77 കൊല്ലങ്ങൾക്ക് ശേഷവും എന്തുകൊണ്ട് ഇന്ത്യ ഇങ്ങനെ?

ചോദ്യം: സ്വാതന്ത്ര്യം കിട്ടി എന്ന് നാം പറയുന്ന 77 കൊല്ലങ്ങൾക്ക് ശേഷവും എന്തുകൊണ്ട് ഇന്ത്യ ഇങ്ങനെ? 

ഉത്തരം: കിട്ടിയെന്ന് നാം പറയുന്ന സ്വാതന്ത്ര്യം ഇന്ത്യയിലെ ജനങ്ങൾക്ക് ഇക്കാലമത്രയും ബാധകമല്ല, ബാധകമായിരുന്നില്ല എന്നതിനാൽ.

ചോദ്യം: നാം നടപ്പാക്കി എന്ന് പറയുന്ന ജനാധിപത്യം നടപ്പാക്കാൻ തുടങ്ങിയിട്ട് 77 വർഷങ്ങൾ കഴിഞ്ഞിട്ടും എന്തുകൊണ്ട് ഇന്ത്യ ഇപ്പോഴും ഇങ്ങനെ? 

ഉത്തരം: നടപ്പാക്കി എന്ന് നാം പറയുന്ന ജനാധിപത്യം ഇന്ത്യയിലെ ജനങ്ങൾക്ക് ബാധകമല്ല, ബാധകമായിരുന്നില്ല. 

ജനാധിപത്യം ജനങ്ങൾ അറിഞ്ഞിരുന്നില്ല, ജനങ്ങൾ തെരഞ്ഞെടുത്തിരുന്നില്ല. 

ബോധവും വിവരവുമില്ലാത്ത മഹാഭൂരിപക്ഷം ജനങ്ങളുള്ള നാട്ടിൽ ജനാധിപത്യം പ്രായോഗികമല്ല, പിന്നെ അത് പുതിയ വേഷത്തിലുള്ള അധികാരവർഗ്ഗ പാർട്ടികൾക്ക് വെറുമൊരു ചൂഷണോപാധി. 

140 കോടിയിലധികം വരുന്നൊരു ജനതയിൽ നടപ്പാക്കാനാവുന്ന സംഗതിയല്ല ജനാധിപത്യം. 

ഇക്കാര്യം പകൽ വെളിച്ചം പോലെ മനസ്സിലാക്കുന്ന രാഷ്ട്രീയ നേതൃത്വത്തിൻ്റെ ആശ്വാസവും അതാണ്. അവർ ചെയ്യുന്ന എല്ലാ വൈകൃതങ്ങൾക്കും അവർ തന്നെ, അവരെ സംരക്ഷിക്കാനായി ഇട്ട സുന്ദരമായ പേര് മാത്രം ജനാധിപത്യം

ജനാധിപത്യം എന്തെന്നറിയാനും മനസ്സിലാക്കാനും തെരഞ്ഞെടുക്കാനും മാത്രം അന്നും ഇന്നും ഇന്ത്യൻ ജനത വളർന്നിട്ടില്ല. ഇന്ത്യൻ ജനതയിലെ മഹാഭൂരിപക്ഷം വളർന്നിട്ടില്ല.

ജനാധിപത്യം കൊണ്ടുനടക്കാൻ മാത്രം തെളിച്ചവും വെളിച്ചവും  ഉത്തരവാദിത്തബോധവുമുള്ള, പ്രതികരണശേഷിയുള്ള (responsible ആയ) ജനത ഇന്ത്യയിൽ ഇല്ല, ഉണ്ടായിരുന്നില്ല.

അഥവാ ഇപ്പറയുന്ന സ്വാതന്ത്ര്യവും ജനാധിപത്യവും അനുഭവിക്കാനും കയ്യാളാനും മാത്രം വളർന്ന, ബോധമുള്ള, വിവരമുള്ള ഒരു ജനത ഇന്നും അന്നും ഇന്ത്യയിൽ ഇല്ല, ഉണ്ടായിരുന്നില്ല എന്നർത്ഥം.

സ്വാതന്ത്ര്യം, ഉത്തരവാദിത്ത ബോധം എന്നിവ പ്രതികരണപരതയുമായി ബന്ധപ്പെട്ടതാണ്. 

അത്തരമൊരു സ്വാതന്ത്ര്യം അനുഭവിക്കാനും നടപ്പാക്കാനും മാത്രം ഉത്തരവാദിത്തബോധമുള്ള, ഉത്തരവാദിത്തം ഏറ്റെടുക്കാൻ കെല്പുള്ള, അവ്വിധം പ്രതികരണശേഷിയും തെളിച്ചവും ഉള്ള ഒരു ജനത അന്നും ഇന്നും ഇന്ത്യയിൽ ഉണ്ടായിട്ടില്ല.

കിട്ടിയെന്ന് പറയുന്ന സ്വാതന്ത്ര്യത്തിന് മുൻപ് സ്വാതന്ത്ര്യം നിഷേധിക്കപ്പെട്ടതായി ഇന്ത്യൻ പൊതുജനത്തിന് തോന്നിയിരുന്നില്ല. 

