രാജ്യസഭാംഗ നിർദേശത്തിനുള്ള യോഗ്യത:

നിങ്ങളുടെ തലച്ചോറിനെയും മനസ്സാക്ഷിയെയും ഭരണകൂടത്തിലേക്കും അധികാരത്തിലേക്കുംസാമ്രാജ്യത്വശക്തിയിലേക്കും മാത്രം തിരിഞ്ഞുനിൽക്കുന്ന കോമ്പസാക്കി മാറ്റുക.

ഭരണകൂടവും സാമ്രാജ്യത്വശക്തികളും നിശ്ചയിക്കുന്ന അളവുകോലുകൾ മാത്രം ഇനിയങ്ങോട്ട്. 

ഇനിയങ്ങോട്ട് രാജ്യവും സാമ്രാജ്യത്വ ശക്തികളും മാത്രം. 

മനുഷ്യരില്ല. 

മനുഷ്യരെന്നാൽ ഭരണകൂടത്തിനും സാമ്രാജ്യത്വ ശക്ക്തികൾക്കും ഇരപിടിക്കാനും കളിച്ചുനടക്കാനും, വേണ്ടപ്പോൾ പിടിച്ചുതിന്നാനും വേണ്ട പട്ടികളും പൂച്ചകളും കോഴികളും ആടുകളും മാത്രം.

ഭരണകൂടവും സാമ്രാജ്യത്വശക്തികളും  തരുന്ന എല്ലും മുള്ളും ഇലകളും ഭക്ഷിക്കുന്ന പട്ടികളും പൂച്ചകളും കോഴികളും ആടുകളും മാത്രമായി ജീവിതത്തെ അവരുടെ തീൻമേശക്ക് ചുറ്റുമിരുന്ന് അനുഭവിച്ചുകൊള്ളുക 

ശരിയും തെറ്റും വിവേകവും അവിവേകവും തീവ്രതയും ഭീകരതയും ഭരണകൂടവുംസാമ്രാജ്യത്വശക്തികളും തന്നെയായ പുലികളും ചെന്നായകളും അവരുടെ ആവശ്യത്തിനനുസരിച്ച്നിശ്ചയിക്കും. 

തെറ്റും അവിവേകവും തീവ്രതയും ഭീകരതയും ഭരണകൂടവും സാമ്രാജ്യത്വശക്തികളും ചെയ്യുന്നതായാൽ അത് മാത്രമാണ് ശരി, വിവേകം. 

നിങ്ങൾ വേദനപൂണ്ട് പുളഞ്ഞ് കരയേണ്ടിവന്നാൽ പോലും അത് അക്രമം ഭീകരത, തീവ്രവാദം.

നിങ്ങൾ റാൻമൂളുക മാത്രം ചെയ്യുക.

നിങ്ങൾ റാൻമൂളുക മാത്രമായി വോട്ടിടുന്ന, നിങ്ങൾ റാൻമൂളിയിട്ടില്ലെങ്കിലും റാൻമൂളിയതായി വരുത്തുന്ന പ്രക്രിയയുടെ പേര് മാത്രമാണ് ജനാധിപത്യം.

ജനാധിപത്യമെന്നാൽ ജനങ്ങളുടെ ഭാരിച്ച ചിലവിൽ ജനങ്ങളുടെ മേലുള്ള അധികാര-സാമ്രാജ്യത്വശക്തികളുടെ ആർഭാടം, ആധിപത്യം, മേൽക്കോയ്മ.

ജനാധിപത്യമെന്നാൽ : സ്ഥാനവും അധികാരവും സ്ഥിരമായത് കൊണ്ട് കട്ടുമുടിക്കേണ്ടതില്ലാത്ത, അഴിമതിനടത്തേണ്ടതില്ലാത്ത, പാർട്ടി പ്രവർത്തനത്തിനും തെരഞ്ഞെടുപ്പ് പ്രചാരണത്തിനും പണം കണ്ടെത്തേണ്ടതില്ലാത്ത ഒരേയൊരു രാജാവിന് പകരം, അധികാരവും സ്ഥാനവും സ്ഥിരമല്ലാത്തത് കൊണ്ട് ചെറിയ കാലയളവിനുള്ളിൽ ആവുന്നത്ര കട്ടുമുടിക്കേണ്ടിവരുന്ന നൂറായിരം മാറിമാറിവരുന്ന കുട്ടിരാജാക്കന്മാർ കട്ടുമുടിച്ച് വിദേശ ബാങ്കുകളിൽ നിക്ഷേപിക്കുന്നതിന്റെയും, രാഷ്ട്രീയപാർട്ടികൾ അധികാരം ഉറപ്പല്ലാത്തതിന്റെ പേരിൽ ആവോളം കട്ടുമുടിക്കുന്നതിന്റെയും പേര്. 

********

കണ്ടില്ലേ?

രാജ്യസഭാംഗ നിർദേശത്തിന് രാഷ്ട്രപതി കാണുന്ന പുതിയതരം യോഗ്യതയൊക്കെ.

അതിലൊന്നും ഒരു തെറ്റുമില്ല. 

