ഇന്ത്യൻ റയിൽവേയുടെ പകൽകൊള്ള എന്തേ ആരും ചോദ്യംചെയ്യാത്തത്?

ഇന്ത്യൻ റയിൽവേയെ എന്തേ ആരും ചോദ്യം ചെയ്യാത്തത്?

ഇന്ത്യൻ റെയിൽവേയുടെ പകൽകൊള്ള എന്തേ ആരും കാണാത്തത്?

ഇന്ത്യൻ റെയിൽവേയുടെ പകൽകൊള്ള എന്തേ ആരും കണ്ടെന്ന് പോലും നടിക്കാത്തത്?

റെയിൽവേയുടെയും ഇന്ത്യൻ സർക്കാരിൻ്റെയും കാട്ടുനീതി കാണുന്നില്ലേ? 

കാട്ടുനീതിയെന്ന് പറയുന്നതും തെറ്റാണ്. 

കാട്ടിലെവിടെയും ഇത്രവലിയ ക്രൂരതയൂം വഞ്ചനയും നടക്കുന്നില്ല. 

********

തത്കാൽ ടിക്കറ്റ് എടുത്താൽ എങ്ങിനെയാണ് റെയിൽവെ പറയുന്നത് പോലെ കാൻസൽ ചെയ്യാൻ സാധിക്കുക?

ഒരാൾക്ക് ബുക്ക് ചെയ്യാമെങ്കിൽ അത് കാൻസൽ ചെയ്യാനും സാധിക്കണമല്ലോ? 

പ്രത്യേകിച്ചും കാൻസൽ ചെയ്താൽ റയിൽവേ ആ ടിക്കറ്റ് വേറൊരാൾക്ക് കൊടുക്കും എന്നതിനാൽ

തത്കാൽ ടിക്കറ്റ് എടുക്കുന്നതിന് മുൻപ് കാൻസൽ ചെയ്യണം എന്നാണോ?

ടിക്കറ്റ് എടുക്കുന്നതിനും നല്പത്തിയെട്ടും ഇരുപത്തിനാലും പത്തും പന്ത്രണ്ടും നാലും മണിക്കൂറുകൾ മുൻപ് കാൻസൽ ചെയ്യണം എന്നാണോ?

ലോകത്തെവിടെയും നടക്കാത്ത, സാധിക്കാത്ത നിയമം, നീതി ഇങ്ങ് ഇന്ത്യയിൽ, ഇന്ത്യൻ റെയിൽവേക്ക്.

*******

ഇന്ത്യൻ റെയിൽവേയുടെ പകൽകൊള്ളയുടെ മുൻപിൽ പെട്രോൾ-ഡീസൽ-ഗ്യാസ്-മറ്റ് നിത്യോപയോഗ സാധനങ്ങളുടെയൊക്കെ അടിക്കടി കൂടുക മാത്രം ചെയ്യുന്ന വിലയും മറ്റും നാണിച്ചുപോകും.

ഇന്ത്യൻ റെയിൽവെ എന്നാൽ എന്തും എങ്ങിനെയും ആവാമെന്നാണ്

ഇന്ത്യൻ റെയിൽവേയുടെയും ഇന്ത്യൻ ഗവൺമെൻ്റിൻ്റെയും ശരിയുടെയും നീതിയുടെയും അളവുകോലുകളും മാനദണ്ഡങ്ങളും ബാധകമല്ല

ഇന്ത്യൻ റെയിൽവേക്ക് വേണ്ടി അവർ നിശ്ചയിക്കുന്നത് മാത്രമാണ് ശരിയും നീതിയും.

ഉപഭോക്താവിൻ്റെ അവകാശങ്ങളും സംരക്ഷണവും ഇന്ത്യൻ റെയിൽവേക്ക് ഇന്ത്യൻ ജനങ്ങളുടെ കാര്യത്തിൽ ബാധകമല്ലേ?

ജനങ്ങൾ ജനങ്ങൾക്ക് വേണ്ടി ജനങ്ങളുടെ ചിലവിൽ ഉണ്ടാക്കിയ ഒരു വലിയ സ്ഥാപനം.

എന്നാലോ അത്തരമൊരു ജനങ്ങളുടെ സ്ഥാപനം ലോകത്തൊരു സ്വകാര്യ കമ്പനിയും കച്ചവടസ്ഥാപനവും കച്ചവടക്കാരനും ചെയ്യാത്ത വിധം ക്രൂരമായി അതേ ജനങ്ങനെ പിഴിയുന്നു.

എത്ര മനുഷ്യത്വവിരുദ്ധമായാണ്, എത്ര ക്രൂരമായാണ് ഇന്ത്യൻ റെയിൽവേ എല്ലാ ഇന്ത്യൻ ഉപഭോക്താക്കളെയും ജനങ്ങളേയും ചൂഷണം ചെയ്യുന്നത്?

അതും ചില്ലറ പൈസ വിഴുങ്ങിക്കൊണ്ടല്ല, ചില്ലറ ശതമാനം വിഴുങ്ങിക്കൊണ്ടല്ല ഇന്ത്യൻ റെയിൽവേ ജനങ്ങളെ ചൂഷണം ചെയ്യുന്നത്. 

