മാനങ്ങൾ മാറിയാൽ മാനദണ്ഡങ്ങളും മാറും.

വലിയ പ്രപഞ്ചത്തിലെ ചെറിയ ഭൂമി.

വലിയ ഭൂമിയിലെ ചെറിയ മനുഷ്യൻ.

പകച്ചും നിസ്സഹായനായും പോകും. 

വിശ്വാസങ്ങൾ ഉണ്ടായില്ലെങ്കിലേ ഉള്ളൂ.

*******

ഒന്നും ആവാനില്ല. 
അവനവനും അതാതും തന്നെയല്ലാതെ.

ഒന്നും ആവാത്തവർ തന്നെ മഹാഭൂരിപക്ഷവും.

എന്തെങ്കിലും ആയവർ ജീവിതം നഷ്ടപ്പെടുത്തിയവരും.

********

എല്ലാവരും കൊതിക്കുന്നു.

പക്ഷെ, ആർക്കും കൊതിക്കും പോലെ 

ജീവിക്കാനാവുന്നില്ല. കൊതി അറിയായ്ക മൂലം. 

ആവും പോലെ ആവാനേ ആവൂ. 

**********

മാനങ്ങൾ മാറിയാൽ മാനദണ്ഡങ്ങളും മാറും.

അപ്പോഴറിയും അറിഞ്ഞ സത്യങ്ങൾ

ആപേക്ഷികങ്ങൾ മാത്രമായിരുന്നു എന്ന്.

എല്ലാം ഒരുപോലെ തെറ്റ്, അതിനാൽ ശരി.

*********

നരകത്തെ പേടിയില്ല, സ്വർഗത്തെ കൊതിയില്ല.

എങ്കിലും, ഇന്ന് മരിക്കുമെന്നാലും സംതൃപ്തൻ.

മരിക്കുമ്പോഴും സ്വാര്ഥതയെ ചുമന്നു നടക്കാനില്ല. 

*********

ജീവിക്കുവോളം ജീവിക്കും. 

ജീവിക്കാൻ വേണ്ടതും ആവുന്നതും ചെയ്യും.

വിശ്വാസം ആശ്വാസത്തിനും കുറ്റബോധം തീർക്കാനും.

അങ്ങനെ തന്നെ എല്ലാവരും.

********

നിരുപാധികമായതു സ്നേഹം.

ഉപാധികളുള്ളത് ഇഷ്ടം. 

പ്രേമം ബഹുമാനവും അംഗീകാരവും കൂടിയാണ്.

*********

ആരും തൊടാത്ത, തൂങ്ങി നിൽക്കാത്ത മുലകളുള്ള 

തരുണീമണികളെ വാഗ്‌ദാനം പറയുന്നതിലും 

കൊതിക്കുന്നതിലും എന്ത് ആത്മീയത, നിര്മലത?

***********

നീതി ജീവിക്കുന്നവരോട്.

മരിച്ചാൽ ചെയ്യുന്നത് നിങ്ങൾക്കു വേണ്ടി.

മരിച്ചവരോട് ചെയ്യാനാവുന്ന നീതി ഇല്ല.

ആത്‌മാവ്‌ എന്നാൽ മരിച്ചവൻ അല്ല

*******

1/2+1/2=1 എന്നത് വെറും കണക്ക്

ജീവിതത്തിൽ അത് -2.

എങ്ങിനെയെന്ന് ചോദിക്കരുത്. എങ്ങിനെയും.

ജീവിതത്തിൽ മുഴുവൻ ഒന്ന് തന്നെയേ ഒന്നാവൂ.

******** 

കൗമാരം. നൂറു ജനാലകൾ ഒരുമിച്ചു തുറക്കും.
മാതാപിതാക്കളാം ഒരു ജനാല അടയും.
തനിക്കെതിരെ താനാവും.
വജ്രം കല്ലും കല്ല് വജ്രവുമാകും.

