര്‍ത്ഥമില്ല. 

എങ്കിലും ജീവിക്കാൻ തന്നെ ജീവിതം നിന്നെ കൊതിപ്പിക്കും, പ്രേരിപ്പിക്കും.

****

കുത്തും കോമയും ചോദ്യചിഹ്നവും: അവ എഴുതുന്നവനും വായിക്കുന്നവനും അര്‍ത്ഥം നല്‍കും. 

ശരി. 

എന്നുവെച്ച് കുത്തിനും കോമക്കും അതെങ്ങനെ തങ്ങളുടെ അര്‍ത്ഥമാവും, ബോധ്യതയാവും?

*****

ആര്, എങ്ങിനെ, എവിടെ വെച്ച്, എപ്പൊൾ പറഞ്ഞാലും , സന്ദർഭവും സാഹചര്യവും ഉണ്ടാക്കുന്ന ഭാഷാ അവതരണ വ്യത്യാസം അല്ലാതെ സത്യത്തിന് വ്യത്യസ്തമായിക്കൂട. 

വായുവും വെള്ളവും വെളിച്ചവും അടിസ്ഥാനമാക്കി ജീവിക്കുന്ന മനുഷ്യന്. 

ഭക്ഷണം കഴിക്കുന്ന മനുഷ്യന്. 

ആ ഭക്ഷണം എത്ര വ്യത്യസ്തമാക്കിയാലും. 

ചപ്പാത്തിയാവാം, ബിസ്കറ്റാവാം, ആ ബിസ്കറ്റ് തന്നെ പാലിലോ ചായയിലോ കുതിർത്തുമാവാം.

*****

ജീവിതം പച്ചയായ ജീവിതം മാത്രം. 

തിന്നുക, കുടിക്കുക, വിസർജിക്കുക, ഉറങ്ങുക. 

അതിനപ്പുറം ഒരു ലക്ഷ്യവുമില്ല. 

വെറും തോന്നലുകളിൽ മാത്രമല്ലാതെ. 

അതിനപ്പുറം എന്തോ നേടാനും സൂക്ഷിക്കാനും ഉണ്ടെന്ന് കരുതി ഗൗരവപ്പെട്ട് മസിൽപിടിക്കുന്നവൻ ഗൗരവപ്പെടുന്നത്ര മസിൽപിടിക്കുന്നത്ര ജീവിതം നഷ്ടപ്പെടുന്നവൻ.