മൂത്രമൊഴിച്ചതിനുള്ള ശിക്ഷ: വേരിൽ നിന്ന് നുള്ളേണ്ടത് കൊമ്പിൽ നിന്ന് നുള്ളിയാൽ മതിയോ?

വേരിൽ നിന്ന് നുള്ളേണ്ടത് കൊമ്പിൽ നിന്ന് നുള്ളിയാൽ മതിയോ?

വേരിൽ ഒഴിക്കേണ്ട വെള്ളവും വളവും കൊമ്പിൽ ഒഴിച്ചാൽ മതിയോ?

*******

ഒരു താഴ്ന്ന ജാതിക്കാരൻ്റെ ശരീരത്തിലും മുഖത്തും മൂത്രമൊഴിച്ചതിനുള്ള ശിക്ഷ അനധികൃത കെട്ടിടം തകർക്കുന്നതോ? 

ഏത് നിയമവും നീതിബോധവും അത് ശരിയെന്നും മതിയെന്നും പറയില്ലല്ലോ?

അനധികൃത കെട്ടിടം അല്ലെങ്കിലും തകർക്കപ്പെടേണ്ടതല്ലേ? 

മൂത്രമൊഴിച്ചതിനുള്ള ശിക്ഷ പോലെയാണോ ഈ സമയത്ത് അനധികൃത കെട്ടിടം തകർക്കേണ്ടത്? 

അങ്ങനെ വരുമ്പോൾ അതൊരു കണ്ണിൽ പൊടിയിടലും ശ്രദ്ധതിരിച്ചുവിടലും മാത്രമാകില്ലേ?

******

ഒരു നാട്ടിൽ ഒരാൾ ഒരു വലിയ പാതകം ചെയ്താൽ അതിനുള്ള പരിഹാരവും ശിക്ഷയും ആ നാടിൻ്റെ ഭരണാധികാരി, മുഖ്യമന്ത്രിയോ പ്രധാനമന്ത്രിയോ തന്നെ പ്രായശ്ചിത്തം പോലെ ചെയ്യേണ്ടതുണ്ടോ?

അങ്ങനെയെങ്കിൽ ഒരു നാട്ടിലെ എല്ലാ ഓരോരുത്തരും ചെയ്യുന്ന ഓരോ തെറ്റിനും പാതകത്തിനും ഉത്തരവാദിത്തം ഏറ്റെടുത്ത് ആ നാടിൻ്റെ ഭരണാധികാരി പ്രായശ്ചിത്തം ചെയ്യുമോ?

ഇനിയതല്ല, ഏതെങ്കിലും ഒരാൾ മാത്രം ചെയ്യുന്ന ഏതോ ഒരു തെറ്റിനെയും പാതകത്തിനെയും മാത്രം ഒരു നാട്ടിലെ ഭരണാധികാരിക്ക് ഏറ്റെടുത്ത് പ്രായശ്ചിത്തം ചെയ്യേണ്ടി വരുന്നത് എന്തുകൊണ്ട്?   

ആ ഒരാൾ ചെയ്ത തെറ്റിലും പാതകത്തിലും, ആ തെറ്റ് ചെയ്യാനുണ്ടായ വികാരവും മാനസികാവസ്ഥയും സംസ്കാരവും ഉണ്ടാക്കിയെടുക്കുന്നതിലും ആ ഭരണാധികാരിക്കും അയാളുടെ പാർട്ടിക്കും വല്ലാത്തൊരു പങ്കുണ്ട് എന്നതിനാലാണോ?

അച്ഛൻ പത്തായത്തിൽ ഇല്ലെന്ന് പറയുന്ന അതേ കുറ്റബോധവും വികാരവും തന്നെയോ ആ ഭരണാധികാരിയെയും അദ്ദേഹത്തിൻ്റെ പാർട്ടിയെയും ഇക്കാര്യത്തിൽ ഭരിക്കുന്നത്? അതല്ലെങ്കിൽ, എല്ലാ ഗർഭവും ഏറ്റെടുക്കുന്ന യഥാർഥത്തിൽ ഷണ്ഡനായ  എട്ടുകാലി മമ്മുഞ്ഞിയുടെ മനസ്സോ?

*******

ഒരു താഴ്ന്ന ജാതിക്കാരൻ്റെ ശരീരത്തിലും മുഖത്തും മൂത്രമൊഴിച്ചവനെ വേണ്ടത് പോലെ ശിക്ഷിച്ചുവോ, ശിക്ഷിക്കുമോ?

