ഹിന്ദുവാണ്, ഭാരതീയനാണ്. ഹിന്ദുവും ഭാരതീയനും ആവുകയെന്നാൽ....,

ഹിന്ദുവാണ്, ഭാരതീയനാണ്. 

ശരിയാണ്.

പക്ഷേ, ഹിന്ദുവും ഭാരതീയനും ആവുകയെന്നാൽ....,

എങ്ങിനെയൊക്കെയോ രൂപപ്പെടുന്ന ഏതോ  ഭരണകൂടത്തിൻ്റെ എല്ലാ നെറികേടുകളും കഴിവില്ലായമയും കളവും ദുർഭരണവും  സഹിക്കുകയും മറച്ചുപിടിക്കുകയും ന്യായീകരിക്കുകയും എന്നർത്ഥമില്ല.

ഹിന്ദുവും ഭാരതീയനും ആവുകയെന്നാൽ....,

ഒരു മതവിശ്വാസി അല്ലാതാവുകയെന്നും എല്ലാ മതങ്ങളെയും ഓരുപോലെ ഉൾക്കൊള്ളുക എന്നും, എല്ലാ മതവിശ്വാസിയും ആവുക എന്നുമാണ് അർത്ഥം. 

ഹൈന്ദവതയെന്നാലും ഭാരതീയതയെന്നാലും സ്ഥിരമായ തിരുത്തും, മുടക്കമില്ലാത്ത മാറ്റവും, തുടർച്ചയായ വളർച്ചയുമാണ്.

അതുകൊണ്ട് തന്നെ ഹിന്ദുവാണ്, ഭാരതീയനാണ് എന്ന് തെല്ലഭിമാനത്തോടെയും ആർജവത്തോടെയും പറയാൻ സാധിക്കണം. 

കാരണം ഹിന്ദുവും ഭാരതീയനും ആവുകയെന്നാൽ ലോകപൗരൻ തന്നെയാവുക എന്നാണർത്ഥം.

ഹിന്ദുവും ഭാരതീയനും ആവുകയെന്നാൽ ഒരു തടകത്തിലും കുളത്തിലും ഒതുങ്ങി നിർവ്വചിക്കപ്പെട്ട് തടഞ്ഞുനിൽക്കാതിരിക്കുകയാണ്, ദുർഗന്ധം വമിക്കാതിരിക്കുകയാണ്.

ഹിന്ദുവും ഭാരതീയനും ആവുകയെന്നാൽ കടലായി നിർവ്വചിക്കപ്പെടാതെ പരന്നു വിരിഞ്ഞ് നിൽക്കുകയാണ്. 

ആകാശം പോലെ അതാര്യത അല്പവും ഇല്ലാത്ത വലിയ കുടയാവുകയാണ്. 

എല്ലാ പുറവും ഒരുപോലെ കാണുന്ന, കാണിക്കുന്ന ആകാശമായ കുട. കാഴ്ചക്ക് തടസ്സമല്ലാത്ത ആകാശമായ കുട. 

കാഴ്ച തന്നെ ആകാശമാകുന്ന കുട. 

ലോകത്ത് മുഴുവനുമുള്ള സർവ്വവിധ വൈവിധ്യങ്ങളിലും ശരി കണ്ടുൾക്കൊണ്ട് എല്ലാം ഒന്ന് തന്നെ, ഒന്നിലേക്ക് തന്നെയെന്ന് അംഗീകരിക്കുകയാണ് ഹിന്ദുവും ഭാരതീയനും ആവുകയെന്നാൽ അർത്ഥം.

എന്നുവെച്ച്, ഹിന്ദുവും ഭാരതീയനും ആവുകയെന്നാൽ തൻ്റെ പിതൃത്വം ഏതെങ്കിലും ഭരണകൂടത്തിന് ഏൽപിച്ച്, ആ പിതാവായ ഭരണകൂടത്തിൻ്റെ മുഴുവൻ നെറികേടുകളും കഴിവില്ലായമയും കളവും സഹിക്കുകയും മറച്ചുപിടിക്കുകയും ന്യായീകരിക്കുകയും എന്നർത്ഥമില്ല.

കുടുസ്സായ ദേശീയതയും അസഹിഷ്ണുതയും അല്ല ഹൈന്ദവതയും ഭാരതീയതയും.

യഥാർഥത്തിൽ ഹിന്ദുവെന്നതില്ല. ഏത് ഗ്രന്ഥവും പുരാണവും വേദവും ഉപനിഷത്തും വെച്ച് നോക്കിപ്പറഞ്ഞാൽ. 

ഏറിയാൽ ഭാരതീയൻ എന്നതേയുള്ളൂ.