ഒരു കുന്തവും ജീവിതത്തിലില്ല.

അറിയായ്കയെ 

അറിയായ്‌കയായി മനസ്സിലാക്കി 

അറിയില്ലെന്നറിയുന്ന, 

അറിയില്ലെന്ന് പറയുന്ന 

അറിവേ എനിക്കുള്ളൂ. 

അതിനെ നിങൾ 

വിവരക്കേടെന്ന് വിളിച്ചാലും 

ബോധോദയമെന്ന് വിളിച്ചാലും 

ഒരു വ്യത്യാസവുമില്ല. 

******

മരിക്കും. 

ഉറപ്പാണ്. 

എന്നാലും മരിക്കാൻ തയ്യാറല്ല, 

പേടിയാണ്. 

ഒരു കുന്തവും ജീവിതത്തിലില്ല. 

എന്നാലും ജീവിക്കാൻ തന്നെയാണ് ത്വര. 

വെറുതേ തിന്നും ഉറങ്ങിയും 

ജോലി ചെയ്തും വിസാർജിച്ചും 

വാശിപിടിച്ച് ജീവിക്കുക തന്നെ.

******

കടൽക്കരയിൽ മണൽ കൊണ്ട് 

പണിയുന്ന വീട് പോലെ 

എന്തെല്ലാം വേഷങ്ങളും വ്യക്തിത്വങ്ങളും 

നാം ഉണ്ടാക്കി, ഉണ്ടാക്കാൻ ശ്രമിച്ചു. 

എല്ലാം തിരമാലകൾ വിഴുങ്ങിക്കൊണ്ടുപോയി. 

കടലും തിരമാലകളും കരയും 

അപ്പടി ബാക്കി. 

ജീവിതമായ്.

*****

വിശ്വാസവും നിഷേധവും 

യുക്തിക്ക് ബോധ്യപ്പെടാത്തത് കൊണ്ട്. 

ബോധ്യപ്പെടുന്നില്ലെന്നത് 

ഇല്ലെന്നതിനും ഉണ്ടെന്നതിനും ന്യായമല്ല. 

ബോധ്യപ്പെടാത്തത് 

വിശ്വസിക്കേണ്ടതില്ല എന്ന് മാത്രം. 

ഇല്ലെന്നും ഉണ്ടാവില്ലെന്നും അർത്ഥമുള്ളത് കൊണ്ടല്ല. 

മനസ്സിലാവില്ലെന്ന് മനസ്സിലാക്കുന്ന ആത്യന്തികൻ 

ആ ഒരു ന്യായവും ഒഴികഴിവും 

വിശ്വാസത്തിനും അവിശ്വാസത്തിനും 

ഒരുപോലെ നൽകും.

******

എന്നെ ഞാനെന്ന് വിളിക്കാനുള്ള അധികാരവും അറിവും വ്യക്തതയും എനിക്കില്ല. 

എന്നിട്ടാണോ നിന്നെ നീയെന്ന് വിളിക്കാനുള്ള അധികാരവും വിവരവും വ്യക്തതയും എനിക്കുണ്ടാവുന്നത്?