അല്ലെങ്കിൽ, പതിവുപോലെ മെല്ലെ മെല്ലെ അവനെയും പാർട്ടിയുടെ ദേശീയ രാഷ്ട്രീയ നേതൃത്വത്തിലേക്ക് വളർത്തുമോ? പാർലമെൻ്റ് മെമ്പർ ആക്കുമോ? ഇത്തരം വലിയ പാതകങ്ങൾ ചെയ്യുകയാണ് പാർട്ടിയുടെ നേതാവാകാനുള്ള യഥാർത്ഥ യോഗ്യത എന്ന് വരുത്തുംവിധം. മുൻമാതൃകകൾ വെച്ച് കൊണ്ട്. 

അതല്ലെങ്കിൽ ഈ പാർട്ടിയും ഈ ഭരണാധികാരിയും ഇങ്ങനെ ഒരാളെക്കൊണ്ട് ഒരു താഴ്ന്ന ജാതിക്കാരൻ്റെ ശരീരത്തിലും മുഖത്തും മൂത്രമൊഴിപ്പിച്ച മാനസികാവസ്ഥയും സാംസ്കാരിക ബോധവും എങ്ങിനെ ഇല്ലാതാക്കും? 

ഇന്ത്യയിലാകെ നിറഞ്ഞ് നിൽക്കുന്ന മാനസികാവസ്ഥ കൂടിയല്ലേ മൂത്രമൊഴിച്ച ഈ മാനസികാവസ്ഥ?

അതുകൊണ്ട് തന്നെയാണ് അങ്ങനെ മൂത്രമൊഴിച്ചവന് വേണ്ടി അപ്പുറത്ത് പിന്തുണ പ്രഖ്യാപിച്ച് കൊണ്ട് ഒരുവിഭാഗം നിൽക്കുന്നത്.

മൂത്രമൊഴിച്ചവൻ്റെ തകർക്കപ്പെട്ട കെട്ടിടം നിർമ്മിച്ചു കൊടുക്കുന്നതിന് വേണ്ടി ധനസമാഹരണം വരെ നടത്തിക്കൊണ്ട്. 

ഉത്തരേന്ത്യയിൽ നടക്കുന്ന ഏതൊരു ആൾക്കൂട്ടകൊലപാതകത്തിനും പശുക്കൊലക്കും പിന്നിൽ പല സംഘടനകളും ശക്തികളും ഇന്നിത്തുവരെ നിന്നതും നിൽക്കുന്നതും പോലെയും അപ്പോഴൊക്കെയും ഭരണനേതൃത്വം കൃത്യമായ മൗനം നടിക്കുന്നത് പോലെയും.

*******

കുറ്റം മാത്രം പറയുമ്പോഴും ഒന്ന് പറയട്ടെ. 

ഇങ്ങിവിടെ തല്ലിക്കൊന്ന ഇതേ പോലുള്ള താഴ്ന്ന ജാതിക്കാരൻ മധുവിൻ്റെ കാര്യത്തിൽ അങ്ങവിടെ ഒരു മുഖ്യമന്ത്രി ചെയ്തത്ര പോലും ഇവിടെയുള്ള ഭരണാധികാരികൾക്കും പാർട്ടികൾക്കും ചെയ്യാൻ സാധിച്ചില്ല എന്നതും നാം ഓർക്കണം, എടുത്ത് പറയണം. 

ഒരൊറ്റ വ്യത്യാസം മാത്രം. അങ്ങവിടെ മൂത്രമൊഴിച്ചത് പ്രത്യേകിച്ച് ഒരു കാരണവും കുറ്റവും പറയാനില്ലാതെ. കൃത്യമായ ജാതി ഉച്ചനീചത്വ മനസ്സ് വെച്ച്. 

ഇങ്ങിവിടെ തല്ലിക്കൊന്നത് ഒരു ചെറിയ കളവ് ആരോപിച്ചു കൊണ്ട്. തീർത്തും അപ്പപ്പോഴുണ്ടായ ഉടനടി പ്രതികരണപരത വെച്ച്. വഴിവിട്ട ആൾക്കൂട്ട മനശാസ്ത്രത്തിന് വഴിപ്പെട്ട് കൊണ്ട്.