ജനിക്കും മുന്‍പ് നീയുണ്ടായിരുന്നില്ലെന്ന നിനക്ക് മനസിലാവും. പക്ഷേ .....

പ്രാപഞ്ചികത വല്ലാതെ വലുതും മഹാവിസ്മയവും തന്നെ. 

ഭൂമിയും നമ്മളും വളരേ നിസ്സാരരും ചെറുതും തന്നെ. 

ഇതൊക്കെ ഏതൊരുത്തനും ബോധ്യപ്പെടുന്നുണ്ട്. 

പക്ഷേ ആ ബോധ്യത കൊണ്ടൊന്നും സ്വന്തം വേദനയും വിഷമവും ചോദ്യവും ഇല്ലാതാവില്ല, നിസ്സരമാവില്ല. 

എല്ലാവർക്കും അവനവൻ്റെ വേദനയും വിഷമവും ചോദ്യവും തന്നെ ഏറ്റവും വലുത്.

എല്ലാവരും അവനവൻ്റെ ഉള്ളിൽ കുരുങ്ങിക്കിടക്കുന്നു.

*******

വേറൊരാളുടെ നാവിൽ വെക്കുന്ന പഞ്ചസാരക്ക് നമ്മുടെ നാവിലനുഭവിക്കുന്ന മധുരമാണോ എന്ന് പോലും അറിയില്ല. 

എന്നിരിക്കെയാണോ അങ്ങെവിടെയോ ഉണ്ടായിരുന്നെന്ന് പറയപ്പെടുന്ന ബുദ്ധനേയും മുഹമ്മദിനെയും യേശുവിനേയും കൃഷ്ണനെയും അവരുടെ ചിന്തകളെയും ഇങ്ങ് ദൂരേനിന്ന് മനസ്സിലാക്കണമെന്നും പിന്തുടരണമെന്നും നിർബന്ധിക്കുന്നത്?

*******

അല്ലെങ്കിലും ഏതോ ഭാഷയിലും ഗ്രന്ഥത്തിലും സ്ഥലത്തിലും വ്യക്തിയിലും കാലത്തിലും മാത്രമായി ചുരുങ്ങുന്നവനോ ദൈവം?

അങ്ങനെ ഏതെങ്കിലും ഏതോ പ്രത്യേക ഭാഷയിലും ഗ്രന്ഥത്തിലും സ്ഥലത്തിലും വ്യക്തിയിലും കാലത്തിലും പിറകോട്ട് വന്ന് കൊണ്ടുതന്നെ തന്നെ വന്നുകണ്ട് താനെന്ന ദൈവത്തെ മനസ്സിലാക്കണമെന്ന് വാശിപിടിക്കുന്ന ദൈവമോ?

********

പഞ്ചസാരയും അതിൻ്റെ മധുരവും ഒരുപമ മാത്രം.

അടുത്തിരിക്കുന്നവൻ അറിയുന്ന മധുരം മറ്റേയാൾ, സ്വന്തം ഭാര്യയും മക്കളും കാമുകിയും ആയിരുന്നാലും, അറിയാത്തത്ര ദൂരം എല്ലാവർക്കുമിടയിൽ ഉണ്ട്.

എന്നിരിക്കെ എന്നോ ആരോ പറഞ്ഞുവെന്ന്  പറഞ്ഞും പ്രചരിപ്പിച്ചും വിശ്വസിപ്പിച്ചും ആളുകളെ അതിൻ്റെ പേരിൽ കൂട്ടിയും സംഘടിപ്പിച്ചും നടക്കുന്ന മതങ്ങളുടെയും മാതവിശ്വാസികളുടെയും ഒരു കാര്യം....

*******

ജനിക്കും മുന്‍പ് നീയുണ്ടായിരുന്നില്ല. 

അത് നിനക്ക് മനസിലാവും. 

പക്ഷേ, മരണത്തോടെ നീയില്ലാതാവും. 

അത് നിനക്ക്  ഉള്‍കൊള്ളാനാവില്ല. 

