മരണമാണ് എളുപ്പം; ജീവിതമല്ല.

മരണം 

ജീവിതം ഉറങ്ങുന്ന, 

ജീവിതം കളിച്ചു രസിക്കുന്ന, 

ജീവിതത്തെ ജീവിതമാക്കുന്ന,

ജീവിതത്തെ താരാട്ടുന്ന 

മെത്ത, കളിത്തട്ട്, കളിത്തൊട്ടിൽ.

*****

മരണമാണ് എളുപ്പം;

ജീവിതമല്ല. 

ജീവിതം പ്രായാസമാണ്; 

മരണമല്ല പ്രയാസം.

പ്രയാസത്തെയാണ് നാം

ജീവിതമെന്ന് വിളിക്കുന്നത്.

പ്രതിരോധിക്കുന്നതിനേയും ആക്രമിക്കുന്നതിനെയുമാണ് നാം

ജീവിതമെന്ന് വിളിക്കുന്നത്.

*****

മരണം

ഒരു തുറവിയാണ്.

ശ്രമങ്ങളും പ്രതിരിധങ്ങളും

ഒഴിവാകുമ്പോൾ 

ഉണ്ടാവുന്ന തുറവി.

ഞാനിൽ നിന്നും രക്ഷപ്പെടുന്ന

ഞാൻ ഇല്ലാതാവുന്ന തുറവി 

മുഴുവനിലേക്കുമുള്ള

മുഴുവനുമായിത്തീരാനുള്ള, 

എളുപ്പമുള്ള തുറവി.

ജീവിതം തന്ന തടവറയും

ആ തടവറ തന്ന വ്യക്തിത്വവും 

എളുപ്പത്തിൽ 

തകർത്തെറിയുന്ന തുറവി.

*****

യഥാർഥത്തിൽ, 

എങ്ങനെയും.

എങ്ങനെയായാലും 

മരണം മാത്രമാണ്.

ജീവിക്കുമ്പോഴും മരണം, 

മരിക്കുമ്പോഴും മരണം.

*****

പ്രകൃതി എളുപ്പമാണ്. 

എളുപ്പത്തിൽ പ്രകൃതി 

മരണത്തെ തേടുന്നു, നേടുന്നു. 

മരണത്തിലൂടെ പ്രകൃതി 

ജീവിതത്തെ നേടുന്നു, തുടർത്തുന്നു. 

ജീവിതത്തിലൂടെ മരണത്തെയും.

*****

പ്രകൃതി എന്ന സ്വാഭാവികത 

എളുപ്പം മാത്രം തേടുന്നു, 

എളുപ്പം മാത്രം നേടുന്നു.

ആ നിലക്ക്, അതിനാൽ തന്നെ, 

പ്രകൃതി

ആലസ്യവും മരണവും മാത്രം 

തേടുന്നു, നേടുന്നു. 

*****

അലസനാവൂ, 

ശ്രമിക്കാതെയാവൂ. 

നിങൾ മരിക്കും. 

പ്രയത്നിക്കൂ. 

നിങൾ ജീവിക്കും. 

മരിച്ചു കൊണ്ട് ജീവിക്കും. 

****

പ്രയാസപ്പെടുമ്പോഴൊക്കെ 

ജീവിക്കുന്നു എന്ന് തോന്നിക്കൊണ്ട്, 

ജീവിക്കുന്നു എന്ന് തോന്നിപ്പിച്ചുകൊണ്ട്, 

ജീവിച്ചു കൊണ്ട്, 

ജീവിക്കാൻ എന്ന് തോന്നിക്കൊണ്ട് 

നിങൾ മരിച്ചു കൊണ്ടിരിക്കും.

നിങൾ മരിച്ചു ജീവിക്കും 

****

മരണമാണ് എളുപ്പം. 

നാം മനസ്സിലാക്കുന്നത് പോലെ 

ജീവിക്കുകയും അതിജീവിക്കുകയും 

പ്രയാസമാണ്. 

പ്രയാസപ്പെടുകയാണ്, 

ശ്രമിക്കുകയാണ് 

ജീവിതത്തിൻ്റെ വഴി.

പ്രയാസപ്പെടാതിരിക്കുകയാണ്, 

ശ്രമിക്കാതിരിക്കുകയാണ് 

മരണത്തിൻ്റെ വഴി.

*****

പ്രയാസപ്പെടുന്നവൻ മാത്രമേ 

നാം മനസ്സിലാക്കുന്നത് പോലെ 

ജീവിക്കൂ, അതിജീവിക്കൂ. 

അല്ലാത്തവൻ 

നാം മനസിലാക്കുന്നത് പോലെ 

മരിക്കും. 

പ്രയാസപ്പെടാതെ 

അലസമായിരിക്കുന്നവൻ്റെ 

ജീവിതം മരണത്തിലാണ്. 

നിത്യമായ തുടർച്ചയായ മരണത്തിൽ.

****

അങ്ങനെയുള്ള 

സ്വയം ഏറ്റെടുത്ത് നടത്തുന്ന 

പ്രയാസമാണ് 

ഒരോരുവൻ്റെയും ശക്തി. 

ശക്തിയെന്ന് നാം വിളിക്കുന്ന 

അതിജീവന ശേഷി. 

ഓരോ പ്രയാസവും 

ജീവിക്കാനുള്ള, 

അതിജീവിക്കാനുള്ള 

ഓരോ മരണമാണ്. 

ജീവിക്കാൻ ശക്തി കൂട്ടുന്ന 

മരണം.

ആ വഴിയിൽ

മരിച്ചു കൊണ്ട് മാത്രം 

ജീവിതം. 

*****

ജീവിക്കുകയെന്നാൽ 

പ്രയാസപ്പെടുക എന്ന് മാത്രമർത്ഥം. 

മരിച്ചുകൊണ്ട് മാത്രം, 

മരിപ്പിച്ചുകൊണ്ട് മാത്രം 

പ്രകൃതി ജീവിതത്തെ 

ജീവിപ്പിക്കുന്നു, വളർത്തുന്നു. 

മരണമാണ് 

സർവത്തെയും 

സർവവുമായി 

പരിവർത്തിപ്പിച്ച് 

പരിണമിപ്പിച്ച് 

വളർത്തുന്നത്. 

*****

ജീവിതം 

വളരുന്നതും മാറുന്നതും 

മരണത്തിലൂടെ.

കാരണം, 

മരണവും മരിപ്പിക്കുകയുമാണ് 

യഥാർഥത്തിൽ എളുപ്പം. 

പ്രകൃതിയിൽ എളുപ്പം.

ശ്രമിക്കുമ്പോൾ നിങൾ 

ശ്രമിക്കുന്ന വഴിയേ മരിക്കുന്നു.

മരിക്കുമ്പോൾ നിങൾ 

മടിച്ച് അലസമായി 

പ്രതിരോധിക്കാതെ മരിക്കുന്നു.

****

മരിച്ചു കൊണ്ട് മാത്രം 

ജീവിതം തുടരുന്നു. 

മരണം 

ജീവിതം ഉറങ്ങുന്ന, 

ജീവിതം കളിച്ചു രസിക്കുന്ന, 

ജീവിതത്തെ ജീവിതമാക്കുന്ന,

ജീവിതത്തെ താരാട്ടുന്ന 

മെത്ത, കളിത്തട്ട്, കളിത്തൊട്ടിൽ.