പ്രാർത്ഥന: പ്രതിഷേധം തന്നെ. കുറ്റം ചൂണ്ടിക്കാട്ടി പ്രതിഷേധിക്കുക തന്നെ

അനേകായിരം കോടി 

സംഗതികളും ഘടകങ്ങളും 

അൽഭുതകരമാം വിധം 

സംഘടിച്ചും പ്രവത്തിച്ചുമാണ്  

ഈ ശരീരവും ജീവിതവും എന്നത് 

ജീവിതത്തിൻ്റെ സാധ്യത വർദ്ധിപ്പിക്കുന്നില്ല. 

തിന്നും കുടിച്ചും ഉറങ്ങിയും 

വിസർജിച്ചും ഇണതേടിയും ഉള്ള  

ജീവിതത്തിന് മറ്റൊരർത്ഥം ഉണ്ടാക്കിത്തരുന്നില്ല.

*******

ലോകവും ലോകത്തുള്ളതും

വലിയ വലിയ കാര്യങ്ങളാണ് 

എന്നത് കൊണ്ട്

നിൻ്റെ ജീവിതം എങ്ങനെ

അർത്ഥമുള്ളതാവും?

******

ജീവിതം എന്തോ വലിയ സംഗതിയാണെന്ന് 

നമ്മൾ വെറുതേ മേനിപറയുകയാണ്. 

നഗ്നനായ രാജാവിൻ്റെ 

വസ്ത്രത്തിൻ്റെ മേനിപറയും പോലെ. 

ചുരുങ്ങിയത് രാജാവിൻ്റെ നഗ്നത 

പറയാത്തത് പോലെ.

******

ഇത്രയെല്ലാം കഷ്ടപ്പെട്ട്, 

അധ്വാനിച്ച്, വേദനിച്ച് രണ്ടറ്റം മുട്ടിച്ച് 

ജീവിക്കേണ്ടിവരുന്ന 

ഒന്നിനും കൊള്ളാത്ത ജീവിതം തന്ന 

ദൈവത്തിൻ്റെ മുൻപിൽ, 

ഉണ്ടെങ്കിൽ ഉള്ള ദൈവത്തിൻ്റെ മുൻപിൽ, 

ചുരുങ്ങിയത് മുഴുവൻ മനുഷ്യരും 

പ്രതിഷേധിക്കേണ്ടതാണ്. 

ഈ ജീവിതം വേണ്ടെന്ന് വെച്ച് 

പ്രതിഷേധിക്കേണ്ടതാണ്.

ഓരോ പ്രാർത്ഥനയും 

ഫലത്തിൽ 

ഒരർത്ഥവുമില്ലാത്ത ജീവിതം 

ദുരിതപൂർണമായി 

എന്തിനെന്നറിയാതെ 

ജീവിക്കുന്നതിൻ്റെ, 

ജീവിക്കേണ്ടി വരുന്നതിൻ്റെ 

പ്രതിഷേധം തന്നെയാണ്. 

കുറ്റവും പോരായ്മയും ചൂണ്ടിക്കാട്ടി 

പ്രതിഷേധിച്ച് പറയുക തന്നെയാണ് 

പ്രാർത്ഥന.

*******

ബോധോദയം നേടാൻ, 

തിരിച്ചറിവ് കിട്ടാൻ 

അനേകവർഷങ്ങൾ 

കാട്ടിലും മലയിലും മാറിയിരുന്ന് 

തപസ്സിരിക്കണമെന്നാര് പറഞ്ഞു? 

ആശുപത്രി വരാന്തയിൽ 

ഒരു നിമിഷമിരുന്നാൽ മതി. 

ബുദ്ധൻ്റേയും കൃഷ്ണൻ്റെയും 

യേശുവിൻ്റെയും കാലത്ത് 

ആശുപത്രി വരാന്ത ഇല്ലാതെ പോയി.