അഹങ്കാരം അതിനനുവദിക്കില്ല.

********

വിശ്വാസിയും വിശ്വാസകാര്യങ്ങളും അങ്ങനെയാണ്. 

99 ശതമാനം ജനങ്ങളും വീണുകിട്ടിയത് തന്നെ കൊണ്ടുനടക്കും. 

ഉപബോധമനസ്സിനെ മാത്രം പിന്തുടരും. 

എന്ത് വന്നാലും കുട്ടിപ്രായത്തിൽ വിഴുങ്ങിയത് തുപ്പില്ല. 

എത്ര ന്യായമില്ലേലും വിശ്വാസം തിരുത്തില്ല.

*******

യാത്ര തുടങ്ങാൻ ഒരുപാട് പേരെ കൂടെ കിട്ടിയെന്നിരിക്കും. 

പക്ഷേ യാത്രയുടെ തുടർച്ചയിൽ കൂടെയുള്ളവരിലധികവും പിരിഞ്ഞുപോയിരിക്കും,  നഷ്ടപ്പെട്ടുകൊണ്ടേയിരിക്കും. 

അരിച്ചരിച്ചവസാനം നീ മാത്രമാവും. 

ഒടുക്കം നീ മാത്രം. 

നീയും നീയെന്ന തോന്നലും ഇല്ലാതാവുന്നത്രയും ഇല്ലാതാവുംവരെയും നീ മാത്രം.

*********

ജീവിതം ഇങ്ങനെയാണ്. 

മരണമെന്ന മെത്തയിലാണ് ജീവിതം കിടന്നുറങ്ങുന്നത്.

ഈയുള്ളവൻ ദൈവത്തോട് നന്ദി പറയാറില്ല.

ഈയുള്ളവൻ ദൈവത്തോട് നന്ദി പറയാറില്ല.

കാരണം, ഈയുള്ളവൻ്റെ ജീവിതം തന്നെ ദൈവത്തിനുള്ള നന്ദിയാണ്.

നന്ദി പറയാൻ മാത്രം വേറെ തന്നെയായ ഈയുള്ളവൻ ഇല്ല.

*******

ഈയുള്ളവൻ ദൈവത്തെ പ്രകീർത്തിക്കാറില്ല. 

കാരണം, ഈയുള്ളവൻ്റെ ജീവിതം തന്നെ ദൈവത്തിനുള്ള പ്രകീർത്തനമാണ്. 

പ്രകീർത്തിക്കാൻ മാത്രം വേറെ തന്നെയായ ഈയുള്ളവൻ ഇല്ല.

*******

ഈയുള്ളവൻ ദൈവത്തോട് പ്രാർത്ഥിക്കാറില്ല.

കാരണം, ഈയുള്ളവൻ്റെ ജീവിതം തന്നെ ദൈവത്തിനുള്ള പ്രാർത്ഥനയാണ്. 

പ്രാർത്ഥിക്കാൻ മാത്രം വേറെ തന്നെയായ ഈയുള്ളവൻ ഇല്ല.

*******

ഉണ്ടെങ്കിൽ ഉള്ള ഈയുള്ളവൻ്റെ അഹങ്കാരവും പെരുമ്പറകൊട്ടലും എല്ലാം തന്നെ ഉണ്ടെങ്കിൽ ഉള്ള ദൈവത്തിനുള്ള പ്രകീർത്തനങ്ങളും സ്തുതികളും മഹത്വപ്പെടുത്തലുകളുമാണ്.

ഉണ്ടെങ്കിൽ ഉള്ള ഈയുള്ളവൻ്റെ  അഹങ്കാരവും പെരുമ്പറകൊട്ടലും എല്ലാം ഉണ്ടെങ്കിൽ ഉള്ള ദൈവത്തിൻ്റെ തന്നെ മഹത്വവും വലുപ്പവുമാണ്.

