ജീവിച്ചു തീർക്കുക മാത്രം. അല്ലാതൊരു മോക്ഷമില്ല.

ജീവിച്ചു തീർക്കുക മാത്രം. 

അല്ലാതൊരു മോക്ഷമില്ല. 

മോക്ഷം അന്വേഷിക്കാനും തേടാനുമില്ല. 

മോക്ഷം അന്വേഷിക്കാനും തേടാനുമില്ല എന്നറിയുന്നതും മോക്ഷം.

*****

ചിന്തിച്ചാലും ഇല്ലെങ്കിലും, 

അറിഞ്ഞാലും ഇല്ലെങ്കിലും, 

കണ്ടാലും കണ്ടില്ലെങ്കിലും 

ഉളളത് ഉളളത് തന്നെ, 

വാസ്തവം വാസ്തവം തന്നെ, 

വസ്തുത തന്നെ. 

അറിഞ്ഞില്ല എന്നത്കൊണ്ട് മരിച്ച അമ്മ മരിച്ചതല്ലാതെയാവില്ല. 

കണ്ണടച്ച് കണ്ടില്ലെന്നു വരുത്താം. 

ഇരുട്ട് കൊണ്ട് ഓട്ടയടക്കാം. 

പക്ഷേ അറിവില്ലായ്മയെ അറിവാക്കി, ആ അറിവില്ലായ്മയെ തന്നെ ആയുധമാക്കി  യുദ്ധത്തിൽ തുടരുമെന്ന് മാത്രം. 

ജീവിതമെന്ന യുദ്ധം തുടരുമെന്ന് മാത്രം. 

മരിക്കാതിരിക്കാനുള്ള യുദ്ധത്തിൽ തുടരുമെന്ന് മാത്രം.

സ്വന്തത്തിൽ ബോധ്യപ്പെടുന്ന, 

സ്വന്തത്തെ ബോധ്യപ്പെടുത്താനാവുന്ന 

എന്തിനെന്നില്ലാതെ.

എന്തിനെന്നതിന് ഉത്തരമില്ലാതെ.

*****

ജീവിക്കുമ്പോൾ ജീവിച്ചുകൊണ്ട് തന്നെയുള്ള മോക്ഷം മാത്രം. 

മരണാനന്തരം സംഭവിക്കേണ്ട, നേടേണ്ട മോക്ഷമില്ല. 

ഒന്നും ഒന്നുമല്ലെന്നറിയുന്ന, നീയും ഞാനും ഇല്ലെന്നറിയുന്ന മോക്ഷം മാത്രമേ ഉള്ളൂ. 

മരിച്ചാൽ നീ തന്നെയില്ല. പിന്നെയാണോ മോക്ഷം? 

മരിച്ചാൽ ഏറിയാലുള്ളത് നീയില്ലാതാവുന്ന മോക്ഷം.