സ്വാതന്ത്ര്യം ധീരന് പറഞ്ഞത്.

സ്വന്തം കാലിൽ നിൽക്കാൻ പ്രാപ്തിയില്ലാതെ സ്വാതന്ത്ര്യം പറയുക. 

ഉപബോധമനസ്സിൻ്റെ തടവറയിലായിരിക്കെ വിപ്ലവം നാക്ക്കൊണ്ട് മാത്രം പറയുക. 

കുട്ടിപ്രായത്തിൽ ശീലാമാക്കി കയറ്റിവെച്ചതിൽ രൂപപ്പെട്ട വിശ്വാസങ്ങളും ആചാരങ്ങളും അവയുടെ കലവറയായ ഉപബോധമനസും കൊണ്ടുനടക്കുക. 

അങ്ങനെ വാർദ്ധക്യം വരെ തടവിലായി ഒരു മാറ്റവുമില്ലാതെ കരഞ്ഞ് തുടരുക.

*****

സ്വാതന്ത്ര്യം ധീരന് പറഞ്ഞത്. 

നിരാശ്രയനായി നിൽക്കുന്ന, 

നിരാശ്രയത്വം ആഗ്രഹിക്കുന്ന, 

ഉത്തരവാദിത്തങ്ങൾ ഏറ്റെടുക്കുന്ന 

ആൾക്ക് പറഞ്ഞത്. 

അതുകൊണ്ട് കൂടിയാവണം 

സ്വാതന്ത്ര്യത്തിന് 

ഫ്രീഡം പോരാഞ്ഞ് 

ഇൻഡിപെൻഡൻസ് എന്ന് കൂടി 

വാക്കുള്ളത്. 

സ്വാതന്ത്ര്യം ഭീരുവിന് പറഞ്ഞതല്ല. 

ആശ്രയിച്ച് നിൽക്കുന്ന, 

ആശ്രയിക്കാൻ മാത്രം ആഗ്രഹിക്കുന്ന, 

ഉത്തരവാദിത്തം ഏറ്റെടുക്കാത്ത 

ആൾക്ക് പറഞ്ഞതല്ല.

*****

ആണായി, പെണ്ണായി. 

അതുകൊണ്ടെന്ത് കാര്യം? 

ഒരു കാര്യവുമില്ല. 

ആയത് കൊണ്ടായി. 

അതുകൊണ്ടങ്ങ് കൊണ്ടുനടക്കുക മാത്രം. 

കിട്ടിയത് വിദ്യയും വഴിയുമാക്കിക്കൊണ്ട്.

*****

അടിമത്തം മഹാഭൂരപക്ഷവും 

ഇഷ്ടപ്പെടുന്നു, തെരഞ്ഞെടുക്കുന്നു.

ലഹരി പോലെ.

ഭക്തി പോലെ. 

ആ അടിമത്തം

ശാരീരികമായയാലും ആത്മീയമായായാലും

അവർ

സ്വാതന്ത്ര്യമെന്ന നല്ല പേര് വിളിച്ച് 

അടിമത്തം കൊണ്ടുനടക്കും.

 

എന്തുകൊണ്ട്?

ഉത്തരവാദിത്വവും ബാധ്യതയും 

അതിൻ്റെ അനിശ്ചിതത്വവും അരക്ഷിത്ത്വവും

അടിമത്തത്തിൽ ഇല്ല.

*****

രാജ്യത്തിനല്ല; ഓരോ വ്യക്തിക്കും സ്വാതന്ത്ര്യം കിട്ടണം. 

പുറത്ത് നിന്ന് മാത്രമല്ല; ഉളളിൽ നിന്ന് കൂടി. 

സ്വാതന്ത്ര്യമെന്നത് അന്നവും പാർപ്പിടവും പ്രശ്നമാകാത്ത അവസ്ഥ കൂടിയാണ്. രോഗം ബാധിക്കാത്ത അവസ്ഥയും.

*****

ആരാൻ്റെ ചിലവിൽ, ആരാൻ്റെ ചിന്തയിൽ, ആരാൻ്റെ അധ്വാനത്തിൽ നിൻ്റെ സ്വാതന്ത്ര്യം നടക്കില്ല. 

സ്വാതന്ത്ര്യം മാത്രമില്ല. 

ഉത്തരവാദിത്വത്തോടെയല്ലാതെ. 

ചിന്തയിൽ മാറാത്തവർക്ക് പ്രയോഗത്തിൽ എങ്ങിനെ സ്വാതന്ത്ര്യം?