ഉണ്ടെങ്കിൽ ഉള്ള ഈയുള്ളവൻ്റെ  അഹങ്കാരത്തിലൂടെയും പെരുമ്പറകൊട്ടലിലൂടെയും ഉണ്ടെങ്കിൽ ഉള്ള ദൈവം തന്നെ സ്വയം മഹത്വപ്പെടുന്നതാണ്.

ജീവിക്കുകയോ മരിക്കുകയോ ചെയ്യട്ടെ. ആരും വേദനിക്കരുത്.

ബാധ്യത പോലെ, നിർബന്ധമായും ചെയ്തുതീർക്കേണ്ട കാര്യം പോലെ, എല്ലാവരും എങ്ങിനെയൊക്കെയോ കരഞ്ഞും കഷ്ടപ്പെട്ടും ജീവിതം ജീവിച്ചുതീർക്കുന്നു. 

കെണിഞ്ഞ് പോയത് പോലെ. 

കെണിയിലാണെന്ന് മനസ്സിലാകാത്ത വിധം ബോധം പോലും മാനം നിശ്ചയിച്ച കെണിയിലായത് പോലെ.

********

എന്തെല്ലാം അറിഞ്ഞാലും ആർക്കും മരണത്തെ ഉൾകൊള്ളാൻ സാധിക്കുന്നില്ല. 

ഉള്ളതെന്ന് ധരിച്ചതൊക്കെ ഉണ്ടെന്നും ഉണ്ടാവണമെന്നും നിർബന്ധമുള്ളത് പോലെ. 

മകനായാലും അച്ഛനായാലും കരഞ്ഞും എന്തെന്നില്ലാതെ കഷ്ടപ്പെട്ടും ജീവിതത്തിൽ പിടിച്ചുനിൽക്കാനും പിടിച്ചുനിർത്താനും തന്നെ സർവ്വശ്രമങ്ങളും.

******

ആരും വേദനിക്കരുത്. ആരെയും വേദനിപ്പിക്കരുത്. 

ജീവിക്കുകയോ മരിക്കുകയോ ചെയ്യട്ടെ. 

ആരും വേദനിക്കരുത്. ആരെയും വേദനിപ്പിക്കരുത്. 

ഇത് ദൈവമായാലും സൂക്ഷിക്കേണ്ട മര്യാദ.

*******

എൻ്റെ അച്ഛൻ എൻ്റെ മകൻ.

എൻ്റെ ജീവിതം നിൻ്റെ ജീവിതം.

എത്രകാലമായി ഇത് തന്നെ ആവർത്തിക്കുന്നു?

ജീവിതത്തിന് എല്ലാ കാലത്തും ഒരേ സ്വഭാവം.

പ്രാർത്ഥിക്കാൻ ഒരു നൂറായിരം ആളുകൾ. പക്ഷേ, പ്രവർത്തിക്കാനോ?

പ്രാർത്ഥിക്കാൻ ഒരു നൂറായിരം ആളുകൾ.

നിങ്ങൾക്ക് ജനങ്ങൾ പ്രയാസമെന്നും രോഗമെന്നും വിചാരിക്കുന്നത് സംഭവിച്ചാൽ പ്രാർത്ഥിക്കാൻ ഒരു നൂറായിരം ആളുകൾ.

എന്നാൽ പ്രവൃത്തിക്കാനോ?

*******

പ്രത്യേകിച്ചും പ്രാർത്ഥിക്കുന്നുണ്ടെന്ന് പറയാൻ ഒരു നൂറായിരം ആളുകൾ.

പക്ഷേ പ്രവൃത്തിക്കാനോ?

*******

യഥാർത്ഥത്തിൽ സാധിക്കുന്നത് പോലും ചെയ്യാൻ എത്ര ആളുകളുണ്ട്?

വളരേ വളരേ കുറവ്.

*******

വളരെ ലളിതമായി സാധിക്കുന്നത് പോലും ചെയ്യാതിരിക്കാൻ പ്രാർത്ഥന, പ്രാർത്ഥിക്കുന്നുണ്ട് എന്ന പുറംപൂച്ച് പറച്ചിൽ.

