രാജ്യത്തിന്റെ മറപിടിച്ചു പറയുന്ന കളവുകൾ സത്യമാവുന്നു,

സ്വപ്നത്തിലെ ഭാരതവും വിശാലതയും

ന്യൂസിലാൻഡിൽ പൂത്തുലയുന്നു.

വർത്തമാന ഇന്ത്യയും കുടിലതയും

പാകിസ്താനിലും ഇസ്റായേലിലും കൃഷിയിറങ്ങുന്നു.

********* 

ആരാണ് കപടൻ? നേരും ശരിയും നേരെവന്നാലും

നിഷ്പക്ഷത പറഞ്ഞു മുഖംതിരിഞ്ഞു നിൽക്കുന്നവൻ. 

കഥയിൽ മാത്രം നേരിനെയും ശരിയേയും പൂജിക്കുന്നവൻ.

*******

അവനവന്റെ പരാജയം ആരോടെങ്കിലുമുള്ള 

ശത്രുതയും വെറുപ്പുമാകുന്നു. 

തീവ്രതയും വർഗീയതയുമായത് മാറുന്നു. 

അത്തരം പാർട്ടികൾ അതുപയോഗിക്കുന്നു.

*******

ശരീരത്തിന് വേണ്ട പ്രണയമേ ഉള്ളു.
കാണുമ്പോൾ തോന്നുന്ന സൗന്ദര്യം,
കാമം, ലൈംഗികത, അനുഭവിക്കുമ്പോൾ
നശിക്കുന്നു, വികൃതമാകുന്നു. 

***********

നിഷ്പക്ഷതത എന്നതില്ല. അതും ഒരു പക്ഷമാണ്. 

ശരി ഏതു പക്ഷത്താണോ അതായിരിക്കണം പക്ഷം.

മാറിമറിയുന്ന പക്ഷം.

*********  

എല്ലാവരും ആശംസിക്കുന്ന ദീര്ഘായുസ്സ് എന്താണ്?

കുടിയും തീറ്റയും ഭോഗവും ശ്വാസോഛ്വാസവും 

ആവർത്തിക്കുന്ന, നീട്ടുന്ന പ്രക്രിയയോ?

************

കാശ്മീരിലും ഫസ്തീനിലും ഉള്ള 

കുഞ്ഞിന് വേണ്ടി നിലവിളിക്കും. 

സ്വന്തം മകനോ പുരോഹിതനോ അവിഹിതമായുണ്ടാവുന്ന

കുഞ്ഞിനെ അവഗണിക്കും.

************

അതിജീവന കല. കുട്ടികളോട് ചോദിക്കൂ

മാർക് എങ്ങിനെയുണ്ടെന്നു. കുറവ് വാങ്ങിയവരുടെ

മൊത്തം ലിസ്റ്റ് തരും. കൂടുതൽ വാങ്ങിയ 

ഒരാളെയും ഓർമയുണ്ടാവില്ല.

*********

തീവ്രഭീകരവാദികളും ആസൂത്രകരും 

എന്തുകൊണ്ട് എപ്പോഴും കൊല്ലപ്പെടുന്നു, പിടിക്കപ്പെടുന്നില്ല?  

അവിടിയാണ് ഇന്ത്യൻ രാഷ്ട്രീയ മാറിമായം.

**********

നിങ്ങളോളം ഇല്ലാത്തവരുമായും അയോഗ്യരുമായും

മത്സരിക്കാതിരിക്കുക. തങ്ങളുടെ കഴിവുകേടിനെ 

അവർ നിങ്ങളുടെമേൽ ആരോപണമാക്കും.

നിങ്ങളെ കുറ്റവാളിയാക്കും. 

*******

ഏകമാനത്തിലുള്ളവന് ദ്വി-ത്രിമാനങ്ങൾ മനസ്സിലാവില്ല. 

ത്രിമാനത്തിലുള്ളവന്നു പിന്നെങ്ങിനെ 

ചതുര്മാനത്തെയും പഞ്ചമാനത്തെയും

മാനങ്ങൾക്കതീതനായവനെയും മനസ്സിലാവും?

********

മുഖംമറക്കുന്നവർ പുരുഷന്മാരെയാകെ 

മോശക്കാരാക്കുന്നു. ആണോ പെണ്ണോ, 

പരിചിതരോ അപരിചിതരോ എന്നറിയാനുള്ള

പൗരന്റെ മൗലികാവകാശം നിഷേധിക്കുന്നു।

********

അന്യതത്വം സൂക്ഷിക്കണം. 

അപരിചിതത്വം നിലനിർത്തണം. 

സൗന്ദര്യവും പുതുമയും ദർശിക്കാനാവും.

ഭാര്യയിലാണേലും ജീവിതത്തിലാണേലും. 

*********

ന്യൂസിലാൻഡ്: തീവ്രത വിഷപ്പാമ്പ് പോലെ. 

ആരെയും കടിക്കും। വളർത്തിയവനെയും.

ഭീകരനെ പൂജിക്കാനും വെറുപ്പിനെ   

വോട്ടാക്കാനും ദേശീയതയെ വഴിയാക്കരുത്

ഒരുഭാഗത്ത് നല്ല വിശ്വാസി.

മറുഭാഗത്ത് നല്ല നിഷേധി. 

നിഷേധിക്കാതെ വിശ്വസിക്കാനും

വിശ്വസിക്കാതെ നിഷേധിക്കാനും ആവില്ല. 

*********

രാജ്യത്തിന്റെ മറപിടിച്ചു പറയുന്ന കളവുകൾ  

സത്യമാവുന്നു, എല്ലായിടവുമെത്തുന്നു.

യഥാർത്ഥ സത്യങ്ങൾ കളവുകൾ ആവുന്നു. 

എവിടെയുമെത്തുന്നില്ല.

**********

ശരീരത്തിന് വേണ്ട പ്രണയമേ ഉള്ളു.

ജീവനു തുടർച്ചയുണ്ടാക്കുന്ന കെണി.

വേണ്ടെന്നു വെക്കാമോ? വെക്കാം. 

വേണ്ടെന്നു വെച്ചാലോ? പ്രശ്നമില്ല.

*********

നോക്കൂ: കാക്ക, പൂച്ച, പശു. ആട്, നായ. 

അവ ഇരതേടും. അല്ലാത്തപ്പോഴെല്ലാം 

ആയിരിക്കുന്ന അവസ്ഥയിൽ ആയിരിക്കും. 

ആവുമ്പോലെ ആയിക്കൊണ്ട്.

********

ഖുർആനിൽ എല്ലാമുണ്ട്. ഖുർആൻ പറയുന്നത് മാത്രം 

വിശ്വസിക്കേണം, പിന്തുടരണം.

ഇതിനപ്പുറം ഒരു തീവ്രവാദവും അസഹിഷ്ണുതയും 

എങ്ങനെയുണ്ടാവും?

********

ഒരലിഖിത ഇന്ത്യൻ രാഷ്ട്രീയതൊഴിലാളി യൂണിയനുണ്ട്-

പരസ്പരം സംരക്ഷിക്കാൻ. 

ഏറിയാൽ ആരോപിക്കും. പിടിക്കില്ല, ശിക്ഷിക്കില്ല. 

അപവാദമായല്ലാതെ.