വിവാഹം പെണ്ണ് കെട്ടലല്ല, പെണ്ണ് പുരുഷനെ കെട്ടിയിടലാണ്.

വിവാഹം പെണ്ണ് കെട്ടലല്ല, 

പെണ്ണ് പുരുഷനെ കെട്ടിയിടലാണ്. 

രണ്ട് പേർ എന്നും ഒരുമിച്ചവാൻ മാത്രം

എന്തെങ്കിലുമുണ്ടോ ലൈംഗികതയിൽ?

*********

വിവാഹം. ആകാശമായ്, സ്വപ്നമായ് 

വിപ്ലവം പറഞ്ഞു പറക്കുന്ന പുരുഷന്

ഭൂമി ഇടുന്ന കെട്ട്. ബാധ്യതകളുടെ ഭാരമേറ്റി 

താഴേക്കിറക്കുന്ന കെട്ട്. 

*********

വിവാഹം. പുരുഷന്റെ വിപ്ലവവും സ്വപ്നവും 

ചോർത്തിക്കളയുന്ന മാളം.

പുരുഷന്റെ ആക്രോശം മേധാവിത്വമല്ല.

പരാജയം. നിരാശ. അശക്തി.

*******

വിവാഹം. സാമൂഹികം; പ്രകൃതിപരമല്ല.

സ്ത്രീപുരുഷവും സ്വവർഗവും പ്രകൃതിപരം.

ഒന്നും തീരുമാനമല്ല; ഹോർമോണൽ 

നിസ്സഹായത, പ്രകൃതി, പ്രകൃതം.

******

വിവാഹം. സങ്കല്പത്തിൽ കിരീടം. 

അനുഭവത്തിൽ കുരിശ്.

സ്ത്രീ അഗ്നി. വന്നലക്കുന്ന 

മഴപ്പാറ്റയുടെ വിധി മാത്രം പുരുഷന്റേത്. 

********

വിവാഹം. 

സ്ത്രീ ഭൂമി. യാഥാർത്ഥം. പിടിച്ചു നിൽക്കും.

പുരുഷൻ ആകാശം. സങ്കൽപം. പിടിച്ചു നിർത്തണം.

സങ്കല്പത്തിന് ശക്തി വേണം. അല്ലേലത് അപ്രസക്തം   

********

വിവാഹം. പുരുഷൻ ശക്തി തോന്നിപ്പിക്കും. 

അശക്തനും അമൂർത്തനുമാകയാൽ. 

സ്ത്രീക്ക് ശക്തി തോന്നിപ്പിക്കാനില്ല.

യാഥാർത്ഥവും ഉള്ളതുമാകയാൽ.    

********

വിവാഹം. പുരുഷൻ കല്ല് പോലെയെന്നത് ശക്തിയല്ല.

വെള്ളമായ സ്ത്രീയിൽ ലയിച്ചില്ലാതാവുന്നത്.

സ്ത്രീയുടെ ഉപകാരണമാവുന്നതിന്റെ 

നിരാശ അവന്റ ആക്രോശം.

********

വിവാഹം. ഭാര്യ ഉണ്ടേലും വാസ്തവം പറയാം.

സ്ത്രീ ചാലക ശക്തി. 

എത്രയെല്ലാം മസിൽ  പിടിച്ചാലും 

പുരുഷൻ ഉപകരണം.

*********

വിവാഹം. സ്ത്രീ ശ്രമിക്കാതെ നേടും; 

പുരുഷൻ ശ്രമിച്ചു നഷ്ടപ്പെടും.

അതിനാൽ പുരുഷനു കവിയും ചിന്തകനും 

അധികാരിയും പ്രവാചകനും ആവേണ്ടിവരും.

********

വിവാഹം. സ്ത്രീ സ്വയം തെളിഞ്ഞിരിക്കുന്നവൾ.

ബോറടി അവൾക്കില്ല.

സ്വയം തെളിയാത്ത പുരുഷന് അസ്വസ്ഥത. 

അവനു തെളിയിക്കേണ്ടി വരുന്നു.

******

സ്ത്രീയെയും സ്ത്രീയുടെ ലോകത്തെയും 

സൂക്ഷിക്കുക എന്നതല്ലാത്ത ഒന്നും 

പുരുഷന് എന്തെല്ലാം 

നാട്യങ്ങളുണ്ടാക്കിയാലും ചെയ്യാനില്ല.

******* 

വിവാഹം. പെങ്കോന്തന്മാർ എന്നതില്ല.

കംഫർട് സോണിൽ ആനന്ദിക്കുന്നവർ മാത്രം.

