താൻ മാത്രം വലുതാണെന്നന്ന് എപ്പോഴും വിളിച്ച് പറയേണ്ടി വരിക....!!!

ദൈവത്തിന് മതമില്ല. 

മതം പറയുന്നത് പോലുള്ള  ദൈവമില്ല. 

മതം പറയുന്നത് പോലെയല്ല ഉണ്ടെങ്കിൽ ഉള്ള ദൈവം. 

മതം ദൈവത്തെ ചുരുക്കുന്നു. 

ചുരുങ്ങിയ ദൈവം പിശാചാകുന്നു, വിഭജനവും വെറുപ്പുമുണ്ടാക്കുന്നു.

******

ദൈവത്തിന് പറയേണ്ടി വരികയോ? 

അതും ദൈവത്തിന്!!!! 

ഏതോ കാലത്ത്, ഏതോ ഭാഷയിൽ മാത്രം? 

അതും ഈ ചെറിയ മനുഷ്യനോട്. 

എന്നിട്ട് തോറ്റുപോവുക. 

****

ദൈവം തിരുത്തുകയോ? 

അതും ഈ ചെറിയ മനുഷ്യനെ. 

ദൈവവും ദൈവത്തിൻ്റെ നിനവും മാത്രം ലോകവും ലോകത്തുള്ളതും?

അല്ലാത്തതൊന്നും ഇല്ല. 

എന്നിട്ടും പിന്നെ?

****

ദൈവം ഉദ്ദേശിക്കുന്നത് മാത്രം നടക്കുന്ന ലോകത്ത്, 

ദൈവം ഉദ്ദേശിക്കുന്നതല്ലാത്ത ഒന്നും നടക്കാത്ത ലോകത്ത് 

(മാ ഷാ അല്ലാഹു കാൻ, വ മാലം യഷാ ലം യക്കുൻ) 

വീണ്ടും വീണ്ടും ഞാണെനെന്ന് പറയേണ്ടി വരികയോ?

അങ്ങനെ ദൈവം മാത്രം ശരിക്കുമുള്ള ദൈവത്തിന്, ദൈവമല്ലാത്ത വേറൊരാളും ശക്തിയും യഥാർഥത്തിൽ ഇല്ലാത്ത ദൈവത്തിന്, 

വീണ്ടും വീണ്ടും തിരുത്തേണ്ടി വരികയോ? 

എന്നിട്ട് ആ തിരുത്ത് നടക്കാതിരിക്കുകയോ?

ദൈവം പരാജയപ്പെടുകയോ? 

*****

അല്ലെങ്കിലും, 

എവിടെയും നിലക്കാത്ത, 

എപ്പോഴും തുടർന്ന്കൊണ്ടിരിക്കുന്ന, 

ഒരു പ്രത്യേക ഗ്രന്ഥത്തിലും വ്യക്തിയിലും 

ഭാഷയിലും കാലത്തിലും 

ചുരുങ്ങാത്ത, അവസാനിക്കാത്ത 

തിരുത്തും ഇടപെടലും 

കളിയും കാര്യവും

തന്നെയാവണ്ടേ ദൈവം?

ആരും പറയാത്ത, 

ആർക്കും പറയാനും ചുരുക്കാനും 

സാധിക്കാത്ത ദൈവം. 

******

ഈ കാലമത്രയും ദൈവവും, 

പിന്നെ സ്വർഗ്ഗം കിട്ടാൻ കൂടെ കൂടിയ 

പ്രചാരകരും പ്രബോധകരും 

പുരോഹിതരും വ്യാഖ്യാതാക്കളും കൂടി 

പ്രയത്നിച്ചിട്ട് മനുഷ്യന് 

മാർഗ്ഗനിർദ്ദേശം കിട്ടിയോ? 

ഭൂരിപക്ഷവും എക്കാലവും പുറത്ത് തന്നെയാണല്ലോ?

******

ഇനി, മാർഗ്ഗനിർദേശം കിട്ടിയെന്ന് പറയപ്പെടുന്ന ഭൂരിപക്ഷം വിശ്വാസികൾ പോലും പേര് കൊണ്ടും ജന്മം കൊണ്ടും മാത്രം. 