**********

എല്ലാം ശരിയെന്നു പറയുന്നത്

എല്ലാം തെറ്റെന്നു പറയാതിരിക്കാനാണ്.

പരിമിതമായ ശരിയേ ഉള്ളൂ.

ആത്യന്തികതയിലേക്കു എത്താനാവാത്ത ശരി. 

*********

സ്വാതന്ത്ര്യം ചെയ്യുന്നതിലും ഭോഗിക്കുന്നതിലും അല്ല; 

ചെയ്യേണ്ടിയും ഭോഗിക്കേണ്ടിയും വരാതിരിക്കുന്നതിലാണ്. 

ചെയ്യേണ്ടിയും ഭോഗിക്കേണ്ടിയും വരുന്നത്  അടിമത്വമാണ്.

*********

ദൈവം തന്നെ പിശാച്.  

നന്മ തന്നെ തിന്മ, തിന്മ നന്മയും.

നന്മയും തിന്മയും ദൈവം, ഒന്ന്.

എല്ലാം ദൈവം, ദൈവത്തിൽ നിന്ന്. പിന്നെന്ത്?  

********

അനാവശ്യങ്ങൾ ആവശ്യങ്ങളായാൽ 

അനർഹർക്ക്  ഭരണം,

മരുഭൂമിയിൽ സമൃദ്ധി, മലർവാടിയിൽ ദരിദ്ര്യം.

അപ്പോൾ ജീവിതമെന്നാൽ ജോലി, അർഹത ശാപം.

********** 

തലച്ചോറിന്റെ ഞാൻ മാത്രം.

ഓട്ടിസവും അൽഷിമേഴ്സും അപസ്മാരവും 

'ഞാൻ' എന്നതില്ലാതാക്കുന്നത് അതിനാൽ.

ബാക്കിയാവുന്ന 'ഞാൻ' ജീവിതം, ദൈവം.

***********

പരലോകം സ്വാർത്ഥതയുടെ എക്സ്റ്റൻഷൻ കൗണ്ടറോ?  

ആത്മീയതയിലും സ്വാര്ഥതാമോഹങ്ങളോ? 

തീവ്രവാദത്തിനും അസഹിഷ്ണുതക്കും ന്യായം 

സ്വാർത്ഥത? 

***********

അത്ഭുതം കണ്ട് കൂടെ കൂടിയവർ 

കീഴ്‌വായു കേട്ടാൽ തിരിച്ചു പോകുന്നവരെ ആവൂ.

അനുകരണവും ഒളിച്ചോട്ടവും അല്ല ആത്മീയത. 

പിന്തുടരൽ.

*********

അനുകരണവും ഒളിച്ചോട്ടവും 

ഫാഷനും കൊണ്ട് സത്യസാക്ഷാത്കാരം നടക്കില്ല.

അറിയായ്കയും അസൂയയും നിസ്സഹായതയും പേടിയും ആവരുത് 

ആശയവും ആദർശവും.

********

നഷ്ടപ്പെടാൻ തയാറായവനെ നേടൂ. 

വിറകും അരിയും നഷ്ടപ്പെടുത്താതെ ചോറ് ഇല്ല. 

നേർമാർഗം അന്വേഷിക്കുമ്പോൾ, 

നിലവിലുള്ളതിനെ സംശയിക്കണം.

*********

നിന്നേടത്തു നിന്നാൽ 

നടക്കലും ചലിക്കലും ആവില്ല. 

നടക്കാൻ, ചലിക്കാൻ 

നിന്നേടത്തെ നഷ്ടപ്പെടുത്തണം.  

**********

മുഹമ്മദ് രാഷ്ട്രമുണ്ടാക്കി.

രാഷ്ട്രം ഇസ്‌ലാമിനെയും മുഹമ്മദിനെയും ഉണ്ടാക്കി.

അതിൽ ഇസ്ലാം കെട്ടും മട്ടുമുള്ളതായി. 

സ്‌പോൺസേർഡ് മതമായി.