നോട്ടം ശ്രമമാണ്. കാഴ്‌ച വിശ്രമവും.

തെളിഞ്ഞ വെള്ളത്തിന്‌ 

പ്രതിബിംബം ഭാരമല്ല. 

അത്പോലുമറിയാതെ 

അതിലത് സംഭവിക്കുന്നു. 

അവകാശവാദം മുഴക്കാനില്ലാതെ. 

ബോധം ചെലുത്താനില്ലാതെ.

*********

വ്യത്യസ്തമാക്കണം എന്ന് വിചാരിച്ചു പറയുന്നതല്ല. 

പരിസരവും പശ്ചാത്തലവും 

വ്യത്യസ്തമാവുന്നത് കൊണ്ട്‌ 

പറയുന്നത് വ്യത്യസ്തമാവുന്നതാണ്.

********

തലതെറിച്ച് വിളിച്ച്പറയുന്നവരെ പേടിയാവും. 

കാരണം, കാഴ്ചക്കും ഉപചാരത്തിനുമപ്പുറം 

കൂടെയിരിക്കാനോ ഇടപെടാനോ 

നീ ഉദ്ദേശിക്കുന്നില്ല.

********

നോട്ടമല്ല കാഴ്‌ച. 

കാഴ്‌ച തന്നെയാണ് കാഴ്‌ച. 

നോട്ടം ശ്രമമാണ്. 

കാഴ്‌ച വിശ്രമവും. 

നോട്ടം അല്‍പത്തെയും 

കാഴ്ച മുഴുവനെയും കാണിക്കും.

********

ആഘോഷങ്ങളുണ്ടാക്കുന്ന 

വിശ്വാസങ്ങള്‍ നിലനില്‍ക്കട്ടെ. 

ആഘോഷങ്ങളെ നിഷേധിക്കുന്ന, 

അതൊന്ന് മാത്രം ശരിയെന്ന് പറയുന്ന 

വിശ്വാസങ്ങളെ തള്ളുക.

********

സുന്ദരിയെ കാണുമ്പോള്‍  

ആര്‍ത്തവതിയാണ് എന്ന് കൂടി ഓര്‍ക്കുക. 

മായ ബോധ്യപ്പെടും. 

സുന്ദരിക്ക് വയറിളക്കം. 

മായയെ തൊടാന്‍ വേറെന്തു വേണം?

********

കുറേ പറഞ്ഞാൽ 

കുറെ ശരി ഉണ്ടാവില്ല. 

വിട്ടഭാഗം പൂരിപ്പിക്കലാണധികവും. 

വിട്ടഭാഗം കാണുക, നേരിടുക, ഒഴിഞ്ഞിരിക്കുക 

ഏവര്‍ക്കും പേടിയാകയാൽ.

********

എന്നിലെ ഞാന്‍ പോയാല്‍ 

നിന്നിലെത്തും, നീയാവും. 

നിന്നിലെ നീ പോയാല്‍ 

എന്നിലെത്തും, ഞാനാവും. 

ഞാനും നീയുമില്ലാത്ത ജീവിതം ദൈവം, പദാര്‍ഥം.

********

ദൈവം ഉണ്ടേലെന്ത്, ഇല്ലേലെന്ത്? 

ഉണ്ടേലും ഇല്ലേലും നടക്കുന്നത് നടക്കും. 

വിശ്വാസം ദൈവത്തെ കൂട്ടില്ല. 

നിഷേധം ദൈവത്തെ കുറക്കില്ല.

*******

'നിശ്ചയം, ഞാന്‍ അല്ലാഹു. 

ഞാനല്ലാത്ത ദൈവമില്ല. 

നിങ്ങളെന്നെ ആരാധിക്കുക.' 

എന്ന് ദൈവവും പറയേണ്ടിവരിക. 

എന്തൊരു നിസ്സഹായത, അല്പത്തം?!

*******

ദൈവമേ, നിനക്ക് പോലും 

'നിന്നെ', നിന്റെ "ഞാൻ" എന്ന അധികാരബോധത്തെ, 

ഉപേക്ഷിക്കാനാവുന്നില്ലെന്നോ? 

പിന്നെയാണോ ഈ ചെറിയ മനുഷ്യന്റെ കഥ?

*******

വേര്‍പാട്: പൂവായിത്തീരാന്‍ 

മൊട്ടില്‍ ഒന്നായ് നിന്ന ഇതളുകള്‍ 

പരസ്പരം അകലുന്നത്. 

അനിവാര്യമായ സുഖമുള്ള വേദന.