മണ്ണിനെ വേര് എങ്ങിനെയും വിവർത്തനം ചെയ്യും?

കാലം കടന്നാൽ, വിഭജനം ഇല്ലാതായാൽ, 

യേശുവിനും ബുദ്ധനും നിന്റെയും എന്റെയും മുഖം.

നിനക്കും എനിക്കും യേശുവിന്റെയും ബുദ്ധന്റെയും മുഖം.

*******

ബാക്ടീരിയെയും ഉറുമ്പിനെയും 

കൊതുകിനെയും കൊല്ലാന്‍ നിനക്കുള്ള എളുപ്പം. 

അത്‌തന്നെ നിന്നെ കൊല്ലാന്‍ പ്രകൃതിക്കും 

നിങ്ങളില്‍ചിലര്‍ക്കും.

******

എന്തിനു ജീവിക്കുന്നു? ഉത്തരം

'ജനിച്ചത് കൊണ്ട് ജീവിക്കുന്നു.

മരിക്കാൻ ഭയമുള്ളതിനാലും’ എന്ന് മാത്രം.

മറ്റുചിലത് മതം പറയിപ്പിച്ചാലും.

********

മണ്ണിനെ വേര് എങ്ങിനെയും വിവർത്തനം ചെയ്യും.

പൂക്കളും പഴങ്ങളും അനവധിയാവുന്നതങ്ങിനെ.

വിവർത്തന-ആവിഷ്കാര സ്വാതന്ത്ര്യം.

********

അശക്തന്റെ അഹിംസയിലും പഞ്ചാരവാക്കിലും 

ഫാസിസം ഇല്ലെങ്കിൽ, അതിനു കാരണം 

നിസ്സഹായതയും പേടിയും. 

അതൊരു നിലപാടോ സ്ഥായിയായ പ്രകൃതമോ അല്ല.

*******

അസ്വസ്ഥപ്പെടുത്തുന്നതും പേടിപ്പിക്കുന്നതും ദൈവമല്ല;

പകരം ദൈവത്തെ അറിയാതെ പറയുന്നവരാണ്. മതങ്ങളാണ്.

*********

പുരുഷവികാരം എത്ര പൊള്ള? 

എന്നിട്ടും ബലാല്‍സംഗം ചെയ്യുന്നു. 

സ്ത്രീ ധരിക്കുന്നത് പുരുഷന് കാര്യമായെന്തോ 

ലൈംഗീകതയിലുണ്ടെന്ന്. 

വെറുംകെണി.

*******

സ്വീകാര്യത കിട്ടുമ്പോള്‍, 

സ്വീകാര്യത തന്നവര്‍ക്കെതിരെ 

സത്യങ്ങൾ പറയാൻ കഴിയാതെ വരും. 

അത്തരം സ്വാധീനങ്ങളാണ് 

യാഥാര്‍ത്ഥ വെല്ലുവിളി.

*******