ജീവിതം സാർത്ഥകം എന്ന് പറയുന്നത് വെറും വാക്ക് മാത്രം.

ജീവിതം ആകെമൊത്തം നോക്കിയാൽ, 

യഥാർത്ഥത്തിൽ ഒരേയൊരൊന്ന്, 

അല്ലെങ്കിൽ ഒരെയൊരാൾ ജീവിക്കാനേയുള്ളൂ. 

ബാക്കിയെല്ലാ ജീവിതങ്ങളും വെറും ആവർത്തനങ്ങൾ. 

പേരുകളും കോലങ്ങളും രൂപങ്ങളും മാറുന്നു. 

ജീവിതം ഒന്ന് തന്നെ. 

ജീവിതത്തിൽ ചെയ്യുന്നതും ഒന്ന് തന്നെ.

*******

ജീവിതം സാർത്ഥകം, 

ജീവിതം  സാർത്ഥകമാകുന്നു എന്നൊക്കെ 

നമുക്ക് വെറും വെറുതെ പറയാം. 

പക്ഷേ, അവയൊക്കെ 

വെറും വാക്കുകൾ മാത്രം. 

ആർക്ക്, എന്ത് 

അർത്ഥ-ലക്ഷ്യ സാക്ഷാൽക്കാരം നടക്കുന്നു?  

ജീവിതത്തിനുള്ളിലെ ചെറിയ തോന്നലുകളുടെയും 

ആ തോന്നലുകൾ ഉണ്ടാക്കിയ 

ആപേക്ഷികമായ നേട്ടങ്ങളുടെയും 

സാക്ഷാൽക്കാരവും അർത്ഥവും മാത്രമല്ലാതെ.

*******

മതം പറയുന്നത് പോലുള്ള ദൈവമില്ല. 

മതം പറയുന്നത് പോലെയല്ല 

ഉണ്ടെങ്കിൽ ഉള്ള ദൈവം. 

ദൈവത്തിന് മതമില്ല. 

ഉണ്ടെങ്കിൽ ഉള്ള ദൈവത്തെ 

മതം ചുരുക്കുന്നു. 

ചുരുങ്ങിയ ദൈവം പിശാചാകുന്നു. 

പിശാചായ ദൈവം വിഭജനവും വെറുപ്പുമുണ്ടാക്കുന്നു.