നോട്ട് നിരോധനം ഉണ്ടാക്കിയ വലിയ ദുരന്തം.

ഇന്ത്യയുടെ ഇപ്പോഴത്തെ അവസ്ഥയിൽ 

നമുക്കുണ്ടാവുന്ന ദുഃഖം 

നമ്മുടെ എല്ലാവരുടെയും 

ആത്മാർഥതയെ മാത്രം സൂചിപ്പിക്കുന്നു.

*****

നാം അറിയാതെപോയ, 

ശ്രദ്ധിക്കാതെ പോയ 

ഒരു വലിയ ദുരന്തമുണ്ട്. 

നോട്ട് നിരോധനം ഉണ്ടാക്കിയ 

വലിയ ദുരന്തം. 

അത് ഇന്ത്യക്കുള്ളിൽ ഉണ്ടായ 

ദുരന്തമല്ല. 

പകരം, 

അന്താരാഷ്ട്ര നാണയ മാർക്കറ്റിൽ 

ഇന്ത്യൻ രൂപ 

ഒന്നിനും കൊള്ളാത്തത്, 

ആശ്രയിക്കാൻ പറ്റാത്തത് 

എന്ന് തോന്നിപ്പിച്ച 

വൻദുരന്തം. 

ഇന്ത്യൻ രൂപയുടെ മൂല്യം 

അങ്ങേയറ്റം ഇടിച്ചു താഴ്ത്തിയ 

വലിയ ദുരന്തം.

ഇന്ത്യ 

റഷ്യയിൽ നിന്നും വാങ്ങിയ 

പെട്രോളിന്,

റഷ്യക്കെതിരെയുള്ള 

അമേരിക്കൻ യൂറോപ്യൻ ഉപരോധം കാരണം, 

അമേരിക്കൻ ഡോളറിന് പകരം,

വില നൽകിയത് 

ചൈനീസ് യുവാനിലാണ്. 

പിന്നെ യുഎഇ ദിർഹത്തിലും. 

അപ്പോഴും, പ്രധാനമായും 

ഇന്ത്യൻ രൂപയിൽ അല്ല.

വളരേ കുറവല്ലാതെ.

കാരണം, ഇന്ത്യൻ രൂപയെ 

ആരും വിശ്വസിക്കുന്നില്ല.

പ്രത്യേകിച്ചും 

തീർത്തും അപക്വമായ

ഒരുപകാരവും ചെയ്തിട്ടില്ലാത്ത,

ഒരു കള്ളപ്പണവും പിടിച്ചിട്ടില്ലാത്ത 

നോട്ട് നിരോധനത്തിന് ശേഷം.

******

ഒന്നും ഉണ്ടായിട്ടല്ല. നോട്ട് നിരോധിച്ച സമയത്തും ഒരു നോട്ട് പോലും ബാങ്കിൽ കൊണ്ടുപോയി ഇടേണ്ടി വന്നിട്ടുമില്ല.

തിരിച്ചും മറിച്ചും ഒക്കെ കാഴ്ചപ്പാടുകൾ ഉണ്ടല്ലോ, ഉണ്ടാവണമല്ലോ? 

അത് മാത്രമാണ് ഇത്. ഇത് ഉളളത് മാത്രം പറഞ്ഞതുമാണ്.

ഇന്ത്യയെ സ്നേഹിക്കുന്നതിൻ്റെ ഭാഗമായി തന്നെ ഇന്ത്യക്ക് ദോഷമായി ഭവിക്കുന്ന എന്തുണ്ടെങ്കിലും പറയണമല്ലോ?

രാജ്യവും രാജ്യത്തിൻ്റെ നൻമയും ആണല്ലൊ വലുത്.

രാജ്യമെന്നാൽ ഭരണകൂടം അല്ലല്ലോ.

ഭരണകൂടം ഏതായാലും രാജ്യത്തിന് നന്മ വരണം.  നന്മ വരുന്നില്ലെങ്കിൽ അത് തുറന്ന് കാണിക്കണം. അതാണ് രാജ്യസ്നേഹം.

ഭരണകൂടം ഏതായാലും ശരിയും തെറ്റും ചെയ്തുപോകും. തെറ്റ് പറ്റുക എന്നത് മാനുഷികമായതിനാൽ.

ആ തെറ്റ് ചൂണ്ടി കാണിക്കണം, ശരിയെ അംഗീകരിക്കണം. രാജാവ് നഗ്നനെങ്കിൽ നഗ്നനെന്ന് തന്നെ പറയണം.

ഭരണകൂടം ഏതായാലും ശരി മാത്രമേ ചെയ്യൂ എന്ന് കരുതുന്നത് ഭരണകൂടത്തെ ദുഷിപ്പിക്കുക മാത്രമല്ലേ ചെയ്യുക? 

ജനാധിപത്യത്തിൽ ജനങ്ങൾ തന്നെ ഭരണകൂടത്തെ കൃത്യമായി വിലയിരുത്തി വിമർശിച്ച് തിരുത്തുന്ന പ്രതിപക്ഷമായി ഭവിക്കണം.

മനസ്സാക്ഷിയോട് നീതി പുലർത്തിക്കൊണ്ട്.

ഒരുതരം നിക്ഷിപ്ത സ്വാർത്ഥ താല്പര്യങ്ങൾക്കും നിൽക്കാതെ.

ഒരുതരം നിക്ഷിപ്ത സ്വാർത്ഥ താല്പര്യങ്ങളും രാജ്യതാൽപര്യം സംരക്ഷിക്കുന്നതിൽ തടസ്സമാവാതെ.

ശുദ്ധ ഭാരതീയനായി നിന്ന് കൊണ്ട്. ശുദ്ധ ഭാരതീയതയിൽ വിശ്വസിച്ച് കൊണ്ട്.