സമയത്തിൻ്റെ ലാഭവും നഷ്ടവും നിശ്ചയിക്കുന്നത് എന്ത്, ആര്?

ഒരു വാക്കിൻ്റെ അർത്ഥമാണ് ആ വാക്കിൻ്റെ അഹങ്കാരം. 

ഞാൻ എന്നതിൻ്റെ, ആ വാക്കിൻ്റെ അർത്ഥം എൻ്റെ അഹങ്കാരം. 

ഏത് വാക്കിൻ്റെയും അർത്ഥം അതു ഉച്ചരിച്ചവൻ്റെ ഉദ്ദേശം, അഹങ്കാരം.

****

വേരുകളിൽ നിന്ന് വളർന്ന പൂവിനെ കുറിച്ച് ചിന്തിക്കുമ്പോൾ തന്നെ വേരിനെ തിരയണം. 

കാരണം അടിത്തറയില്ലാതെ ഒരു കൊട്ടാരവും പണിയില്ല.

****

എല്ലാം താൽക്കാലികമായ ഒരുക്കൂട്ടുകൾ മാത്രം.  

താൽക്കാലികമായ ഒരുക്കൂട്ടുകൾ ഉണ്ടാക്കുന്ന ഞാൻ മാത്രം. 

അല്ലാത്ത ഞാനില്ല. 

അല്ലാത്ത ഒന്നുമില്ല.

*****

മറ്റാരേക്കാളും ശക്തമായി ദൈവത്തെ നിഷേധിക്കുന്നു ഈയുള്ളവൻ. 

അതേസമയം മറ്റാരേക്കാളും ശക്തമായി ദൈവത്തിൽ വിശ്വസിക്കുന്നു ഈയുള്ളവൻ.

*****

എൻ്റെതൊന്നും എൻ്റേതല്ലെങ്കിൽ, 

ഞാൻ തന്നെയും എൻ്റേതല്ലെങ്കിൽ, 

പിന്നെ എൻ്റെതെന്ന് തോന്നുന്ന, 

ഞാൻ എന്നെ സമർത്ഥിക്കാനും 

സ്ഥാപിക്കാനും കാണിക്കുന്ന 

അഹങ്കാരം ആരുടേതാണ്? 

ആർക്ക് വേണ്ടിയാണ്?

ഞാനും എൻ്റേതും 

ആരുടെയോ എന്തിൻ്റെയോ 

സമ്മാനമാണെങ്കിൽ, 

അതിൻ്റെ വലുപ്പം 

അത് തന്നവൻ്റെതാണ്.

അത് സംഭവിപ്പിച്ചവൻ്റെതാണ്.

****

ദൈവത്തിൽ വിശ്വസിക്കാത്തവൻ 

പിന്നെന്തിന് സമയത്തിൽ, 

അഥവാ സമയത്തിൻ്റെ നഷ്ടത്തിലും ലാഭത്തിലും 

വിശ്വസിക്കണം, വ്യാകുലപ്പെടണം? 

സമയം കൊണ്ട് എന്ത് നേടാൻ, 

എന്ത് നഷ്ടമാകാൻ?

സമയത്തിൻ്റെയും അല്ലാതെയുമുള്ള 

ലാഭവും നഷ്ടവും നിശ്ചയിക്കുന്നത് എന്ത്, ആര്?

*****

ഭൂരിപക്ഷം ആ ഒരു തുണിയും വെച്ച് നടക്കുന്നത് കൊണ്ട് അവരുടെ ആ തുണി വെച്ച് തന്നെ തുന്നിക്കൊടുക്കുന്നു എന്ന് മാത്രം. 

അവർക്ക് മനസ്സിലാവുന്ന അതേ വാക്ക് ഉപയോഗിക്കുന്നു എന്ന് മാത്രം. 

അതല്ലെങ്കിൽ ഇല്ലെന്നും ഉണ്ടെന്നും പറയുന്നതിന് ഒരേ അർത്ഥം. 

ഉള്ളതെന്തോ അതുണ്ട്. 

ഇല്ലാത്തതെന്തോ അതില്ല.

*****