മോക്ഷം തലച്ചോറില്‍നിന്ന്. അറിവ് മോക്ഷത്തെ സഹായിക്കാനല്ല; ജീവിതത്തെ സഹായിക്കാന്‍.

മോക്ഷം തലച്ചോറില്‍നിന്ന്. 

അറിവ് മോക്ഷത്തെ സഹായിക്കാനല്ല; 

ജീവിതത്തെ സഹായിക്കാന്‍. 

അറിവ് ഏറെക്കുറെ ജീവിതത്തിനായ് 

മനുഷ്യന്‍  ഉണ്ടാക്കിയത്.

********

വെറുതെയെന്നത്‌  ബാക്കിയാവും. 

ജീവിതം എന്തെല്ലാം ലക്ഷ്യമുള്ളതെന്ന് 

ദൈവം വെച്ചാലും, 

ദൈവം സൃഷ്ടിച്ചതും, 

ദൈവം തന്നെയും 

വെറുംവെറുതെയാവും.

*******

സ്ത്രീക്ക് സമൂഹവും ദൈവവും അവളിൽ. 

എവിടെയും പോകാതെ പുണ്യവതിയാവാം. 

പുരുഷന് സമൂഹവും ദൈവവും പുറത്ത്. 

ചിന്തിക്കണം, അധ്വാനിക്കണം, ഭയക്കണം.

********

വൃഥാവ്യയം, ആഡംബരം. 

നിര്‍വചനം തെറ്റും.

രണ്ടിലച്ചെടിക്ക് ഒരിലയും പ്രധാനം. 

വൻവൃക്ഷത്തിന് 

നൂറായിരം ഇലകൾ 

ഒരുമിച്ച് പൊഴിക്കുക നിർബന്ധം.

*******

എല്ലാ നാശത്തിനിടയിലും 

വളരുന്ന ചിലരുണ്ട്. 

എല്ലാ വളർച്ചക്കിടയിലും 

നശിക്കുന്ന ചിലരുണ്ട്. 

നാശത്തില്‍ വളർച്ചയും 

വളർച്ചയില്‍ നാശവുമുണ്ട്.

******

കടലിന്റെ ചിത്രം വരക്കാം. 

കടൽവെള്ളം കപ്പില്‍ എടുക്കാം. 

പക്ഷേ നിന്റെ കപ്പിലും ചിത്രത്തിലും 

ഉള്ളത് മാത്രമാണ് കടൽ 

എന്ന് പറയരുത്.

********

കാരണം ഉള്ളത് വെറുപ്പ്, ഇഷ്ടം.

കാരണമില്ലാതെ, വിപരീതമില്ലാതെ, സ്നേഹം.

സ്നേഹിക്കുന്നത് അവനവനെ മാത്രം.

ബാക്കിയെല്ലാം ഇഷ്ടം, വെറുപ്പ്

*******

ബോധോദയം 

ഏതോ കാലത്തുള്ള 

ആരുടെയെങ്കിലും മാത്രം 

സാധ്യതയല്ല. 

എല്ലാ കാലത്തുമുള്ള 

എല്ലാവരുടേയും 

സാധ്യതയാണ്.

**********

രണ്ടാളും ജയിക്കണമെന്ന് വാശിയായാല്‍ 

രണ്ടാളും തോല്‍ക്കുന്ന കളി. 

അത് ദാമ്പത്യം. 

അവിടെ സമനിലയില്ല. 

രണ്ടാളും തോറ്റാലെ 

രണ്ടാളും ജയിക്കൂ.

********

ഒറ്റക്കെടുത്താൽ അക്ഷരവും 

കുത്തും കോമയും അർത്ഥമില്ലാത്തത്.

മുഴുവന്റെയും ഭാഗമായാൽ അവക്കർത്ഥം.

മുഴുവനേയുള്ളൂ. അതിനു വേണ്ട “ഞാനും”.

*********

സ്ത്രീ ശ്രമിക്കാതെ നേടും; 

പുരുഷൻ ശ്രമിച്ചു നഷ്ടപ്പെടും.

അതിനാൽ പുരുഷനു കവിയും ചിന്തകനും 

അധികാരിയും പ്രവാചകനും ആവേണ്ടിവരും.