എന്നാലോ, ഇപ്പറഞ്ഞവിധം പ്രാർത്ഥിക്കുമോ പ്രാർത്ഥിക്കുന്നുവെന്ന് പറഞ്ഞവരൊക്കെയും? 

********

യഥാർഥത്തിൽ  പ്രാർത്ഥിക്കുന്നുണ്ടോ, പ്രാർത്ഥിക്കുമോ ആരെങ്കിലും? 

പ്രാർത്ഥിക്കുന്നുവൻ പ്രവൃത്തിക്കും. 

പ്രവൃത്തിക്കുന്നവൻ പ്രാർത്ഥിക്കും. 

സാധിക്കുന്നത് ചെയ്യുന്ന പ്രവൃത്തിയിൽ തന്നെയാണ് പ്രാർത്ഥന.

സത്യസന്ധതയിലും ആത്മാർഥതയിലും അതുണ്ടാക്കുന്ന ശ്രമങ്ങളിലും തന്നെയാണ് പ്രാർത്ഥന. 

യഥാർഥത്തിൽ പ്രയത്നിക്കുന്നവനും പ്രയത്നം തന്നെ പ്രാർത്ഥനയാക്കുന്നവനും പ്രാർത്ഥിക്കുന്നുണ്ടെന്ന് പേർത്തും പേർത്തും എടുത്തുപറയേണ്ടി വരില്ല 

*******

അറിയില്ല.

പിന്നെന്താണ് പ്രാർത്ഥിക്കുന്നുണ്ടെന്ന് പറയാൻ ഒരു നൂറായിരം ആളുകൾ? 

ആത്മാർഥതയും സത്യസന്ധതയും തൊട്ടുതീണ്ടാത്ത കപടൻമാർക്ക് പ്രാർത്ഥിക്കുക എളുപ്പമാണോ, അതല്ലേൽ പ്രാർത്ഥിക്കുന്നുവെന്ന് പറയുക എളുപ്പമാണോ?

സാധിക്കുന്നത് പ്രവർത്തിക്കാതിരിക്കാനുള്ള ന്യായവും മറയുമാണോ പ്രാർത്ഥന, അഥവാ പ്രാർത്ഥിക്കുന്നുണ്ടെന്ന് പറയുക?

സാധിക്കുന്നത് പ്രവൃത്തിക്കുന്നതിക്കാൾ, അല്ലെങ്കിൽ സാധിക്കുന്നത് പ്രവൃത്തിക്കാതിരിക്കാൻ എത്രയോ എളുപ്പമാണ് പ്രാർത്ഥന പ്രാർത്ഥിക്കുന്നുണ്ടെന്ന് പറയുക എന്നത് കൊണ്ടാണോ?

പ്രവൃത്തിക്കാൻ മാത്രം സത്യസന്ധതയും ആത്മാർത്ഥതയും അവർക്കില്ല എന്നത് കൊണ്ടാണോ പുറംപൂച്ച് പോലെ പ്രാർത്ഥിക്കുന്നുണ്ടെന്ന് പറയേണ്ടിവരുന്നത്, പറഞ്ഞുപോകുന്നത്?

പ്രാർത്ഥിക്കുന്നുണ്ടോ ഇല്ലേ എന്നത് ആർക്കും മനസ്സിലാവില്ല, ആർക്കും മനസ്സിലാവുന്ന കാര്യമല്ല എന്നത് കൊണ്ട് എളുപ്പം പ്രാർത്ഥിക്കുന്നുണ്ടെന്ന് പുറംപൂച്ച് പറയാം എന്നത് കൊണ്ടാണോ?