മസിൽ പിടിച്ചു നേടാനൊന്നുമില്ല;

നഷ്ടപ്പെടാനേരെയുണ്ട് എന്നറിയുന്നവർ.

*******

ദാമ്പത്യം. തോറ്റുകൊടുക്കുന്നതിൽ വിജയം.

ജയിച്ചേ തീരൂ എന്നാൽ, കുട്ടനും മുട്ടനും ചാവും. 

ഒരാൾ തോറ്റുകൊടുത്താൽ രണ്ടാളും വിജയിക്കും.

*********** 

വീട്ടിൽ കൗമാരക്കാരൻ. 

ഏതു നിമിഷവും പൊട്ടിത്തെറിക്കാവുന്ന

ബോംബ് കൈകാര്യം ചെയ്യുക 

അതിലും എളുപ്പം. 

*********

ദാമ്പത്യം. തട്ടാന്റെ ഉലയിലെ തീ പോലെ നന്മ.

തുടക്കത്തിൽ വളരെ കുറച്ച്. 

അംഗീകരിച്ചും അഭിന്ദിച്ചും

ഊതിക്കാച്ചിയാൽ ഉല മുഴുവൻ തീ. 

********

വിവാഹം. പ്രകൃതിപരമല്ലെങ്കിൽ പിന്നെങ്ങിനെ ദൈവികം? 

ഒന്ന് മാത്രം ഇഷ്ടപ്പെട്ടു അന്ധരാവുക ആർക്കു സാധ്യം? 

പേടിച്ചു വേണ്ടെന്നു വെച്ചാലും, നടിച്ചാലും.

*********

പ്രേമം ലൈംഗികം. വെറും ഹോർമോണൽ.

നിരുപാധികവും അഭൗതികവും അല്ല.

ജീവിതം തുടർച്ചക്കു വേണ്ടി ഉണ്ടാക്കുന്ന കെണി.

എല്ലാവരും വീണു പോകുന്ന കെണി. 

********

വിവാഹം. വെറും അഡ്ജസ്റ്മെന്റ്. 

ലൈംഗികത മാനങ്ങളിലെ തടവറയിൽ.

വെറും ഹോർമോണൽ.

ഇതര ജീവികളോട് തോന്നാത്തത് അതിനാൽ.

********

വിവാഹം. സ്ത്രീ സുരക്ഷ മാത്രം ലക്‌ഷ്യം.

പുരുഷ ലൈംഗികത വെറും പൊള്ള. 

സമൂഹം നിന്ന് ബാദ്ധ്യതയാക്കുന്നില്ലേൽ,

അവൻ ഒളിച്ചോടിപ്പോകും.

********

മുഖത്തെ സൗന്ദര്യം … ൽ ഇല്ല.

സങ്കല്പത്തിലേത് ദാമ്പത്യത്തിലുമില്ല.

പേടിച്ചും അഭിമാനം സൂക്ഷിച്ചും

പിന്നെല്ലാം ഒരൊത്തുപോക്ക്, അഭിനയം. 

*********

പുരുഷൻ. ആകാശം. ശൂന്യം.

സ്ത്രീ. ഭൂമി. നിറഞ്ഞത്. അതിനാൽ പുരുഷന് 

കവിയും ചിന്തകനും പ്രവാചകനും 

അധികാരിയുമാകേണ്ടി വരുന്നു.

********

വിവാഹം. അധികാരിയും കവിയും പ്രവാചകനും

ഒക്കെയായ പുരുഷൻ ഒന്നുമല്ലാതാവും.

ജീവിതമെന്ന പ്രതലത്തിൽ തട്ടിയുടയും.

ഭ്രാന്തന് വിവാഹം ചികിത്സ.

********

വിവാഹം. സൂചി വെക്കാൻ ഇടം. 

സ്ത്രീ ഒട്ടകം വെക്കും. 

പുരുഷൻ  മാവേലി ആവും.

സ്ത്രീ വാമനനെയും തോൽപിക്കും.

*******

എന്തെല്ലാം മേൽക്കോയ്മാ നടിച്ചാലും

പുരുഷൻ പാരായജയം തന്നെ.

ഭൂമിയെ ചുറ്റി നിൽക്കാനേ ആകാശത്തിനു പറ്റൂ.

അല്പം മേഘങ്ങളുടെ നിഴലിട്ടാലും.

*********

വിവാഹം. അരിശവും ക്രോധവും

പരുഷന്റെ പരാജയം, നിരാശ, നിസ്സഹായത.

ചാലകശക്തി സ്ത്രീ തന്നെ.ലോകം ആയതും 

സ്ത്രീ പുരുഷനെ ചലിപ്പിച്ചുകൊണ്ട്.