ഇന്ന് പിറന്ന നാൾ. ജീവിതം കൊണ്ട് ജീവിതം വരച്ചുകാട്ടിയവൾക്ക്.

ജീവിതം കൊണ്ട് ജീവിതം 

വരച്ചുകാട്ടിയവൾക്ക് 

ഇന്ന് പിറന്ന നാൾ.

പൂർണത തേടുന്നവൾക്ക്,

ആ പൂർണത തേടിനേടുന്ന വഴിയിൽ

വിട്ടുവീഴ്ചക്കും 

വരുത്തിത്തീർക്കലുകൾക്കും നിൽക്കാത്തവൾക്ക് 

ഇന്ന് പിറന്ന നാൾ.

നെല്ലിപ്പടിയിൽ നിന്ന് ജീവിതത്തെ 

കണ്ട് കൊണ്ടുനടക്കുന്നവൾക്ക്

ഇന്ന് പിറന്ന നാൾ.

വീഴ്ചപറ്റാൻ ഒരിക്കലും

ഉയരത്തിൽ നിൽക്കാത്തവൾക്ക്

ഇന്ന് പിറന്ന നാൾ.

പുതുമ തേടുകയും 

ആ തേടുന്ന പുതുമ 

താൻ തന്നെയാവുന്നവൾക്ക്

ഇന്ന് പിറന്ന നാൾ.

അങ്ങനെ പുതിയതായി മാത്രമൊഴുകി 

ഒഴുക്ക് തന്നേയായവൾക്ക്

ഇന്ന് പിറന്ന നാൾ.

ചെറുതായി വലുതായവൾക്ക്,

ചെറുതാവുന്നതിൽ

വലുപ്പം കണ്ടെത്തിയവൾക്ക്,

ചെറുതാണ് വലുതെന്ന്

ഓതിത്തന്നവൾക്ക് 

ഇന്ന് പിറന്ന നാൾ.

അപ്രസ്കതയാവുന്നതിൽ 

പ്രസക്തി കണ്ടെത്തിയവൾക്ക്,

ആ വഴിയിൽ ആരോരും ഒന്നും ചെയ്യാനില്ലെന്നറിഞ്ഞവൾക്ക്, 

അങ്ങനെയതിൽ 

സ്വാതന്ത്ര്യം നേടിയവൾക്ക്

ഇന്ന് പിറന്ന നാൾ.

പൂർണത തേടിത്തന്നെ, പക്ഷേ 

അപൂർണതയിൽ നിന്ന്

അപൂർണതയിലേക്കുള്ള നടപ്പ്

ജീവിതമെന്നറിയിച്ചുതന്നവൾക്ക്

ഇന്ന് പിറന്ന നാൾ.

ശൈശവം വെറും ബലഹീനത.

വാർദ്ധക്യം വേറൊരു ബലഹീനത.

ശൈശവത്തിനും 

വാർദ്ധക്യത്തിനുമിടയിൽ 

ബലഹീനതയെ 

ബലമാക്കി മാറ്റാൻ ശ്രമിക്കുന്നത്

ജീവിതമെന്നറിയിച്ചുതന്നവൾക്ക് 

ഇന്ന് പിറന്ന നാൾ.

താനല്ലാതെ താൻ വന്നു,

പിന്നീടെങ്ങിനെയോ താനായി, 

പൊടുന്നനെ വീണ്ടും 

താനല്ലാതെയാവുന്ന യാത്രയെ 

ജീവിതമെന്ന് വിളിച്ചവൾക്ക് 

ഇന്ന് പിറന്ന നാൾ.

ഉയരം താഴ്ചയെന്നും

നാശം വളർച്ചയെന്നും

വെളിച്ചത്തിൽ ഇരുട്ടുണ്ടെന്നും

അറിയിച്ചുതന്നവൾക്ക് 

ഇന്ന് പിറന്ന നാൾ.

മണ്ണായി നിന്ന് പെണ്ണായി,

പെണ്ണായി നിന്ന് പൂവായി

മണ്ണിനും പൂവിനുമിടയിലെ 

ദൂരം ജീവിതമായിക്കണ്ടവൾക്ക്

ഇന്ന് പിറന്ന നാൾ.

കണ്ണും കാഴ്ചയും ഒന്നാവുന്നത്

ഒരു സാധാരണ സംഭവമാക്കിയവൾക്ക്

ഇന്ന് പിറന്ന നാൾ.

പേടിയിൽ ജീവിതത്തെ 

പൂട്ടിനിർത്തി,

ആ പേടിയെ പെട്ടകമാക്കി,

ആ പെട്ടകത്തിനുള്ളിൽ ജീവിതത്തെ 

സംരക്ഷിച്ച് വളർത്തുന്നത് രീതിയാക്കി, 

അത് ജീവിതത്തിൻ്റെയും രീതിയെന്ന്

ചിത്രം വരച്ചുകാണിക്കുന്നത് പോലെ

കാണിച്ചുതന്നവൾക്ക്

ഇന്ന് പിറന്ന നാൾ.

ജീവിതം ഒരു പട്ടം പൊലെ 

എന്നവൾ തറപ്പിച്ചു പറയുന്നുണ്ട്.

സ്വയം നിയന്ത്രണമില്ലാതെ ജീവിതം.

സ്വന്തമായ തീരുമാനമല്ലാതെ ജീവിതം.

വെറുതെയങ്ങനെ പട്ടം കണക്കേ 

പൊങ്ങിപ്പാറി നടക്കുന്നു ജീവിതം.

പക്ഷേ ആ പാട്ടത്തിൻ്റെ നൂലും 

ആ നൂല് പിടിച്ച വിരലും 

എവിടെയെന്ന് മാത്രമറിയാത്തവൾക്ക്

ഇന്ന് പിറന്ന നാൾ.

കുറ്റബോധം പേറാനില്ലാത്തത് ജീവിതം.

കുറ്റപ്പെടുത്തൽ കേൾക്കാൻ 

കൊതിക്കാത്തത് ജീവിതം.

കല്പനകളെ വെറുക്കുന്നത് ജീവിതം.

അങ്ങനെയൊരു ജീവിതം 

പേറിനടക്കുന്നവൾക്ക്

ഇന്ന് പിറന്ന നാൾ.

എന്നാലും പറയട്ടെ.

ഇവൾ ജനിച്ചത്

ഈയുള്ളവൻ്റെ ഭാര്യയായല്ല, 

ഈയുള്ളവൻ്റെ ഭാര്യയാവാൻ മാത്രമല്ല.

ഇവൾ ജനിച്ചത്

ഇവളായി മാത്രം.

ഒരുപക്ഷേ, ഇവൾ ജനിച്ചത്

ഇവളായി പോലുമല്ലാതെ.

അതുകൊണ്ട് തന്നെയിനിയുമിവൾ

ഇവൾ തന്നെയായി മാത്രം ജീവിക്കും

ഇവൾ പോലുമല്ലാതെയും ജീവിക്കും.