ഉണ്ടെങ്കിൽ ഉള്ള ആത്മാവ് എല്ലാവർക്കും ഒരൂപോലെ

എൻ്റെ രോഗവും ആരോഗ്യവും എൻ്റെ കയ്യിലല്ല. 

എൻ്റെതെന്ന് പറയുന്ന ഒന്നും ഞാൻ നിശ്ചയിച്ചതല്ല. 

എന്നിരിക്കെ എന്ത് ഞാൻ, എന്ത് നീ? 

എന്ത് നമ്മൾ, എന്ത് നിങൾ? 

എല്ലാം ദൈവം മാത്രമായ ജീവിതം മാത്രം.

*******

ഉണ്ടെങ്കിൽ ഉള്ള ആത്മാവ് (ജീവൻ, റൂഹ്) എല്ലാവർക്കും ഒരൂപോലെ. ഇല്ലെങ്കിലും അത് ഒരുപോലെ തന്നെ.

മനുഷ്യൻ്റെ ലോകത്ത്, മനുഷ്യൻ്റെ മാനത്തിനും പ്രതലത്തിനും അനുസരിച്ചുള്ളത്, ആവശ്യമായത് മനുഷ്യൻ അന്വേഷിക്കുന്നു കണ്ടെത്തുന്നു. ഒരു കെണിയിൽ അകപ്പെട്ടെന്ന പോലെ.

ഉറുംബിനും പാറ്റക്കും നായക്കും പൂച്ചയ്ക്കും അവരുടെ ലോകത്ത് അവരുടെ മാനത്തിനും പ്രതലത്തിനും അനുസരിച്ചുള്ളത്, ആവശ്യമായത് അവർ അന്വേഷിക്കുന്നു, കണ്ടെത്തുന്നു. അവരും ഒരു കെണിയിൽ അകപ്പെട്ടെന്ന പോലെ.

അവർക്കുള്ളത് നമുക്കും, നമുക്കുള്ളത് അവർക്കും ഒരുപോലെ തന്നെ ഉണ്ടായിക്കൊള്ളണമെന്നില്ല. 

ആർക്കാണ് കൂടുതൽ, ഏതാണ് കൂടുതൽ, ഏതാണ് ആരാണ് മെച്ചപ്പെട്ടത് എന്ന് ഏകപക്ഷീയമായി പറഞ്ഞുകൂടാ. 

ആത്മാവ്, അഥവാ ജീവൻ, റൂഹ് എന്നത് എല്ലാവരേയും അവരാക്കുന്ന നിലനിൽപ്പും ജീവിതവും തന്നെ. 

ആത്മാവ്, അഥവാ ജീവൻ, റൂഹ് എന്നത് നിലനിൽപ്പും ജീവിതവുമായി ബന്ധപ്പെട്ടത് മാത്രം. 

ആത്മാവ്,  അഥവാ ജീവൻ, റൂഹ് വികാര വിചാര വ്യത്യാസങ്ങളുമായി ബന്ധമില്ലാത്തത്. 

വികാര വിചാര വ്യത്യാസങ്ങൾ ശാരീരികം മാത്രമായ തലച്ചോറിൻ്റെ നിർമ്മിതികൾ.

എല്ലാവരും വരുന്നതും എല്ലാവർക്കും ആത്മാവ് ജീവൻ അഥവാ റൂഹ് കിട്ടുന്നതും ഒന്നിൽ നിന്ന്. 

എല്ലാവരും മടങ്ങുന്നതും ഒന്നിലേക്ക്. നിലനിൽപ്പിലേക്ക്. 

അതിനാൽ ഉണ്ടെങ്കിൽ ഉള്ള ആത്മാവ് (ജീവൻ, റൂഹ്) എല്ലാവർക്കും ഒരൂപോലെ. ഇല്ലെങ്കിലും അത് എല്ലാവർക്കും എല്ലാറ്റിനും ഒരുപോലെ.

എല്ലാവരും പലതായി ഒന്ന്, ഒന്നിലേക്ക്. 

ഒന്ന് തന്നെ എല്ലാവരുമായി, പലതായി, പലതെന്ന് തോന്നിപ്പിക്കുന്ന പലതിലേക്ക്.