അവരിലും എത്ര ശതമാനമുണ്ടാവും മാർഗ്ഗനിർദേശം കിട്ടിയവർ? 

നിങൾ പറയുന്ന ദൈവം ശരിക്കും പരാജയപ്പെടുകയല്ലേ?

*****

ജനങ്ങളെ സൃഷ്ടിച്ച ദൈവം എത്ര ശ്രമിച്ചിട്ടും ജനങ്ങളുടെ മുൻപിൽ പരാജയപ്പെടുകയോ? 

മതപ്രവാചകരും പ്രബോധകരും പുരോഹിതരും ഒരുപോലെ പറഞ്ഞുവരുന്നത് അതല്ലേ, അങ്ങനെയല്ലേ? 

*****

ഈഗോയുടെ മൊത്തക്കച്ചവട കേന്ദ്രമാണ് ദൈവം എന്നർത്ഥം, അല്ലേ?

താൻ മാത്രം വലുതാണെന്നന്ന് എപ്പോഴും വിളിച്ച് പറയേണ്ടി വരുന്നത്ര അല്പനായ ഈഗോയുടെ മൊത്തക്കച്ചവട കേന്ദ്രം.

താനല്ലാത്തവർ, തൻ്റെ തന്നെ സൃഷ്ടികൾ പോലും, വലുതായിപ്പോകുമോ എന്നതിൽ വല്ലാത്ത പേടിയുള്ളവൻ ദൈവം.

മതം പരിചയപ്പെടുത്തുന്ന ദൈവം.

*****

നമ്മെപ്പോലെ hurt ആവുന്നവനാണ് ദൈവമെങ്കിൽ..., 

എല്ലാ ദൈവസങ്കല്പങ്ങളും ശരിയാണെന്ന് പറയണം. 

എല്ലാവരും ദൈവവും ഒരുപോലെ എന്ന്. 

മറിച്ച് പറഞ്ഞാൽ, കല്ലും തൂണും പശുവും ആടും എലിയും പൂച്ചയും നീയും ഒക്കെ ദൈവംമെന്ന്. 

എല്ലാറ്റിലും, പിന്നെ ഏത് ബിംബത്തിലും ദൈവത്തെ കാണണമെന്ന്.

*****

ആപേക്ഷിക മാനത്തിൽ എല്ലാ വികാരവിചാരങ്ങളും ഉള്ള, നമ്മുടേത് പോലെ തന്നെ തലച്ചോറുള്ള അല്പനായ ഏകദൈവം

മതം പരിചയപ്പെടുത്തുന്ന ദൈവം.

******

ദൈവമല്ലാത്തതിനെ ആരാധിച്ചാൽ, ദൈവത്തെ നിഷേധിച്ചാൽ ദൈവത്തിനെന്ത് നഷ്ടം? 

എന്തെങ്കിലും നഷ്ടപ്പെടുന്നവനോ ദൈവം? 

അതെങ്ങിനെ ഏറ്റവും വലിയ ശിക്ഷ നൽകേണ്ട, ഒരിക്കലും പൊറുക്കാത്ത പാപമാവുന്നത്? 

ഏത് ആരാധിക്കുന്നവനും തൻ്റെ പരിധിക്കുള്ളിലെ അറിവനുസരിച്ച ദൈവത്തെയാണ് ആരാധിക്കുന്നത്.

ഏത് നിഷേധിക്കുന്നവനും തൻ്റെ പരിധിക്കുള്ളിലെ അറിവനുസരിച്ചാണ് നിഷേധിക്കുന്നത്.

അറിയാത്തത് വെച്ച്, ആരോ എന്തോ പറഞ്ഞത് വെച്ച്, എന്തെങ്കിലും ചെയ്യാൻ ആരോടും ഒരു ദൈവത്തിനും ആവശ്യപ്പെട്ടു കൂടല്ലോ, നിർബന്ധിച്ചു കൂടല്ലോ?

******

നമുക്ക് പിടികിട്ടാത്ത കാര്യമാണ്. 

പക്ഷേ പിടികിട്ടാത്ത കാര്യമാണ് എന്ന് ദൈവത്തിനും അറിയില്ലേ?