അതിലൊക്കെ എന്തെങ്കിലും തെറ്റ് കണ്ടാൽ, അങ്ങനെ തെറ്റ് കാണുന്ന നിങ്ങൾക്കാണ് തെറ്റിയത്.

ഇനിയിങ്ങനെയൊക്കെ മാത്രം. 

മാനങ്ങളും മാനദണ്ഡങ്ങളും ഇല്ല.

വെറുപ്പും വിഭജനവും കലാപങ്ങളും അക്രമങ്ങളും മാത്രം ആദർശവും വഴിയുമാക്കിയവർ തെളിയിച്ചയോഗ്യത തന്നെ രാഷ്ട്രഭരണത്തിനും രാഷ്ട്രപതിക്കും ഇനിയങ്ങോട്ട് തിരയേണ്ട യോഗ്യത.

വെറുപ്പും വിഭജനവും കലാപങ്ങളും അക്രമങ്ങളും ഉണ്ടാക്കാനുള്ള കഴിവ് ഭരണത്തിനുള്ള യോഗ്യത, ഭരണ പാടവം.

ശാസ്ത്ര സാഹിത്യ കലാ സാമൂഹിക സേവന മേഖലകളിൽ വലിയ സംഭാവനകളൊക്കെ വെറുപ്പിലും വിഭജനത്തിലും കലാപ കൊലപാതക രാഷ്ട്രീയത്തിലും ഉൾപ്പെടുന്നതാണ്.

എന്നതാണ് പുതിയ അളവുകോലുകൾ ഉണ്ടാക്കുന്ന പുതിയ നിർവ്വചനം.

അങ്ങനെയുള്ള നല്ല വെറുപ്പിന്റെയും വിഭജനത്തിന്റെയും കലാപ കൊലപാതക രാഷ്ട്രീയത്തിന്റെയും പാണ്ഡിത്യവും അനുഭവപരിചയവുമുള്ള എത്ര പേരുകൾ രാജ്യസഭയിലേക്കെത്താൻ ഇനിയും നിരനിരയായി ഒരുങ്ങിക്കിടക്കുന്നു.

എന്ത് വെറും പന്ത്രണ്ട് പേരുകൾ!!!???

പന്ത്രണ്ട് പേർക്കാണ് പ്രസിഡന്റ് ആർട്ടിക്കിൾ 80 പ്രകാരം രാജ്യസഭയിലേക്ക് നാമനിർദ്ദേശം നൽകുകഎന്നത് മുഗുളരും ടിപ്പുസുൽത്താനും ബാബറും ബ്രിട്ടീഷുകാരും ഒക്കെ നമ്മെ ചൂഷണം ചെയ്യാൻവേണ്ടിയും സനാതനധർമ്മത്തെ ഇല്ലായ്മ ചെയ്യാനും ഉണ്ടാക്കിവെച്ചത്.

അതുകൊണ്ട് ചരിത്രവും ശാസ്ത്രവും മാറ്റിയെഴുത്തപ്പെടേണ്ട ഈ കാലത്ത് ഇനിയങ്ങോട്ട് രാഷ്ട്രപതിനാമനിർദേശം ചെയ്യുന്നതിനുള്ള യോഗ്യത നിശ്ചയിക്കുന്നതിൽ ഒന്നല്ല ഒരായിരം വ്യത്യാസങ്ങളുണ്ട് എന്ന് വരും.

സ്വന്തം പാർട്ടി നടത്തിയ അക്രമരാഷ്ട്രീയത്തിനാണ് നൽകിയ ഊർജമാണ് ഇനിയങ്ങോട്ടുള്ള ഒരെയൊരു പ്രധാന യോഗ്യത. 

അഭിപ്രായ - വിശ്വാസ വ്യത്യാസത്തിന്റെ പേരിൽ സ്വന്തം ബന്ധുക്കളെയോ അയലവാസികളായവരെയോ ക്രൂരമായി ആക്രമിച്ചാൽ, കൊന്നാൽ കൂടുതൽ യോഗ്യത. 

കാലുവെട്ടിയതിന് പകരമായി വീട്ടിൽ കയറി അച്ഛനമ്മമാരുടെ മുന്നിലിട്ട് 37 വെട്ടുവെട്ടികൊലപ്പെടുത്തിയാൽ ആ അക്രമരാഷ്ട്രീയത്തിന് പത്തരമാറ്റ് യോഗ്യത.

അക്രമരാഷ്ട്രീയത്തിന് നേതൃത്വം കൊടുത്തു എന്നത് ഒരാളെ രാജ്യസഭാംഗത്വത്തിന്നിർദേശിക്കാനുള്ള വലിയ ന്യായം തന്നെ. 

പിന്നെന്ത് ശാസ്ത്രം, കല, സാഹിത്യം, സാമൂഹ്യസേവനം, അനുഭവപരിചയം?

പിന്നെന്തിന് ശാസ്ത്രം, കലാ സാഹിത്യം, സാമൂഹ്യസേവനം, അനുഭവപരിചയം?

അക്രമരാഷ്ട്രീയത്തേക്കാൾ വലിയ സാഹിത്യവും കലയും ശാസ്ത്രവും സാമൂഹ്യസേവനവുംഅനുഭവപരിചയവും ഇല്ല തന്നെ.