കാട്ടുകള്ളൻമാരെ പോലെ തോൽപിച്ചുകളയും ഇന്ത്യൻ റെയിൽവെ.

അത്രക്ക്, തങ്ങൾ മാത്രം തങ്ങൾക്കുള്ള നിയമവും നീതിയും നിശ്ചയിക്കുന്നു എന്നതാണ് റെയിൽവേയുടെ നിലപാട്.

തങ്ങളെ ആരും ചോദ്യം ചെയ്യില്ല, തങ്ങളെ ആർക്കും ചോദ്യം ചെയ്യാൻ സാധിക്കില്ല എന്ന നിലക്കാണ് ഇന്ത്യൻ റെയിൽവേ. ഒരുതരം ഫാസിസ്റ്റ് രീതി.

തെമ്മാടികളെ പോലെയാണ് ഇന്ത്യൻ റെയിൽവേ പെരുമാറുന്നത്, ജനങ്ങളെ അതിഭീകരമായി ചൂഷണം ചെയ്യുന്നത്.

ഈ രംഗത്ത് ഇന്ത്യൻ റെയിൽവേക്ക് മത്സരമില്ല.

ഇന്ത്യയിലെ ജനങ്ങൾക്ക് റെയിൽവേയുടെ കാര്യത്തിൽ വേറൊരു തെരഞ്ഞെടുപ്പില്ല. 

എന്നതിനെ ഒരുതരം മനസ്സാക്ഷിക്കുത്തുമില്ലാതെ, ഒരുതരം അളവുകോലും മാനദണ്ഡവും സൂക്ഷിക്കാതെ, ചൂഷണം ചെയ്ത് വിഴുങ്ങുകയാണ് ഇന്ത്യൻ റെയിൽവേ. തീർത്തും ഫാസിസ്റ്റ് രീതിയിൽ.

ലോകത്തെവിടെയും കേൾക്കാൻ സാധിക്കാത്തവിധം ഭീകരമാണ് ഇന്ത്യൻ റെയിൽവേയുടെ ഈ ചൂഷണം.

*******

ഇന്ത്യയിൽ സർക്കാരിനും സർക്കാർ സ്ഥാപനങ്ങൾക്കും എന്തും തോന്നിയത് പോലെയാവാം എന്നാണ്.

ആരും ചോദ്യം ചെയ്യില്ല, ആരും ചോദ്യം ചെയ്യാനില്ല എന്നതാണ് ഇന്ത്യൻ സർക്കാരിൻ്റെയും റെയിൽവേയുടെയും ധൈര്യം

ഒന്നിനും പ്രതികരിക്കാത്ത അത്തരമൊരു ജനത ഇന്ത്യയിൽ ഉണ്ടെന്നതാണ്, ഉണ്ടാക്കിയെടുത്തിട്ടുണ്ട് എന്നതാണ് ഇവിടത്തെ രാഷ്ട്രിയനേതാക്കളുടെയും അധികാരിവർഗത്തിൻ്റെ ധൈര്യം.

നോട്ട് നിരോധനം വരെ വിജയിപ്പിച്ചു കൊടുത്തത് അങ്ങനെ ഒന്നിനും കൊള്ളാത്ത, പ്രതികരിക്കാത്ത, പ്രതികരണശേഷിയില്ലാത്ത അത്തരമൊരു ജനതയാണ് എന്ന ധൈര്യം.

ഇവിടെ മനുഷ്യാവകാശവും മനുഷ്യനീതിയും ഇന്ത്യൻ ജനതയുടെ പൗരാവകാശങ്ങളും സംരക്ഷിക്കുന്ന കാര്യത്തിൽ കോടതികൾ പോലും നോക്കുകുത്തി മാത്രമാണ്. 

കോടതികളെ പോലും നോക്കുകുത്തി യാക്കിയിരിക്കുന്നു എന്നതാണ് ഇന്ത്യൻ റെയിൽവേയുടെയും ഭരണകൂടത്തിൻ്റെയും രാഷ്ട്രീയ നേതൃത്വത്തിൻ്റെയും ധൈര്യം?

സർക്കാർ എന്നത് ജനങ്ങളെ ചൂഷണം ചെയ്യാനും അധികാരികൾക്കും ഉദ്യോഗസ്ഥപ്രഭുക്കൾക്കും സുഖമായി ജീവിക്കാനും സമ്പാദിക്കാനും മാത്രമെന്നതാണ് ഭരണകൂടത്തിൻ്റെയും കോടതിയുടെയും ഭരണ നേതൃത്വ ത്തിൻ്റെയും ധാരണയും, നീതിബോധവും ജനാധിപത്യബോധവും.

*******

ജനാധിപത്യത്തിൻ്റെ മറയിൽ സർക്കാർ ജനങ്ങളുടെ സമ്പത്ത് പലവിധത്തിൽ കൊള്ള നടത്തുന്നതാണ് ഇന്ത്യയിൽ നടക്കുന്നത്, കാണുന്നത്.

