എന്താണ് ജനാധിപത്യം? ഇടിമുഴക്കമായ് ജുഡീഷ്യറി, മിന്നേറായ് ലെജിസ്ലേറ്റീവ്, മഴയായ് എക്സിക്യൂട്ടീവ്.

എന്താണ് ജനാധിപത്യം?

ജനങ്ങളുടെ വിചാരവും നികുതിയും 

ആവിയായി പൊങ്ങി, മേഘമായി തങ്ങി, 

മിന്നേറായ് ഇടിയായ് ക്ഷേമ മഴയായ് വർഷിക്കേണ്ട പ്രക്രിയ.

*********

ജനാധിപത്യം. 

മേഘം മൂന്നു സ്തംഭങ്ങളെ ഉൾകൊള്ളുന്നു.

മിന്നേറായ് ലെജിസ്ലേറ്റീവ്, 

ഇടിമുഴക്കമായ് ജുഡീഷ്യറി, 

മഴയായ് എക്സിക്യൂട്ടീവ്.

********

ജനാധിപത്യം. 

മിന്നേറ് വെളിച്ചമാണ്, വഴിയാണ്, നിയമമാണ്.

ഇടിമുഴക്കം ആ വഴിയിലെ വിശദീകരണമാണ്‌, തിരുത്താണ്. 

മഴ അനുഭവമാണ് , ആശ്വാസമാണ്, ജീവിതമാണ്.

  

********

ജനാധിപത്യം. അനുഭവത്തിൽ കൂടുതൽ മഴ.

എക്സിക്യൂട്ടീവ്. എപ്പോഴും പെയ്തില്ലെങ്കിലും 

എപ്പോഴും വെള്ളം നൽകണം. അതിനുള്ള മഴ.

*********

മഴ മേഘത്തിലെ മൂന്നു കാര്യങ്ങളും അങ്ങനെ. 

അങ്ങിനെയാവണം ജനാധിപത്യത്തിന്റെ 

മൂന്നു സ്തംഭങ്ങളും പ്രവൃത്തിക്കേണ്ടത്.

ക്ഷമമഴയെ മാത്രം വർഷിപ്പിക്കാൻ

**********

ജനാധിപത്യം. ലക്‌ഷ്യം രാജ്യമല്ല; വ്യക്തി.

ഭരണമല്ല; ഭരിക്കാനില്ലാത്തത്ര ജനങ്ങളെ

വളർത്തൽ. മനുഷ്യന്റെ വികാസം.

രാഷ്ട്രീയ ആത്മീയത.

******** 

ജനാധിപത്യം. 

പൂർണതയെ അന്വേഷിക്കുന്ന പ്രക്രിയ. 

മാറും, പരിണമിക്കും 

ഓരോരുവനും സ്വാതന്ത്ര്യവും വളർച്ചയും  

ഉറപ്പു വരുത്തുന്നത് വരെ.

************

ജനാധിപത്യം.  അധികാരം എന്നതില്ല. 

അധികാരം ഇല്ലായ്മയും 

അധികാരം എത്രയും കുറയലും 

കുറക്കലും ആണത്.

**********

ജനാധിപത്യം. അധികാരം ജനങ്ങളിലായതിനാൽ 

വിതരണം ചെയ്യപ്പെട്ടു കിടക്കുന്നു. അതിനാൽ ഒട്ടും ഭാരമില്ലാതെ.

ഭാരമില്ലാത്ത ഭാരമല്ലാത്ത അധികാരം

*********

ജനാധിപത്യത്തിൽ

പാർട്ടികളെയും നേതാക്കളെയും

രക്ഷപ്പെടുത്താനുള്ള രാജ്യമില്ല.

ജനങ്ങൾക് വേണ്ടിയുള്ള രാജ്യമേ ഉണ്ടാവൂ. 

**********

നോക്കൂ, ജനാധിപത്യത്തിലെ ജൈവികത.

വേര് കൊടുക്കുന്നത് വെളിച്ചവുമായി കൂട്ടിക്കുഴച്ചു 

ക്ഷേമഭോജനമാക്കേണ്ടത് കൊമ്പത്തെ

അധികാരികളുടെ ബാധ്യത.

**********

ജനാധിപത്യം ജൈവികം.

നൽകും, തിരിച്ചു നൽകണം.

ഉച്ഛസിക്കും, തിരിച്ചു ശ്വസിക്കണം.

അതല്ലേൽ, ജനാധിപത്യം മരിക്കും. നീയും.

**********

ജനാധിപത്യം ജൈവികം.

അധികാരം പ്രകാശ സംശ്ലേഷണം നടത്തും.

ജനങ്ങൾ നൽകുന്നതിൽ വെളിച്ചം ചേർത്ത്

പഴവും പൂവും തണലും ശുദ്ധ വായുവും നൽകും.

*************

ജനാധിപത്യം. ആവിയായിപ്പോങ്ങിയത്  

മേഘമായ് നില്ക്കാൻ മാത്രമാവരുത്.

ഇരുട്ട് മാത്രം സംഭാവനയാക്കാൻ.

ബാധ്യതകളുടെ മാത്രം ഇരുട്ട്.

*********  

ജനാധിപത്യം. എവിടെനിന്ന് ആവി പൊങ്ങിയോ 

അവിടെ തന്നെ മഴയായ് വർഷിക്കേണം. 

അതിന് രാജ്യം ചെറുതാവുന്നത് ഉത്തമം.

സംഘം ശരണം ഗച്ഛാമി.

******** 

ജനാധിപത്യം. പാർട്ടികളുടെ 

ജനങ്ങളുടെ മേലുള്ള ആധിപത്യമല്ല.

പ്രതിനിധികൾ ഉദ്ധ്യോഗസ്ഥന്മാരുടെ 

സ്റ്റാമ്പ് ആവുന്ന പ്രക്രിയയും അല്ല.

********

ജനാധിപത്യം. 

ഭരണവും ഭരണവിരുദ്ധ തരംഗവുമല്ലാത്ത 

ഒരു പ്രത്യേയശാസ്ത്രവും ദർശനവും ഇല്ലാത്ത

കുറെ പാർട്ടികൾ ഉണ്ടാവാനുള്ള ന്യായമല്ല.

*********

ജനാധിപത്യം.

മുൻ പ്രധാനമന്ത്രിമാരെയും മുഖ്യമന്ത്രിമാരെയും 

മന്ത്രിമാരെയും, എം പി, എം ൽ എ മാരെയും 

സ്ഥിരം പോറ്റുന്ന പരിപാടിയല്ല.

***********

ജനാധിപത്യം. സാധിക്കാൻ

ഏറ്റവും വിദൂര സാധ്യതയുള്ള നാട് ഇന്ത്യ.

നാടിന്റെ വലുപ്പവും ജനങളുടെ പെരുപ്പവും

വിവരക്കേടിന്റെ ആധിക്യവും തന്നെ കാരണം.

*********

ഏറ്റം മോശമായവരെ ജനം തിരഞ്ഞെടുത്താൽ, 

അതിൽ ഏറ്റം മോശമായവനെ 

പ്രധാനമന്ത്രിയും മുഖ്യമന്ത്രിയുമാക്കിയാൽ 

എങ്ങിനെ ജനാധിപത്യമാകും?