ജീവിക്കാൻ നടത്തിയ പെടാപാട് ഇക്കാണുന്ന പുരോഗതി.

"ഗുരോ, ആത്മീയതയുമായും അന്വേഷണവുമായും ഒരു ബന്ധവും ഇല്ലാത്തത്?" "പൗരോഹിത്യം" 

"ആത്മീയന്റെയും അന്വേഷകന്റെയും വലിയ ശത്രു?" 

“പുരോഹിതന്‍"

*********

ആരെങ്കിലും മാനിച്ചാലും അംഗീകരിച്ചാലും 

കൂടുന്നതല്ല ബോധോദയം, തെളിച്ചം. 

മാനിക്കാതിരുന്നാലും അംഗീകരിക്കാതിരുന്നാലും 

കുറയുന്നതുമല്ല.

*********

ജീവിക്കാൻ നടത്തിയ പെടാപാട് 

ഇക്കാണുന്ന പുരോഗതി. 

പാട്പെട്ട നിന്നെ ജീവിതം വഴിയാക്കി. 

നീ ജീവിതത്തെയും. 

പരസ്പരം വഴിയായി നീയും ജീവിതവും.

********

"ഗുരോ, ബോധോദയം എല്ലാറ്റിനും ഉത്തരം നല്‍കില്ലേ?" 

"ഇല്ല. ഒരുത്തരവും തരില്ല. 

പകരം  ചോദ്യങ്ങളെ തന്നെ ഇല്ലാതാക്കും, ബോധോദയം.”

*********

അണു കണ്ടും അത്ഭുതസ്തബ്ധനായി 

പ്രകീര്‍ത്തിച്ചുപോവുക സാധാരണം. 

പക്ഷെ തന്നെ പ്രകീര്‍ത്തിക്കാന്‍ ദൈവം 

ആവശ്യപ്പെടുന്നുവെന്ന് പറയുക പാതകം.

******

ജീവിതത്തിൽ ജീവിതംകൊണ്ട്‌ രൂപപ്പെടുന്ന 

കല്‍പ്പനകളും വഴികളും തന്നെ 

ജീവിത കല്‍പ്പനകളും വഴികളും. 

അത് തന്നെ ദൈവകല്‍പ്പനകളും വഴികളും.

*******

ദൈവത്തിന് നിന്റെ മാനവും തലച്ചോറും 

മാത്രമെന്നാരോപിക്കരുത്. 

നിന്റെ മനസിലാക്കലും വിധികളും 

നിന്റെ മാനവും ജീവിതവുമായി ബന്ധപ്പെട്ടത്.

*******

ദൈവം ആരെന്ന് ദൈവമറിയും. 

നീയെന്തിന് അസ്വസ്ഥപ്പെടണം? 

എല്ലാം ദൈവനിശ്ചയം, ദൈവത്തിന്‍ അറിവോടെ. 

പിന്നെന്തിന് നീ പ്രാര്‍ത്ഥിച്ചറിയിക്കണം?

********

വ്യത്യാസം: 

വിഡ്ഢിയെന്ന് വിഡ്ഢിയെ വിളിച്ചുകൂടാ; 

പക്ഷെ, വിവേകിയെ വിളിക്കാം. 

വിഡ്ഢിയെ സഹായിക്കാം. 

തിരുത്താനും ശകാരിക്കാനും പറ്റില്ല.

*******

ബുദ്ധി അതിജീവനത്തിന് വേണ്ട 

'ഞാന്‍'ബോധത്തിന്. 

ഉപജീവനവഴികള്‍ ഉണ്ടാകുന്നതിന്. 

അതിനപ്പുറം ബുദ്ധിയുടെ മാനങ്ങളും മാനദണ്ഡങ്ങളും കൊള്ളില്ല.