താനായി ഒന്നും ഒരു ഭാരവും ഏറ്റെടുക്കുന്നില്ല, ചെയ്യുന്നില്ല, 

എന്തെങ്കിലും ഏറ്റെടുക്കാനും ചെയ്യാനും താൻ തയ്യാറല്ല, 

എന്തെങ്കിലും ഏറ്റെടുക്കാനും ചെയ്യാനും മാത്രം സത്യസന്ധതയും ആത്മാർത്ഥതയും തനിക്കില്ല, 

അതിനാൽ എല്ലാറ്റിനും ഉത്തരവാദിയായ ദൈവം തന്നെ വേണമെങ്കിൽ എന്തെങ്കിലും ചെയ്യട്ടെ എന്നതാണോ പ്രാർത്ഥിക്കുന്നുണ്ടെന്ന് പറയുന്നവരുടെ ന്യായം? 

******

പ്രവൃത്തിക്കാൻ യഥാർഥത്തിൽ പ്രവർത്തിക്കുക തന്നെ വേണം, 

പ്രവൃത്തിക്ക് വെറും വാക്കുകൾ പോര. 

പ്രവൃത്തിക്കുന്നില്ലെങ്കിൽ എല്ലാവർക്കും മനസ്സിലാവും.  

എന്നതിനാൽ, 

എന്നതൊഴിവാക്കാൻ കപടന്മാരായ മഹാഭൂരിപക്ഷവും പ്രാർത്ഥിക്കുന്നുണ്ടെന്ന് പുറംപൂച്ച് പറയും.

ജനിച്ചു മരിച്ചു എന്ന് നമ്മൾ പറയുന്ന 'ഞാൻ' ഉണ്ടോ?

വന്നുപോകുന്നു (ജനിച്ചു മരിച്ചു) എന്ന് നമ്മൾ പറയുന്ന 'ഞാൻ' ഉണ്ടോ?

ആ ഞാൻ ആദ്യമേ, ജനിക്കുന്നതിന് മുൻപേ ഇവിടെയോ അല്ലെങ്കിൽ എവിടെയോ ഉണ്ടായിരുന്നുവോ? 

ആ ഞാൻ മരിച്ചതിനു ശേഷവും ഇവിടെയോ അല്ലെങ്കിൽ എവിടെയോ ബാക്കിയായി ഉണ്ടാവുമോ?

******

ഒരാൾ മരിച്ചു എന്ന് പറഞ്ഞാൽ ആ ഒരാൾ മരിച്ചു, ഇല്ലാതായി എന്ന് മനസിലാവുന്നുണ്ട്. 

പക്ഷേ, അതുപോലെ 'ഒരാൾ' ജനിച്ചു എന്ന് പറയാനാവുന്നുണ്ടോ? 

അതുപോലെ ഒരാൾ ജനിച്ചു എന്ന്  മനസ്സിലാക്കാനാവുന്നുണ്ടോ? 

അങ്ങനെ 'ഒരാൾ' ജനിക്കുന്നുണ്ടെങ്കിൽ ആ ജനിക്കുന്ന ആ 'ഒരാൾ' ആരാണ്? 

ആ നിലക്ക് ഒരാൾ എന്ന് പറയാനാവും വിധം വ്യക്തിത്വമുള്ള, ഞാൻബോധമുള്ള ഒരാളാണോ ജനിക്കുന്നത്?

********

സ്ഥിരമായ ഞാൻ അഥവാ ഞാൻ ബോധം എന്നത് ഇല്ല. 

ജനിക്കുന്നതിന് മുൻപും മരിച്ചതിന് ശേഷവും തുടരുന്ന ഞാൻ ഇല്ല. വ്യക്തി ഇല്ല, വ്യക്തിത്വബോധം ഇല്ല.

എല്ലാം എല്ലായിടത്തുമെന്ന പോലെ സംഭവിച്ചു. അത്രമാത്രം.

ഒന്നും ഒരു ബുദ്ധനും ജൈനനും (കഥാപാത്രം എന്നതിനപ്പുറം ഉണ്ടായിരുന്നെങ്കിൽ ഉണ്ടായിരുന്ന കൃഷ്ണനും രാമനും) ഭാരതീയമെന്നും ഭാരതീയരെന്നും ചിന്തിച്ചും വിചാരിച്ചും ആയതല്ല, അങ്ങനെ ഒന്നും പറഞ്ഞതല്ല.. 