കിട്ടിയെന്ന് പറയുന്ന സ്വാതന്ത്ര്യത്തിന് ശേഷം പ്രത്യേകം സ്വാതന്ത്ര്യം കിട്ടിയതായും ഇന്ത്യൻ പൊതുജനത്തിന് തോന്നിയിട്ടില്ല. ഭരണച്ചിലവും അഴിമതിയും അതുവഴി നികുതിഭാരവും കൂടിയത് മാത്രമല്ലാതെ.

ആരൊക്കെയോ എന്തൊക്കെയോ പറയുന്നത് കേട്ട് അനുകരിച്ച് തുള്ളുന്ന ഒരു ജനത മാത്രമേ അന്നും ഇന്നും മഹാഭൂരിപക്ഷമായി ഇന്ത്യയിൽ ഉള്ളൂ, ഉണ്ടായിരുന്നുളളൂ. 

എന്നല്ലാതെ ഇന്ത്യൻ ജനതക്ക് ഇന്നും അന്നും സ്വന്തമായി സ്വാതന്ത്ര്യവും സ്വാതന്ത്ര്യനിഷേധവും ജനാധിപത്യവും മനസ്സിലാകുമായിരുന്നില്ല.

നാം കിട്ടിയെന്ന് പറയുന്ന സ്വാതന്ത്ര്യത്തിന് മുൻപുള്ളതിനേക്കാൾ മെച്ചപ്പെട്ട ഒരു പ്രത്യേക സ്വാതന്ത്ര്യം, നാം കിട്ടിയെന്ന് പറയുന്ന സ്വാതന്ത്ര്യത്തിന് ശേഷം പ്രത്യേകിച്ച് ഇന്ത്യയിലെ  ജനങ്ങൾക്ക് കിട്ടിയിട്ടില്ല. 

നാം കിട്ടിയെന്ന് പറയുന്ന സ്വാതന്ത്ര്യത്തിന് മുൻപ് ഇവിടത്തെ പൊതുജനങ്ങൾക്ക് സ്വാതന്ത്ര്യത്തിന് ശേഷം കിട്ടിയെന്ന് പറയുന്ന പ്രത്യേക സ്വാതന്ത്ര്യം നിഷേധിക്കപ്പെട്ടിരുന്നുമില്ല.

സ്വാതന്ത്ര്യമെന്നത് ഇന്ത്യൻ അധികാര വിഭാഗത്തിലേക്കുള്ള ബ്രിട്ടീഷ് അധികാര വിഭാഗത്തിൽ നിന്നുള്ള അധികാരക്കൈമാറ്റത്തിനല്ലാതെ വഴിവെച്ചിട്ടില്ല. 

അതുകൊണ്ട് തന്നെ നാം കിട്ടിയെന്നും നടപ്പാക്കിയെന്നും പറയുന്ന ജനാധിപത്യത്തിനും സ്വാതന്ത്ര്യത്തിനും കാതലായ വലിയ മാറ്റം ഇന്ത്യൻ ജനജീവിതത്തിൽ ഉണ്ടാക്കാൻ കഴിഞ്ഞിരുന്നില്ല. 

നാം കിട്ടിയെന്നും നടപ്പാക്കിയെന്നും പറയുന്ന ജനാധിപത്യവും സ്വാതന്ത്ര്യവും വെച്ച് കാതലായ വലിയ മാറ്റം ഇന്ത്യൻ ജനതക്കും ഇന്ത്യയിൽ ഉണ്ടാക്കാൻ കഴിഞ്ഞിട്ടില്ല.

കാലക്രമേണ മനുഷ്യനുണ്ടായ, ഉണ്ടാവുന്ന മാറ്റം ഇവിടെയും ഉണ്ടായി. 

അല്ലാതൊരു മാറ്റം സ്വാതന്ത്ര്യവും ജനാധിപത്യവും കൊണ്ട് ഇന്ത്യയിൽ പ്രത്യേകിച്ച് ഉണ്ടായിട്ടില്ല.

അല്ലാതെ ഇന്ത്യക്ക് എന്തുകൊണ്ട് ഈ ഗതി വന്നു എന്ന് ചോദിക്കരുത്.

കാരണം ജനങ്ങൾക്ക് ബാധകമായ, ജനങ്ങൾക്ക് മനസ്സിലാവുന്ന ജനാധിപത്യവും സ്വാതന്ത്ര്യവും ആയിരുന്നില്ല ഇന്ത്യക്ക് കിട്ടിയത്. 

അല്ലങ്കിൽ ജനാധിപത്യവും സ്വാതന്ത്ര്യവും എന്തെന്ന് മനസ്സിലാവുന്ന അതർഹിക്കുന്ന ഒരു ജനതയല്ല ഇന്ത്യയിൽ ഇപ്പോഴും ഉള്ളത്, മുൻപുണ്ടായിരുന്നത്.