ഇയ്യിടെ ഒരു ട്രെയിൻ ടിക്കറ്റ് ബുക്കിംഗ് കാൻസൽ ചെയ്തു. തത്കാൽ ആയിട്ടാണ് ബുക്ക് ചെയ്തത്.

ട്രെയിൻ സമയത്തിൻ്റെ ആറ് മണിക്കൂർ മുൻപ് കാൻസൽ ചെയ്തു. ഏറെക്കുറെ എടുത്ത ഉടനെ തന്നെ.

1255 രൂപയായിരുന്നു ടിക്കറ്റ് തുക. 

എ/സി ടിക്കറ്റ് ആയിരുന്നു. 

മുഴുവൻ പൈസയും പോയി... 

ഒരു പൈസയും തിരിച്ചുതന്നില്ല.

അങ്ങനെയൊരു സംഗതി ലോകത്ത് എവിടെയെങ്കിലും ഏതെങ്കിലും മേഖലയിൽ നടക്കുമോ?

ഒന്നും കിട്ടില്ല എന്നറിയിച്ചു റെയിൽവെ. 

അങ്ങനെ അറിയിക്കാനും വേണം അൽപവും നീതിബോധമില്ലാത്ത, ഒരു ഉളുപ്പുമില്ലാത്ത ധൈര്യം.

നാല് മണിക്കൂർ മുമ്പാണെങ്കിൽ അമ്പത് ശതമാനമെങ്കിലും കിട്ടുമെന്ന് വിചാരിച്ചാണ് ആറ് മണിക്കൂർ മുമ്പ് കാൻസൽ ചെയ്തത്. 

ടിക്കറ്റ് ബുക്ക് ചെയ്തിട്ട് വെറും പന്ത്രണ്ട് മണിക്കൂറിനുള്ളിൽ കാൻസൽ ചെയ്തിട്ടും ആറ് മണിക്കൂർ മുമ്പ് കാൻസൽ ചെയ്തിട്ടും ഇങ്ങനെയാണ് വിധി.

*********

ഇനി വളരെ മുൻപേ ട്രെയിൻ ടിക്കറ്റ് കാൻസൽ ചെയ്യുമ്പോൾ തിരിച്ചുകൊടുത്തേക്കും എന്ന് തോന്നുന്ന പൈസക്കും ഇവിടെ എന്താണ് വിധി? 

അതിന് വരെ GSTയാണ്. 

അവനവൻ കൊടുത്ത പൈസ തിരിച്ചു തരുമ്പോൾ അതിനും gst എന്നർത്ഥം.

അതും തിരിച്ചുതരുന്ന തുക 50%വും 25%വും ഒക്കെ കുറച്ചിട്ട്. 

ഗവൺമെൻ്റ് എന്നത് ജനങ്ങളെ ചൂഷണം ചെയ്യാനും അധികാരികൾക്ക് സുഖമായി ജീവിക്കാനും സമ്പാദിക്കാനും മാത്രമാണോ?

ഗവണ്മെൻ്റ് എന്നാൽ, സംരക്ഷിക്കുന്നു എന്ന് തോന്നിപ്പിക്കും വിധം ചുറ്റിപ്പൊതിഞ്ഞ് നിന്ന് ജനങ്ങളെ കാർന്നുതിന്നുന്ന പരാന്നജീവിയും ചിതൽപുറ്റും കൊക്കൂണും ഇത്തൾകണ്ണിയും കളയും മാത്രമാവുകയാണ് ഇന്ത്യയിൽ.

********

ഒന്നിനും കൊള്ളാത്ത ജനത  ഇന്ത്യൻ ജനത ഇതിനെല്ലാം കാരണം. 

ഒരു നിലക്കും ചോദ്യം ചെയ്യില്ല ഈ ജനത എന്നത് ഇതിനൊക്കെയും കാരണം.

അതാണ് ഇന്ത്യൻ രാഷ്ട്രീയ നേതൃത്വത്തിൻ്റെയും ഉദ്യോഗസ്ഥ അധികാരിവർഗ്ഗത്തിൻ്റെയും ധൈര്യം.

ഈ ജനതയെ എന്തും പറഞ്ഞ് പറ്റിക്കാം. രാജ്യസ്നേഹം എന്നൊക്കെ മേമ്പൊടിക്ക് തട്ടിവിട്ടാൽ മതി.

ഈ ജനത തങ്ങളെ ചൂഷണം ചെയ്യുന്നവരെ, കളവ് മാത്രം പറഞ്ഞ് തങ്ങളെ പറ്റിക്കുന്നവരെ, വിടുവായത്തം വിറ്റ് കാശാക്കുന്നവരെ പൂജിച്ച് അവതാരമാക്കും, ലോകഗുരുവെന്ന് വരെ വിളിച്ചുകളയും. 

തങ്ങളെ വേരോടെ പിഴുതുകളഞ്ഞ് നശിപ്പിക്കുന്നവരെ വലിയ സംരക്ഷകരായിക്കണ്ട് പൂജിക്കും ഈ ജനത.

അതാണ് ഇത്തരം ഇന്ത്യൻ രാഷ്ട്രീയ ഭരണനേതൃത്വത്തിൻ്റെ ധൈര്യവും.