ഒരു ഇതിഹാസവും പുരാണവും ഭാരതീയ ചിന്ത കൊണ്ടും, അത്തരം ഇടുങ്ങിയ (യഥാർഥത്തിൽ അപ്പോഴൊന്നും ഇല്ലാതിരുന്ന) ഭാരതീയ ചിന്ത വെച്ചും പറഞ്ഞും അവ്വിധം സ്വയം ഭാരതീയനാണെന്ന് തിരിച്ചറിഞ്ഞും എഴുതപ്പെട്ടതുമല്ല. 

എല്ലാം എല്ലായിടത്തുമെന്ന പോലെ സംഭവിച്ചു. 

അല്ലെങ്കിലും ലോകം തന്നെ തറവാട് എന്ന് പറയുന്നവർക്ക് എങ്ങിനെ ഭാരതം എന്ന വേറിട്ട വിഭജന ചിന്ത ഉണ്ടാവും?

ഈ പറയുന്നത് ഒരു തെറ്റായ വിവരമല്ലേ? കളവല്ലേ?

വിശ്വാസിയും വിശ്വാസകാര്യങ്ങളും അങ്ങനെയാണ്. 

99 ശതമാനം ജനങ്ങളും വീണുകിട്ടിയത് തന്നെ കൊണ്ടുനടക്കും. 

ഉപബോധമനസ്സിനെ മാത്രം പിന്തുടരും. 

എന്ത് വന്നാലും കുട്ടിപ്രായത്തിൽ വിഴുങ്ങിയത് തുപ്പില്ല. 

എത്ര ന്യായമില്ലേലും വിശ്വാസം തിരുത്തില്ല.

*******

ചോദ്യം: ഈ പറയുന്നത് ഒരു തെറ്റായ വിവരമല്ലേ? കളവല്ലേ?

ശരിയാണ്. 

കളവാണ്.

എന്തുകൊണ്ട് കളവാണ്?

കാരണം ഒരു ശതമാനവും ഇല്ല ഇങ്ങനെയുള്ളവർ.

ഒരു ശതമാനത്തിൻ്റെ നൂറിലൊന്ന് പോലുമില്ല.

ആ നിലക്ക് അറിയാതെ സംഭവിച്ചത്, ഒരോളത്തിന് പറഞ്ഞത് തന്നെയാണ്.

കോടിയിൽ ഒന്ന് പോലും ഉണ്ടാവില്ല യഥാർഥത്തിൽ പൂർണമായും ഉപബോധമനസിനെ തകർത്ത് പുറത്ത് വന്നവർ. 

അങ്ങനെ പുറത്ത് വരിക എളുപ്പമല്ല. 

അങ്ങേയറ്റം അരക്ഷിതത്വം വിളിച്ചു ചോദിച്ചു കൊണ്ടുവരുന്ന പരിപാടിയാണത്.

അതുകൊണ്ട് തന്നെ യഥാർത്ഥത്തിൽ പറഞാൽ ബാക്കി ഒരു ശതമാനം പോലും ഇല്ല. 

0.001 ശതമാനം പോലും ഇല്ല. 

നൂറിൽ ഒരാൾ ഉണ്ടെന്ന് പറയുന്നതൊക്കെ ഒരുതരം പർവ്വതീകരണം മാത്രമാണ്. കളവാണ്.

ഒരോളത്തിൽ പറയാവുന്നത് മാത്രം. 

ജീവിതത്തിന് വേണ്ടി, സാമൂഹ്യ സുരക്ഷിതത്വത്തിന് വേണ്ടി സകല ചിന്തകളും പൊതുമദ്ധ്യത്തിൽ വേണ്ടെന്ന് വെച്ച് കൂട്ടത്തിൽ ഒരുമിച്ചു നടക്കുന്നവർ തന്നെയാണ് 99.999 ശതമാനവും അതിലധികം.

********