ഈയുള്ളവന് അറിവില്ലായ്മയുണ്ട്. അതുകൊണ്ട് തന്നെ ഈയുള്ളവന് ദൈവവും ഉണ്ട്.

എന്തോ അത്.

എങ്ങിനെയാ അങ്ങനെ. 

ഞാൻ ഉദ്ദേശിച്ചതല്ല ജീവിതത്തിൽ നടക്കുന്നത്. 

ഞാൻ ഉദ്ദേശിച്ച ഞാനും ജീവിതവും പോലുമില്ല.

എൻ്റെ ഉദ്ദേശം പോലും എൻ്റേതല്ല. 

എൻ്റെ ഉദ്ദേശം പോലും ഞാനുദ്ദേശിച്ചുണ്ടാകുന്നതല്ല. 

സാഹചര്യവശാൽ എന്തൊക്കെയോ എങ്ങനെയൊക്കെയോ ഞാനുമുദ്ദേശിച്ചുപോകുന്നു. 

ഒന്നുകിൽ ആരുടെയും ഒന്നിൻ്റെയും ഉദ്ദേശമല്ല ജീവിതവും ജീവിതത്തിൽ നടക്കുന്നതും. 

അല്ലെങ്കിൽ ആരുടെയോ എന്തിൻ്റെയോ ഉദ്ദേശം മാത്രമാണ് ജീവിതവും ജീവിതത്തിൽ നടക്കുന്നതും.

********

ഈയുള്ളവൻ്റെ അറിവില്ലായ്മയിൽ നിന്ന് ഈയുള്ളവൻ്റെ ദൈവം രൂപപ്പെടുന്നു.

ഈയുള്ളവൻ്റെ അറിവില്ലായ്മ തുടങ്ങുന്നിടത്ത് ഈയുള്ളവൻ്റെ ദൈവം തുടങ്ങുന്നു. 

ഈയുള്ളവന് അറിവില്ലായ്മയുണ്ട്. 

അതുകൊണ്ട് തന്നെ ഈയുള്ളവന് ദൈവവും ഉണ്ട്. 

കാഴ്ച്ചമുട്ടുന്നിടം ആകാശമാകുന്നത് പോലെ ദൈവം. 

എല്ലാവർക്കും അവരുടെ കാഴ്ച്ചമുട്ടുന്നിടം അവരുടെ ദൈവം. 

എല്ലാവർക്കും അവരുടെ അറിവില്ലായ്മയുടെ തോതനുസരിച്ച ദൈവം. 

നിസ്സഹായതയുടെ വലുപ്പവും ആഴവും പരപ്പും ദൈവത്തിൻ്റെ വലുപ്പവും ആഴവും പരപ്പും.

അറിവില്ലായ്മയുടെ ദൈവവും ദൈവമില്ലായ്മയും ഒരുപോലെ അനിർവ്വചനീയം.