കെ. വിദ്യ. പാപം ചെയ്യാത്തവർ തന്നെയോ കല്ലെറിയുന്നത്?

കെ. വിദ്യ. 

പാപം ചെയ്യാത്തവർ തന്നെയോ കല്ലെറിയുന്നത്?

ഇത്രയധികം ഭീകരമായി വേട്ടയാടപ്പെടാൻ മാത്രം എന്ത് വലിയ തെറ്റാണ് വിദ്യ ചെയ്തത്? 

മനസ്സിലാവുന്നില്ല.

അതും കളവ് മാത്രം ചെയ്ത്, കള്ളന് കഞ്ഞിവെച്ചുകൊടുത്ത്, ചൂട്ട പിടിച്ചുകൊടുത്ത് മാത്രം അധികാരം നേടുകയും കയ്യാളുകയും ചെയ്യുന്ന നാട്ടിൽ.... 

വിദ്യയുടെത് തെറ്റ് തന്നെ. 

പക്ഷേ, ഇത്രക്ക് ഭീകരമായി വേട്ടയാടപ്പെടാൻ മാത്രം ഭീകരമായതാണോ അത്?

നമ്മൾ പൊടിപടലത്തെ പിടിച്ച് മലയാക്കുന്നുവോ എന്ന് സംശയിച്ചു പോകുന്നു. 

ആ വഴിയിൽ നമ്മൾ യഥാർത്ഥ മലയെ കാണാതെയും പോകുന്നുവോ എന്നും സംശയിച്ചു പോകുന്നു. 

ഇല്ലാത്ത എക്സ്പീരിയൻസ് (അനുഭവ പരിചയ സർട്ടിഫിക്കറ്റ്) ഉണ്ടെന്ന് പറഞ്ഞു.  തെറ്റാണ്. 

അതാണ് വിദ്യ ചെയ്ത ഏറ്റവും ഭീകരമായതെന്ന് നാം പറഞ്ഞ് പ്രചരിപ്പിക്കുന്ന തെറ്റ്. 

ശരിയാണ്.

പക്ഷേ, വിദ്യയ്ക്ക് ഒരു ജോലി നേടാൻ വേണ്ടത്ര വിദ്യാഭ്യാസ യോഗ്യത ഇല്ലെന്ന് ആരും പറയുന്നില്ല. 

വിദ്യാഭ്യാസ കാര്യത്തിൽ വിദ്യ മിടുക്കി തന്നെയായിരുന്നുവെന്ന് എല്ലാവരും ഒരുപോലെ സമ്മതിക്കുന്നു. 

വിദ്യ കാണിക്കുന്ന, വിദ്യക്കുണ്ടെന്ന് പറയുന്ന   വിദ്യാഭ്യാസ യോഗ്യതകൾ മുഴുവൻ ശരിയായതും അതിലൊക്കെ വിദ്യ ഏറെക്കുറെ റാങ്കോടെ പാസായ ആളാണെന്നും എല്ലാവരും ഒരുപോലെ സമ്മതിക്കുന്നു.

പിന്നെ, Experience എന്ന അനുഭവ പരിചയ സർട്ടിഫിക്കറ്റുകളുടെ കാരൃം.

എത്രയധികം ആളുകൾ ഇങ്ങനെ ഇല്ലാത്ത അനുഭവ പരിചയ സർട്ടിഫിക്കറ്റുകൾ ഉണ്ടാക്കി ഇതിനകം കാണിച്ചിട്ടുണ്ട്, ജോലി നേടിയിട്ടുണ്ട്.

അനുഭവ പരിചയ സർട്ടിഫിക്കറ്റുകൾ പോട്ടെ, വിദ്യാഭാസ യോഗ്യത സർട്ടിഫിക്കറ്റുകൾ പോലും ഇല്ലാത്തത് ഉണ്ടാക്കി കാണിച്ച ഒട്ടനവധി പേരെ ഈയുള്ളവന് വിദേശത്ത് വെച്ചറിയാം.

വിദേശത്ത് ജോലി ചെയ്യുന്ന എത്ര ഇന്ത്യക്കാർ ഇങ്ങനെ അവിടങ്ങളിൽ ജോലി കിട്ടാൻ  വേണ്ടി മാത്രം ഇല്ലാത്ത സർട്ടിഫിക്കറ്റുകൾ ഉണ്ടാക്കി കാണിച്ചിരിക്കുന്നു? 

ഇല്ലാത്ത സർട്ടിഫിക്കറ്റുകൾ ഉണ്ടെന്ന് കാണിച്ച് ജോലി നേടിയ രണ്ട് പേരെ ഈയുള്ളവൻ നേരിട്ട് പിടിച്ചിട്ടുണ്ട്. 

ഈയുള്ളവൻ ജോലി ചെയ്തിരുന്ന ഒരു ബാങ്കിൽ നിന്നും മറ്റൊരു Leasing and Financing സ്ഥാപനത്തിൽ നിന്നും. 

ഓർക്കണം, നമ്മുടെ പ്രധാന മന്ത്രിക്കും ഉണ്ടെന്ന് പറഞ്ഞ സർട്ടിഫിക്കേറ്റ് ഇതുവരെ കാണിക്കാൻ സാധിച്ചിട്ടില്ല. 

നമ്മുടെ ആഭ്യന്തര മന്ത്രി പ്രധാനമന്ത്രിയുടെതെന്ന് പറഞ്ഞ് കാണിച്ച സർട്ടിഫിക്കറ്റ് വിശ്വാസയോഗ്യമായി ആർക്കും തോന്നിയിട്ടില്ല. 

പ്രധാനമന്ത്രിയുടെ കൂടെ പഠിച്ച ഒരാളെയും ഇതുവരെ കിട്ടിയിട്ടില്ല. 

പ്രധാനമന്ത്രിക്ക് ഉണ്ടെന്ന് പറയുന്ന സർട്ടിഫിക്കറ്റിൽ ഉപയോഗിച്ച ഫോണ്ട് (അക്ഷര രൂപം) പോലും, പ്രധാനമന്ത്രി നടത്തിയെന്ന് പറയുന്ന പഠനകാലത്ത് നിലവിൽ വന്ന ഫോണ്ടല്ല.

ഒരു കേന്ദ്രമന്ത്രിയുടെ മേലും അവരുടെ വിദ്യാഭ്യാസ സർട്ടിഫിക്കറ്റിനെ സംബന്ധിച്ചും ഇതേ സംശയവും ആരോപണവും ഉണ്ടെന്നത് മറക്കരുത്.

പക്ഷേ, അപ്പോഴൊന്നും ആർക്കും ഇല്ലാത്ത പ്രതിഷേധവും ഭീകരമായ വേട്ടയാടലും ഇത്രയെല്ലാം വിദ്യാഭ്യാസ യോഗ്യതയുള്ള ഈയൊരു പെൺകുട്ടിയുടെ മേൽ മാത്രം ഉണ്ടാവുന്നത് ആനുപാതികമാണോ? നീതിയുക്തിമാണോ? 

പാപം ചെയ്യാത്തവർ തന്നെയോ കല്ലെറിയുന്നത്?

മലയെ മറന്ന് നമ്മൾ പൊടിപടലത്തെ പിന്തുടരുകയോ?