ജന്മദിനമാണെന്നറിയുന്നു.

ഇന്ന് ജന്മദിനം.

ഈയുള്ളവനിന്ന്

ജന്മദിനമാണെന്നറിയുന്നു.

അറിവ്.

ആ അറിവാണ് പ്രശ്നം.

ആ അറിവ് 

യോഗ്യത പോലെത്തന്നെ

അയോഗ്യതയുമാണ്.

ആ അറിവ് 

ഗുണം പോലെത്തന്നെ

പ്രശ്‌നവുമാണ്.

അറിഞ്ഞാൽ പ്രതികരിക്കണം,

പ്രതികരിച്ചുപോവും, 

പ്രതികരണങ്ങളുണ്ടാവും.

പ്രതികരണങ്ങൾ ഇല്ലാത്തവൻ

ജീവിക്കുന്നില്ല.

പ്രതികരണങ്ങളാണ് 

വളർച്ചയും തളർച്ചയും.

തളർച്ചയെന്ന് തോന്നുന്ന വളർച്ചയും

വളർച്ചയെന്ന് തോന്നുന്ന തളർച്ചയും

ഒന്ന്. പ്രതികരണം.

പ്രതികരണങ്ങളെ ഭയക്കുന്നവന്

ജീവിക്കാനാവില്ല.

പ്രതികരണം നിലച്ചവൻ മരിച്ചവൻ.

പ്രതികരണമാണ്,

പ്രതികരണശേഷിയാണ്,

പ്രതികരണപരതയാണ്,

പ്രതികരണമുണ്ടാക്കുന്ന 

മാറ്റവും വളർച്ചയുമാണ്,

ഒഴുക്കും താളവുമാണ്

ജീവനും ജീവിതവും.

പ്രതികരണമാണ്

ജീവൻ്റെയും ജീവിതത്തിൻ്റെയും

ഒഴുക്കും താളവും.

അപ്പോഴും, 

ഇങ്ങനെയൊക്കെയറിഞ്ഞ്

പ്രതികരിച്ചുപോകുമ്പോഴും 

ആഘോഷമില്ല.

ഈയുള്ളവന് 

ആഘോഷിക്കാൻ നിർവ്വാഹമില്ല.

ആഘോഷിക്കാത്ത ജീവിതം

മരണമെന്നാകിലും 

ആഘോഷമില്ല.

നാടിൻ്റെ നൊമ്പരത്തിൽ, 

നാട്ടുകാരുടെ ദുരന്തത്തിൽ, 

വൻതിരമാലകൾക്കിടയിൽ

ആർക്കെന്ത് ജന്മദിനം?

വീട് വേവുമ്പോൾ 

വീട്ടിനുള്ളിലുള്ളവനെന്തുൽസവം?

നാട് വേദനകളിലൂടെയും

നാട്ടുകാർ അനിശ്ചിതത്വത്തിലൂടെയും 

നീറിനീറി കടന്നുപോകുമ്പോൾ, 

അവരോടൊപ്പം നീറിനീറി

നിൽക്കുന്നതിനേക്കാൾ വലുതല്ല 

ഒരു ജന്മദിനവും ആഘോഷവും.

നാടാണ് ശരീരം.

ജീവൻ തുടിക്കുന്ന,

ജീവൻ തുടിക്കേണ്ട 

ശരീരം.

നാമോരോരുത്തരും 

നാടിൻ്റെ മനസ്സും ആത്മാവും.

ശരീരമുണ്ടാക്കുന്ന,

ശരീരത്തിൻ്റെ ജീവനും ജീവിതവും 

ഉണ്ടാക്കുന്ന

മനസ്സും ശരീരവും മാത്രമേയുള്ളൂ.

ചുരുങ്ങിയതങ്ങനെയേ 

ഈയുള്ളവനുള്ളൂ.

ശരീരം വേദനിച്ച്, 

വിശന്ന് പുളയുമ്പോൾ 

ശരീരം തന്നെയായ

ശരീരത്തിൻ്റെ മനസ്സിനെന്താഘോഷം?

ശരീരത്തിൻ്റെ ആത്മാവിനെന്തർത്ഥം?

കാരണം മറ്റൊന്നല്ല

അങ്ങനെ വിശന്ന്, 

വേദനിച്ചു നീറിപ്പുളയുന്ന

നാടിൻ്റെ ശരീരം, 

നാടായ ശരീരം

ഈയുള്ളവൻ്റെ ശരീരം.

ആ ശരീരത്തെ 

കച്ചവടമാക്കാനുദ്ദേശിക്കാത്ത

മനസ്സാക്ഷിയുള്ള മനസ്സിന്,

ആ ശരീരത്തിൻ്റെ മനസ്സിന്

ശരീരത്തിൻ്റെ അർത്ഥം തന്നെയായ ആത്മാവിന് 

അങ്ങനെയേ ഒക്കൂ, 

അങ്ങനെയേ ആവൂ.

ചുമരില്ലാതെ 

ചുമരിലെ ചിത്രം 

നിലകൊള്ളില്ലെന്നറിയുന്ന 

മനസ്സും ആത്മാവും തന്നെ 

ആ ചുമരിലെ ചിത്രമായ 

ഈയുള്ളവൻ.

കടലില്ലാതെ 

കടലിലെ വെള്ളത്തുള്ളികളും 

ഇല്ലെന്നറിയുന്ന

മനസ്സും ആത്മാവും തന്നെ

ആ കടലിലെ തുള്ളിയായ

ഈയുള്ളവൻ.

കടലും ചുമരും തന്നെ

നിലനില്പിൻ്റെ ഭീഷണിയിലെങ്കിൽ

അതിലെ ചിത്രത്തിനും

വെള്ളത്തുള്ളിക്കും 

എന്ത് ജന്മദിനം?

എന്താഘോഷം?

കപ്പലും കപ്പിത്താനും 

അപകടത്തിൽ.

എങ്കിൽ ആ കപ്പലിലെ

യാത്രികനെന്ത് ജന്മദിനം?

എന്താഘോഷം?

എന്തമ്പത്തിയേഴാം ജന്മദിനം?