പിന്നെന്തിനാണ്, പിടികിട്ടാത്ത കാര്യത്തിൻ്റെ പേരിൽ മനുഷ്യനെ തിരുത്താനുള്ള ശ്രമവും നരക ഭീഷണിയും ഒക്കെ? 

പിടികിട്ടിച്ചു കൊടുത്താൽ മാത്രം പോരേ? 

ദൈവമല്ലേ? 

വിചാരിച്ചാൽ നടക്കുമല്ലോ?

അതല്ലേൽ ദൈവം മനുഷ്യനെ പോലെ ആവുകയാണോ? 

അതുമല്ലെങ്കിൽ മതം പരിചയപ്പെടുത്തുന്ന ദൈവം മാത്രം മനുഷ്യനെ പോലെ ആവുകയാണോ?

ഈ 1400 കൊല്ലം പിറകിലേക്ക് മാത്രം കയർ കെട്ടിവെച്ച ഒരു മതത്തിൻ്റെ അബദ്ധങ്ങളെ ഇങ്ങനെയും വ്യാഖ്യാനിച്ച് ന്യായീകരിക്കേണ്ടതുണ്ടോ? 

മതത്തെ നിഷേധിച്ച് ദൈവത്തെ കൊണ്ടുനടന്നാൽ പോരേ...?

******

മനുഷ്യൻ ദൈവത്തിൻ്റെ ഭൂമിയിലെ പ്രതിനിധി ആണ്, ആവണം പോൽ.

എന്നിട്ട് അതും നടക്കാത്ത കോലത്തിൽ പരാജയപ്പെടുകയോ?

ദൈവത്തിന് നേരിട്ട് കാര്യങ്ങൾ ചെയ്യാൻ കഴിയാത്തത് കൊണ്ടാണോ?

പലരും എന്തൊക്കെയോ എവിടെയൊക്കെയോ കേട്ടതും വായിച്ചതും അപ്പടിയേ പറയുന്നു. 

ജമാഅത്തെ ഇസ്ലാമിക്കാർ കാലാകാലമായി പറയുന്നത് അപ്പടി പലരും ഇപ്പോൽൾ പറയുന്നു. (ഇന്നീ ജാഇലും ഫിൽ അർളി ഖലീഫാ) എന്ന സൂക്തം പിടിച്ചുള്ള വ്യാഖ്യാനം.

മനുഷ്യൻ പ്രതിനിധിയാവാൻ ദൈവം തീരുമാനിച്ചാൽ ആവാതിരിക്കാൻ കഴിയില്ലല്ലോ? 

സ്വാഭാവികമായും ആവുമല്ലോ? 

മനുഷ്യൻ മുഴുവനും തന്നെ സ്വാഭാവികമായി പ്രതിനിധി ആവുകയല്ലേ? ആവുമല്ലോ?

ആരെങ്കിലും എപ്പോഴെങ്കിലും കൃത്രിമമായി ശ്രമിച്ച് ആവുന്നതല്ലല്ലോ പ്രതിനിധി? 

******

മതേതരത്വവും സഹിഷ്ണുതയും പുറംപൂച്ചിന് പറയുന്ന മതതീവ്രവാദിയുടെ ഉള്ളിലെ അസഹിഷ്ണുത എങ്ങനെ വെളിപ്പെടും? 

അവൻ ആരെയെല്ലാം സഹിച്ചാലും, സ്വസമുദായത്തിൽ നിന്നുള്ള വേറിട്ട ചിന്താഗതിക്കരനെ സഹിക്കില്ല. 

ബന്ധുവായാലും സുഹൃത്തായാലും അയൽവാസിയായാലും, വീട്കൂടലിനും മക്കളുടെ കല്യാണത്തിനും വരെ വേറിട്ട് ചിന്തിക്കുന്നവനെ അവഗണിക്കും.

അവൻ കണ്ടില്ലെന്ന് നടിച്ച് തമാസ്കരിക്കും, അങ്ങനെ തമസ്കരിക്കാൻ മറ്റുള്ളവരോട് ആവശ്യപ്പെടും